MŨTHENYA ũmwe inyia-akwa angũlilye atĩĩ: “Ũtumaa ũtathaitha aa-ũmau ala makwie nĩkĩ? Nũndũ ũtesĩ kana keka ti mo ndwĩthĩwa thayũ? O na ndũmatũngĩa mũvea? Yu we ũtonya kũvũthya syĩthĩo syĩthĩĩtwe vo ĩvinda yĩasavĩte ũu ata? Kũlea kũnenga ndaĩa aa-ũmae maitũ ala makwie nĩ kwasya kana ũthaithi witũ nĩ wa ũtumanu.” Amina oou ambĩĩe kũĩa.

Mami ndaneenaa ũu. Na eka ũu, no we weekĩte mĩvango nambĩĩe kwĩmanyĩsya Mbivilia, o na kau eekie ũu na maũĩ nĩ kana we mwene ndakemanyĩsye. Kĩla ĩvinda nĩnamwĩw’aa na nĩkyo kĩtumi ĩvinda yĩu neewie ve vinya kũlea kũmwĩthukĩĩsya. Ĩndĩ yaĩ no nginya nĩlee kũmwĩthukĩĩsya nĩ kana nĩmwendeesye Yeova. Na keka ti Yeova wanengie vinya, ndyĩthĩwa naalea kĩla Mami wandavasya.

Ithyĩ twaĩ ma ndĩni ya Buddha, o ta andũ aingĩ ma Japan. Ĩndĩ o kwĩmanyĩsya na Ngũsĩ sya Yeova vandũ va myei ĩlĩ nĩkwatumie nĩĩkĩĩa kana Mbivilia nĩ ya w’o. Ĩla namanyie kana nĩ na Asa wĩ ĩtunĩ, nĩnendie kwĩmanyĩsya ĩũlũ wake. Nyie na Mami twatindĩaa kũea ngewa ĩũlũ wa maũndũ ala naendeee kwĩmanyĩsya. O na nĩnambĩĩie kũthi maũmbanonĩ ma Wakyumwa Nyũmbanĩ ya Ũsumbĩ. Ĩla ũmanyi wakwa ĩũlũ wa ũla w’o wongelekile, nĩnatavisye Mami kana ndikambĩla kũatĩĩa syĩthĩo sya ndĩni ya Buddha. Avĩndũkie vau kwa vau, na ambĩa, “Nĩ ũndũ wĩ nthoni mũno kwona mũndũ ũmwe vaa mũsyĩ aemete kũnenga aa-ũmau ndaĩa.” Ambĩie ndikaasyoke kwĩmanyĩsya Mbivilia ĩngĩ na ndikaasyoke maũmbanonĩ asu. Ndyoonaa Mami ta wĩsa kũneena ũu! Noonie ta wavĩndũka atw’ĩka mũndũ ũngĩ.

Nĩneemanyĩisye ĩandĩkonĩ ya Aeveso kĩlungu kya 6 kana Yeova endaa nĩw’e asyai makwa. Ĩndĩ Tata na Mami moovete kĩmwe. Mwambĩĩonĩ nasũanĩaa kana namethukĩĩsya o namo nĩmeũmbĩthukĩĩsya, na nũndũ wa ũu tũyambĩĩa kwĩw’ana ĩngĩ. Na eka maũndũ asu, nĩneeteele mũtiani wa kũthi sekondalĩ, na nĩnaaĩlĩte kwĩyũmbany’a. Kwoou, nĩnatwie kwĩka ũndũ mambĩaa kwa kavinda ka myei ĩtatũ. Ĩndĩ namwathie Yeova kana kavinda kau kathela, nĩngwambĩĩa kũthi maũmbanonĩ ĩngĩ.

