Mathayo 15:1-39
15 Na ĩndĩ Avalisi na aandĩki kuma Yelusaleme mooka vala ve Yesũ na masya:
2 “Nĩkĩ amanyĩw’a maku mataatĩĩaa syĩthĩo sya andũ ma tene? Kwa ngelekany’o, maithambaa* moko matanamba kũya.”
3 Nake Yesũ amasũngĩa, amea: “Nĩkĩ inyw’ĩ mũleaa kũkwata mĩao ya Ngai nũndũ wa syĩthĩo syenyu?
4 Kwa ngelekany’o, Ngai aisye, ‘Nenga ndaĩa ĩthe waku na inyia waku,’ na ‘Ũla ũmũtavasya naĩ* ĩthe kana inyia nĩoawe.’
5 Ĩndĩ inyw’ĩ mwaasya atĩĩ, ‘Mũndũ o na wĩva ũla ũmwĩaa ĩthe kana inyia: “Kyonthe kĩla nĩ nakyo kĩtonya kũũtethya nĩ kĩndũ kyumĩtw’e kĩthĩwe mũthĩnzĩo kwa Ngai,”
6 ũsu ndaĩle kũmũtethya ĩthe o na vanini.’ Kwondũ wa ũu nĩmwanangĩte mĩao ya Ngai nũndũ wa syĩthĩo syenyu.
7 Inyw’ĩ angangany’a, Isaia nĩwathanie nesa ĩũlũ wenyu yĩla waisye:
8 ‘Andũ aa mandaĩaa na ilomo syoo, ĩndĩ ngoo syoo syĩ vaasa mũno nakwa.
9 Manthaithaa mana, nũndũ mamanyĩasya mĩao ya andũ tayo momanyĩsyo makwa.’”
10 Na eeta ĩkomano vakuvĩ nake na ayĩa atĩĩ: “Ĩthukĩĩsyei na mũikwatya:
11 Mũndũ ndavukaw’a nĩ kĩla kĩlikaa kanyw’anĩ wake, ĩndĩ avukaw’a nĩ kĩla kyumaa kanyw’anĩ wake.”
12 Namo amanyĩw’a mooka kũla ũĩ na mamwĩa: “Nĩwĩsĩ kana Avalisi nĩmalulutĩkiw’e nĩ ndeto ila ũneenie?”
13 Nake amasũngĩa, amea: “Mũtĩ o na wĩva ũla ũtaavandwa nĩ Asa wakwa ũla wĩ ĩtunĩ ũkakũwa.
14 Ekanai namo. Nĩ atongoi ilalinda. Na ĩndĩ ethĩwa kĩlalinda kĩkatongoesya kĩngĩ, elĩ makalika ĩimanĩ.”
15 Na Vetelo amwĩa: “Tũelesye ĩla ngelekany’o.”
16 Nake asya: “Nenyu o na yu mũinesa kwĩthĩwa na ũmanyi?
17 Mũyĩsĩ kana kĩndũ kyonthe kĩla kĩlikaa kanyw’anĩ kĩvĩtĩlaa ĩvu na ĩtina kĩyĩsa kũlika kyoonĩ?
18 Ĩndĩ, kĩndũ kyonthe kĩla kyumaa kanyw’anĩ nĩkyo kĩvukasya mũndũ nũndũ kĩthĩawa kyumĩte ngoonĩ.
19 Kwa ngelekany’o, ngoonĩ nĩ vo vaumaa mosũanĩo mathũku: ũaani, ũthaaa, ũlaalai,* ũng’ei, ũkũsĩ wa ũvũngũ, na numano.
20 Asu nĩmo maũndũ ala mavukasya mũndũ, ĩndĩ mũndũ ndavukaw’a nĩ kũya atathambĩte* moko.”
21 Na Yesũ auma vau na athi kĩsionĩ kya Tile na Sitoni.
22 Na sisya! mũndũ mũka ũmwe Mũvoenike kuma kĩsionĩ kĩu aneena na wasya mũnene, akyasya: “Mwĩaĩi, mbĩw’ĩe tei Mwana wa Ndaviti. Mwĩĩtu wakwa nũkũthĩnw’a mũno nĩ ndaimoni.”
