MWANA-A-ASA ũmwe wĩtawa Don kuma Canada nũtataa mũno atavye ũvoo mũseo andũ ala matũlũlaa sokonĩ mate na nyũmba mekala. Don aĩtye ũũ ĩũlũ wa ũmwe wa andũ asu: “Ve mũndũ ũmwe katĩ wa asu mate mĩsyĩ weetawa Peter. Ndyaaona mũndũ wĩany’a kĩko take kũu isakinĩ. Ailyĩ naĩ vyũ na ndwaĩ ũmũthengeea nũndũ ndendete kũthengeanĩa na andũ. O na kau andũ nĩmatataa mũno kũmwĩka nesa, nĩwaleaa mavinda maingĩ.” Ĩndĩ o na vailyĩ ũu, kwa ĩvinda ya myaka mbee wa 14 Don ndaanow’a nĩ kwĩkala aitata kwĩka mũndũ ũsu ũseo.

Mũthenya ũmwe Peter akũlilye Don atĩĩ: “Ũtindaa ũmbatĩĩe nĩkĩ? Mbona andũ ala angĩ mayĩthĩawa makwetye ũu wakwa? Ũnthĩnĩkĩaa nĩkĩ?” Don atũmĩie maandĩko atatũ na ũĩ nĩ kana atate kũvikĩa Peter ngoo. Mbee vyũ ambie ũkũlya Peter ethĩwa nĩweesĩ kana Ngai e ĩsyĩtwa, na amwĩa asome Savuli 83:18 Mbivilianĩ eyonee. Don asyokie eea Peter nĩesomee ĩandĩko ya Alomi 10:13, 14 nĩ kana amanye nĩkĩ wamũthĩnĩkĩaa. Ĩandĩko yĩu yaĩtye kana “o ũla ũkekaĩla syĩtwa ya Mwĩaĩi, nũkatangĩĩwa.” Mũthya Don asomie ĩandĩko ya Mathayo 9:36, na ĩndĩ eea Peter nĩesomee one. Mũsoa ũsu waĩtye atĩĩ: “Na [Yesũ] amona makomano, amew’ĩa tei nĩkwĩthĩwa nĩmanyamaaw’a na kũnyaĩĩkw’a ta malondu mate na mũĩthi.” Ĩla Peter wasomie ndeto isu, akũlilye ũũ akelemetye methoi: “Nyie nĩ ũmwe wa malondu asu?”

Peter nĩwambĩĩe kũalyũka. Nĩwathambie, aolanga kĩng’ee, na ambĩĩa kwĩkĩa ngũa nzeo ila wanengetwe nĩ Don. Peter nĩwaendeeie kwĩkĩa kĩthito ekale e mũtheu.

Peter aĩ na kavuku waandĩkaa maũndũ ala wakomana namo kĩla mũthenya. Maũndũ ala waandĩkĩte mwambĩĩonĩ maĩ ma kũmakya na ma kũtũla ngoo, ĩndĩ ala waandĩkie ĩtina maĩ kĩvathũkany’o. Kwa ngelekany’o, vandũ vamwe aandĩkĩte atĩĩ: “Ũmũnthĩ nĩnĩmanyie ĩsyĩtwa ya Ngai. Yu ĩla ngũvoya no nĩvoye Yeova. Nĩĩw’a mũyo mũno nũndũ nĩnĩmanyie ĩsyĩtwa yake. Don ambĩie Yeova no atw’ĩke Mũnyanyawa, ũla  ũtonya kũmbĩthukĩĩsya kĩla ĩvinda, o na twĩthĩwe twĩ ĩndĩĩ kana nĩ kyaũ kĩendeee.”

Ndeto syake sya mũthya kũandĩka aandĩkĩie ala masyaanĩw’e. Aandĩkie atĩĩ:

“Sua ũũ ndikwĩw’a nesa. Nĩona yu nĩngũie. Ĩndĩ o na ethĩwa ũũ nĩw’o mũthenya wakwa wa mũthya, nĩnĩsĩ kana ngoonana ĩngĩ na mũnyanyawa [Don] Nthĩ Nzaũ. Ethĩwa yu mũkwetye kũsoma ndeto ii, no nginya nĩthĩwe nde vo. Ĩndĩ mũkesa kwona mũndũ ũilyĩ ta ũte ũmwe witũ mathikonĩ makwa, neenai nake na mwa nĩngũmwĩsũva mũsome kavuku kaa kanini ka mbuluu. [Awetaa kavuku ka kwĩmanyĩsya Mbivilia ketawa “W’o Ũla Ũtongoasya kwa Thayũ Ũtathela.” Kavuku kau akanengetwe myaka yĩ navu ĩtina.] * Kaĩtye kana ngoona mũnyanyawa ĩngĩ Nthĩ Nzaũ. Nĩĩkĩĩte ũu na ngoo yakwa yonthe. Ninyie mwana-a-inyia wenyu, Peter.”

Mathiko mathela, mwĩĩtu-a-inyia wa Peter wĩtawa Ummi aisye ũũ: “Myaka ta ĩlĩ mĩthelu Peter nĩwaneenie nakwa. Noonie e mũtanu ũndũ ndaamwona kwa ĩvinda ya myaka mingĩ. O na nĩwathekaa.” Ummi eeie Don atĩĩ: “Nĩngũsoma ĩvuku yĩu nũndũ wesa kwona kĩndũ kĩũkiita mwana-a-mwaitũ, no nginya kĩthĩwe kĩ kĩndũ kya mwanya.” O na ĩngĩ Ummi nĩweetĩkĩlile kũsoma yĩla ĩvuku tũtũmĩaa matukũ aa yĩtawa Mbivilia Yo Ĩmanyĩasya Ata? na ũmwe wa Ngũsĩ sya Yeova.

Kwoou nĩtwĩkei ta Don. Tũikasiasye mũvwanĩle wa mũndũ. Vandũ va ũu, nĩtwendei ala angĩ kuma ngoonĩ na tũyũmĩĩsya andũ ma mĩthemba yonthe. (1 Tim. 2:3, 4) Tweeka ũu, nĩtũtonya kwĩsa kũtethya andũ mailyĩ ta Peter, ala matonya kwĩthĩwa mataũnganawa namo ĩndĩ me na ngoo nzeo. Na nĩtwĩthĩwei na mũĩkĩĩo vyũ kana Ngai ũla ‘ũsyaasya ngoo,’ akatuma ũw’o wĩana ngoonĩ sya ala aĩlu.—1 Sam. 16:7; Yoa. 6:44.