Ũtwi ũsu neekie waĩ mũthũku kwa nzĩa ilĩ. Nzĩa ya mbee, nasũanĩaa kana wendi wakwa mwingĩ wa kũmũthũkũma Yeova ndwĩsa kũolwa nĩ myei ĩsu  ĩtatũ. Ĩndĩ vandũ va ũu, ĩtina wa kavinda kanini nĩnambĩĩe kwĩw’a ũnyanya wakwa na Yeova ũyonza. Nzĩa ya kelĩ, vandũ va Mami na Tata mambĩĩe kũmbĩtĩkĩlya nĩke maũndũ amwe, meekie kũngasa ĩ ya mũno nĩeke maũndũ onthe ala makonetye ũthaithi wa w’o.

Nyũmbanĩ ya Ũsumbĩ nĩnakomanĩte na aingĩ mavĩngawa nĩ andũ moo ma mũsyĩ. Mambĩkĩĩthĩtye vyũ kana Yeova akanengae vinya. (Mt. 10:34-37) O na mambĩie kana no inyie ngatuma mũsyĩ witũ ũtangĩĩwa. Na kwoou nĩnambĩĩe kũvoya na kĩthito vyũ nĩ kana nĩmanyĩsye kũmwĩkwatya Yeova.

Nĩ mũsyĩ navĩngawa kwa nzĩa syĩ kĩvathũkany’o. Kwa ngelekany’o, Mami nĩwatatie kũmbĩsũva na kũngũlya nĩsũanĩe ũndũ ũsu ĩngĩ. Kaingĩ neekaa kũkilya. Ĩndĩ ĩla nesa kũneena, tweekaa kũthatanĩa nũndũ kĩla ũmwe witũ eethĩawa aitata ethukĩĩw’e newe. Kavaa keka nĩnoonisye Mami nĩngũelewa ũndũ ũkwĩw’a na nĩngũelewa mũĩkĩĩo wake, nũndũ maũndũ methĩwa maendie nesa. Asyai makwa nĩmambongelaa mawĩa nĩ kana wĩthĩe ndyumaala. O na mavinda angĩ navingĩawa nza kana ngavatwa lĩu.

Mami nĩwambĩĩie kũkũlya andũ angĩ ũtethyo. Kwa ngelekany’o, nĩwaneenie na mwalimũ wakwa sukulu ĩndĩ mwalimũ ũsu avanga we ndeĩlikya ngewanĩ sitũ. O na nĩwandwaie kũla kwĩ mũnene wake wĩanĩ nĩ kana aneene nakwa ambonethye kana vai ndĩni o na ĩmwe ĩtethya. Na e mũsyĩ nĩwakũnĩaa andũ aingĩ ma mũsyĩ aĩĩte nĩ kana mamũtetheesye. O na kau ũndũ ũsu nĩwanthatisye, nĩ ũmbanonĩ atumĩa nĩmambĩsũvie nĩsũanĩe ũndũ Mami ũendeee kũtavya andũ aingĩ ũvoo o na atesĩ.

 Asyai makwa nĩmendie nĩthi yunivasiti. Mavangĩte kũnzomethya nĩ kana ndikaathĩne neana. Meekwatasya kana ngakwata wĩa mũseo. Na nũndũ tũyaĩ tũtonya kũea ngewa nesa tũuĩtye, naandĩkĩie Mami na Tata valũa iana ũna nĩmaeleetye maũndũ ala navangĩte. Tata athatie mũno na ambĩa, “Ethĩwa wĩona ta ũtonya kũkwata wĩa, ũmanthe tũivika ũnĩ kana ũthi vyũ.” Namũvoyie Yeova namũtavya thĩna ũsu. Mũthenya ũla waatĩĩe nĩ ũtavany’a, eĩtu-a-asa elĩ nĩmangũlilye nĩsomethasye syana syoo ĩla syauma sukulu. Ũndũ wa ũsengy’o nĩ kana vai ũmwe weesĩ kana ũla ũngĩ nũngũlilye. Ĩndĩ Tata ndaaendeew’a nĩ ũndũ ũsu na kwoou nĩwaekie kũneeny’a na aeka kũũngana nakwa. Nake Mami aisye kana kavaa ngatw’ĩka kang’endilĩ kũte kũtw’ĩka ũmwe wa Ngũsĩ sya Yeova.