23 Ĩndĩ ndaamũsũngĩa ndeto o na ĩmwe. Na kwoou amanyĩw’a make mambĩĩa kũmũthing’ĩĩsya, makĩmwĩa: “Mũlũngye, nũndũ akwetye kũtũatĩĩa aĩĩte.”
24 Nake asũngĩa: “Ndyaatũmwa kwa mũndũ ũngĩ o na wĩva ate o kwa malondu ala maaie ma nyũmba ya Isilaeli.”
25 Ĩndĩ mũndũ mũka ũsu amũthengeea, amũkumanĩa, na amwĩa: “Mwĩaĩi, ndethye!”
26 Nake amũsũngĩa, amwĩa: “Ti ũseo kwosa mũkate wa syana na kwĩkĩsya tũkitĩ.”
27 Nake amwĩa: “Nĩ w’o Mwĩaĩi, ĩndĩ o na tũkitĩ nĩtũĩsaa tũtilĩkango tũla twavalũka kuma mesanĩ ya ene matw’o.”
28 Nake Yesũ amũsũngĩa, amwĩa: “Mũndũ mũka, mũĩkĩĩo waku nĩ mũnene, eka kwĩthĩwe kwaku o ũndũ ũkwenda.” Na mwĩĩtu wake avow’a saanĩ o ũsu.
29 Yesũ auma vau athi vakuvĩ na Ũkanga wa Kalilii, na ambata kĩĩmanĩ ekala vau.
30 Na ĩkomano ĩnene yooka vala ũĩ na yamũetee andũ ala maĩ syonze, au mamutha, ilalinda, ala mataneenaa, na angĩ aingĩ, na mamaia maaũnĩ make na amavosya.
31 Na ĩkomano yaseng’a mũno yĩla yoonie ala mataneenaa maineena, ala au mamutha me aima, ala maĩ syonze maikinya, na ala maĩ ilalinda mayona, na mamũtaĩa Ngai wa Isilaeli.
32 Na Yesũ eeta amanyĩw’a make, na amea: “Nĩngũmew’ĩa tei andũ aa nũndũ yu mekalĩte nakwa mĩthenya ĩtatũ mateũya kĩndũ. Na ndikwenda kũmombũũkya mayĩw’a nzaa* maikese kũvalũkĩla nzĩanĩ.”
33 Ĩndĩ, amanyĩw’a make mamũkũlya: “Twĩumya va mĩkate ĩtonya kwĩanĩa ĩkomano yĩĩ yonthe na vandũ vaa vaitwĩe andũ?”
34 Na Yesũ amakũlya: “Mwĩ na mĩkate yĩana ata?” Namo mamwĩa: “Twĩ na mĩkate mũonza na tũkũyũ tũte twingĩ.”
35 Na ĩtina wa kwĩa ĩkomano yĩkale nthĩ,
36 oosa ĩla mĩkate mũonza na tũla tũkũyũ, na ĩtina wa kũtũnga mũvea, atilanga na ambĩĩa kũmanenga amanyĩw’a, namo amanyĩw’a manenga ĩkomano.
37 Na andũ onthe maya mavũna, na moosany’a tũlungu tũla twatialĩte mausũsya ikavũ mũonza nene.*
38 Ala maĩe maĩ aũme 4,000, vate kũtala aka na syana nini.
39 Ĩtina wa kũmbũũkya ĩkomano, nĩwalikile ĩsiwanĩ* na athi kĩsionĩ kya Makatani.
Maelesyo ma kwongeleela
^ Ũu nĩ kwasya, mayĩtheasya kwosana na Mĩao.
^ Kana “Ũla ũmũumaa.”
^ Wingĩ wa ndeto ya Kĩkiliki por·neiʹa. Sisya Maelesyo ma Ndeto.
^ Ũu nĩ kwasya, kũlea kwĩthesya kwosana na Mĩao.
^ Kana “matĩĩĩte kũya.”
^ Kana “itonya kũkua syĩndũ mbingĩ.”
^ Kana “ĩtalũnĩ.”
