“Ngũsĩ isu nĩsyakuaa andũ nesa, o vamwe na tũkitĩ twakwa. Mũthenya ũmwe, mwĩĩtu-a-asa ũmwe waũngye ũtee wa kakalĩ kau wĩtawa Elaine nĩwanengie tũkitĩ twakwa twĩlĩ mĩsukuti. Ĩtina wa ũu, yĩla nesa kwĩsĩla vakuvĩ na kakalĩ kau, tũkitĩ tũu nĩtweekusasya vyũ tũyenda kũthi vala tũnengeawa mĩsukuti.

“Kĩu kyaendeeie kwa myei kauta. Tũkitĩ twakwa nĩtwatanĩaa kũya mĩsukuti, nakwa nĩnatanĩaa kũea o ngewa nguvĩ na Ngũsĩ ila neethĩa. Ĩndĩ nĩnakĩaa kũmanyĩana nasyo mũno. Naĩ na myaka mbee wa 70, na ndyeesĩ nesa kĩla Ngũsĩ iĩkĩĩaa. Na nũndũ nĩnasonoketwʼe nĩ makanisa ma Protestant, naĩtye nĩ kavaa ngemanyĩasya Mbivilia nĩ nyioka.

“Ĩvindanĩ o yĩu, nĩneethĩanaa na Ngũsĩ ingĩ o kũndũ kũngĩ taoninĩ ĩsu siũngye ũtee wa tũkalĩ twoo. O namo asu meethĩawa me na ũnyanya. Ĩvinda yonthe masũngĩaa makũlyo matũmĩĩte Mbivilia, na kĩu nĩkyatumie nambĩĩa kũmaĩkĩĩa mũnango.

“Mũthenya ũmwe, Elaine angũlilye, ‘We nũĩkĩĩaa kana nyamũ nĩ mũthĩnzĩo twanengiwe nĩ Ngai?’ Namwĩie, ‘Ĩĩ, vyũ!’ Nĩvo ĩndĩ wasomie nakwa Isaia 11:6-9. Kuma vau, nĩnendeeiwʼe mũno nĩ kwĩmanyĩsya Mbivilia, o na kau no nakĩaa kwosa mavuku moo.

“Mĩthenyanĩ ĩla yaatĩĩe, nĩnatanĩaa kũea ngewa nguvĩ ĩndĩ syĩ na maũndũ maingĩ ma vata nĩ na Elaine na mũũme, Brent. Nĩmambĩkĩie vinya nĩsome Mathayo nginya Meko ma Atũmwa nĩ kana nĩelewe kĩla naĩle kwĩka nĩatĩĩe ngelekanyʼo ya Klĩsto. Na ũu nowʼo neekie. Ĩtina wa kavinda o kakuvĩ, nĩneetĩkĩlile kwĩmanyĩasya Mbivilia na Brent na Elaine. Twaĩ katĩkatĩ wa mwaka wa 2016.

“Neethĩawa na mea ma kwĩmanyĩsya kĩla kyumwa na kũthi maũmbanonĩ Nyũmbanĩ ya Ũsumbĩ. Nĩnatanaa mũno nũndũ wa mwanya ũla nakwatĩte wa kũmanya kĩla Mbivilia ĩmanyĩasya. Ĩtina wa mwaka ũmwe ũu na kĩndũ, nĩnavatisiwe. Yu nĩ na myaka 79, na nĩnĩsĩ nesa ki kana nginyĩle nzĩanĩ ĩla yaĩlĩte. Yeova nũngathimĩte mũno kwa kũmbĩtĩkĩlya nĩthĩwe nĩ ũmwe wa andũ ma mũsyĩ wake.”