Nekalaa ngekũlya kana we Yeova nĩwendaa nĩthatye asyai makwa mũthemba ũsu. Ĩndĩ nĩnaendeeie kũvoya na kũsũanĩa Maandĩko ala monanĩtye ũndũ Yeova ũmbendete. Kĩu kyandetheeisye nĩthĩwe na woni ũla waĩle na ngĩmanya kana kĩndũ kĩmwe kyatumaa asyai makwa mambĩnga nĩ kana nĩmanthĩnĩkĩaa. Yeova nĩwandetheeisye nĩsũanĩe nesa na ngĩmanya ũtwi ũla ngwĩka. O na ĩngĩ, o ũndũ naendeeie kũtavany’a mũno, now’o naendeeie kwenda ũtavany’a. Nũndũ wa ũu, nĩnatwie kũtw’ĩka vainia.

Ĩla eĩtu-a-asa amwe mamanyie nĩngwenda kwosa ũvainia, mambĩie nĩneteelange nginya asyai makwa mausye. Nĩnavoyie, neeka ũkunĩkĩli, neethiana nĩmanye nĩkĩ nendaa kwosa ũvainia, na nakũlya ũtao kuma kwa ana-a-asa na eĩtu-a-asa ala maendeee nesa kĩ-veva. Ĩla neekie ũu, neethĩie kana ũla nendaa kwendeesya nĩ Yeova na ti mũndũ ũngĩ. Ũndũ ũngĩ nasũanĩie nĩ kana o na nakũĩĩsya kwosa ũvainia, no kwĩthĩwa asyai makwa mateĩsa kũvĩndũka.

Noosie ũvainia nĩ mwaka wa mũthya sekondalĩ. Ĩtina wa kavinda kanini, nĩnatwie kana sua ũmwe ngathamĩĩa kũla kwĩthĩawa vata mũnene wa atavany’a. Ĩndĩ Mami na Tata mayendaa kwĩw’a kana nĩnguma mũsyĩ. Kwoou neeteelile nginya navikya myaka 20. Na ĩndĩ nĩ kana Mami ndakathĩnĩke kĩlĩko mũno, nakũlilye ovisi wa ũvonge ũndũme ngalĩko ya ĩtheo ya nthĩ ya Japan, nũndũ kũu kwaĩ na andũ maitũ ma mũsyĩ.

Nĩ kũu naathimiwe mũno nũndũ aka meana ũna neemanyĩisye namo nĩmavatisiwe. Kavindanĩ o kau nĩnambĩĩe kwĩmanyĩsya Kĩsũngũ nĩ kana nĩthĩwe nĩtonya kũtavya andũ aingangĩ ũvoo mũseo. Kĩkundinĩ kĩla naĩ vaĩ ana-a-asa elĩ maĩ mavainia ma mwanya. Nĩnoonaa kĩthito kyoo na ũndũ matetheeasya ala angĩ. Na kwoou natw’a kana mũthenya ũmwe ngatw’ĩka vainia wa mwanya. Ĩvinda yĩu Mami nĩwawaie mũno kelĩ. Mavinda asu elĩ nĩnenũkaa ngamũsũvĩe. Kĩu kyamũsaanĩisye mũno na kyatuma avĩndũka vanini.

Ĩtina wa myaka mũonza, nĩnakwatie valũa kuma kwa ũmwe wa ala mavainia ma mwanya nĩĩ nĩnaweta. Mwana-a-asa ũsu wambandĩkĩe valũa etawa Atsushi. Ambĩie nĩwendaa kũtwaana, na kwoou angũlilye maũndũ makwa mailyĩ ata na nĩona ata. Ndyaĩ naasũanĩa kũtwawa nĩ Atsushi, na ndyaĩ naasũanĩa kana no ese kũngũlya ndũũ. Ĩtina wa mwei ũmwe namũsũngĩie nĩmwĩĩte no nende kũtuma ndũũ nake. Twesie kwĩthĩa kana nĩtwakwatĩanĩe maũndũnĩ maingĩ. Kwa ngelekany’o, ithyelĩ nĩtwendete ũthũkũmi wa ĩvinda yonthe na nĩtweeyũmbanĩtye kũthũkũma o vala twĩtũmwa. Nĩ na Atsushi nĩtwesie kũtwaana. Natanie mũno vyũ mũthenya wa alũsi nũndũ Tata, Mami, na andũ angĩ ma mũsyĩ nĩmookie!

O na tũtaminĩte ĩvinda ĩasa twĩ mavainia ma kĩla ĩvinda, Atsushi nĩwatw’ĩkĩthiw’e mũsyaĩĩsya wa mũthyũlũlũko wa kũtetheesya. Ĩtina wa kavinda  kakuvĩ nĩtwakwatie moathimo angĩ. Moathimo meva? Nĩtwatw’ĩkĩthiw’e mavainia ma mwanya na ĩndĩ twanengwa wĩa wa kũthyũlũlũka. Ĩndĩ mũthenya ũmwe ĩtina wa kũthokea ikundi ila syaĩ mũthyũlũlũkonĩ witũ, nĩtwakũnĩiwe simũ nĩ ovisi wa ũvonge. Nĩwĩsĩ twakũlilw’e ata? ‘No mwĩtĩkĩle kũtũmwa mũthyũlũlũko wĩ Nepal?’

Neekũlasya asyai makwa meĩw’a ata mamanya kana nĩendete kũndũ kũasa. Kwoou nĩnamakũnĩie simũ. Tata nĩwe wamyosie, na ĩla namũtavisye ambĩie, “Kũu ũendete kote kũseo.” Kaĩ kyumwa kĩvĩtu mũnyanyae ũmwe aĩ amũnengete ĩvuku yĩneenete ĩũlũ wa Nepal, na nĩwasũanĩaa ũndũ mũndũ ũtonya kwĩw’a mũyo mũno aendete kũtembea kũu!

Nepal yĩ andũ aseo na nĩtwatanĩie kũtavany’a kũu. Ĩndĩ o tũendeee nĩtwakwatie ũathimo ũngĩ. Tweeiwe kana mũthyũlũlũko witũ ũkeethĩawa ũvikĩte Bangladesh. Ĩsu nĩ nthĩ yĩ vakuvĩ mũno, ĩndĩ yĩ kĩvathũkany’o vyũ na Nepal. Ĩla twavika Bangladesh, twatavanasya na nzĩa mbingĩ syĩ kĩvathũkany’o. Myaka ĩtano ĩithela nĩtwatũngiwe Japan, na nĩvo yu tũĩ twĩ o wĩanĩ wa kũthyũlũlũka.

Kũtavany’a Japan, Nepal, na Bangladesh nĩkũmanyĩĩtye maũndũ maingĩ mũno ĩũlũ wa Yeova! Nthĩ isu syonthe syĩ kĩvathũkany’o na syĩ syĩthĩo syĩ kĩvathũkany’o. Na nthĩnĩ wa nthĩ isu syonthe, kĩla mũndũ e kĩvathũkany’o na ũla ũngĩ. Nĩnĩyoneete ũndũ Yeova ũsũvĩaa kĩla mũndũ, akamwĩtĩkĩla, akamũtetheesya, na akamũathima.

Na ngalĩkonĩ ĩ yakwa, Yeova nũngathimĩte ngamũmanya, akanenga wĩa, na akanenga mũũme mũseo. Ngai nũndongoesye ngeka motwi maseo, na yu nĩ na ngwatanĩo nzeo vamwe nake na andũ ma mũsyĩ. Nĩtũngĩaa Yeova mũvea mũno nũndũ nĩwe ũtumĩte nĩthĩwa yu nĩ ndũũ na Mami. Nĩnĩw’aa mũyo mũno nũndũ nĩnatumie ndũũ na Ngai na neew’ana na inyia-akwa.