Timootee takayaɣ naalɛ ñɩŋga 2:1-26
2 Pʋyɔɔ lɛ, ña man-pɩɣa,+ wolo pɩ-yɔɔ nɛ ŋhiɣ ɖoŋ lootiye nɖɩ ɖɩwɛ Krɩstʋ Yesu taa yɔ ɖɩ-taa;
2 nɛ tɔm ndʋ ŋnɩ mɔn-cɔlɔ, ndʋ aseɣɖe tɩnaa sakɩyɛ tisi tɩ-yɔɔ yɔ,+ ɖʋzɩ-tʋ abalaa siɣsiɣ tɩnaa nesi tɛɛ, mba pakaɣ mʋnʋʋ camɩyɛ se pawɩlɩ-tʋ lalaa yɔ.
3 Ɛzɩ Krɩstʋ Yesu sɔɔja kɩbanʋ yɔ,+ tisi nɛ ŋtɔɔ kʋñɔŋ kaɖɛ taa.+
4 Ɛyʋ weyi ɛkɛ sɔɔja yɔ, ɛɛɖʋʋ ɛ-nɔɔ* wezuu caɣʋ taa tadɩyɛ labʋ taa,* se pɩsa nɛ ɛ-tɔm kɛdɩnɩ weyi ɛmʋ-ɩ sɔɔjatʋ yɔ.
5 Nɛ halɩ hola aleɣya taa maɣmaɣ, weyi ɛlakɩ-yɛ yɔ, ye ɛtɩlabɩ-yɛ ɛzɩ paɣtʋ pɔzʋʋ yɔ, paapaŋɩ-ɩ wabɩtʋ hulaɣ.+
6 Haɖʋ weyi ɛlakɩ tʋmɩyɛ nɛ kpekpeka yɔ, ɛnʋ pɩwɛɛ se ɛcalɩ tɔɔʋ ɛ-hayɩm taa pee.
7 Maɣzɩ tɔm ndʋ mɔyɔɔdʋʋ yɔ tɩ-yɔɔ paa ɛzɩmtaa; Kɩbaɣlʋ kaɣ-ŋ haʋ tɔm taa nɩʋ lɛɣtʋ* pɩtɩŋa pɩ-taa.
8 Tɔzɩ se paafezi Yesu Krɩstʋ nɛ sɩɖaa taa+ nɛ ɛɛkɛ Daviid lʋlʋʋ* taa tʋ,+ ɛzɩ tɔm kɩbandʋ ndʋ monsusuu yɔ tɩwɩlʋʋ yɔ,+
9 ndʋ tɩ-yɔɔ menɖiɣni tɔɔʋ kʋñɔŋ nɛ paɖʋ-m salaka ɛzɩ kɩwɛɛkɩm laɖʋ yɔ.+ Paa mbʋ yɔ, patɩhɔkɩ Ɛsɔ tɔm.+
10 Pʋyɔɔ lɛ, mowoki pɩ-yɔɔ nɛ mɔnɖɔkɩ ma-laŋɩyɛ pɩtɩŋa pɩ-taa mba palɩzaa yɔ pɔ-yɔɔ,+ se pɩsa nɛ mba ɖɔɖɔ pehiɣ ñʋʋ yabʋ mbʋ pɩtɩŋnɩ Krɩstʋ Yesu yɔɔ nɛ pɩwɛɛ yɔ, pɩkpɛndɩnɩ tamtam samtʋ.
11 Tɔm tʋnɛ tɩmʋnaa se pataa-tʋ liu: Toovenim taa lɛ, ye ɖa nɛ ɩ ɖɩkpɛndaa nɛ ɖɩsɩ yɔ, ɖa nɛ ɩ ɖɩkaɣ kpɛndʋʋ ɖɔɖɔ nɛ ɖɩwɛɛ wezuu;+
12 ye ɖiwobi pɩ-yɔɔ nɛ ɖɩɖɔkɩ ɖa-laŋa yɔ, ɖa nɛ ɩ ɖɩkaɣ kpɛndʋʋ ɖɔɖɔ nɛ ɖɩtɔɔ kewiyitu;+ ye ɖikizi-i yɔ, ɛkaɣ-ɖʋ kizuu ɖɔɖɔ;+
13 ye ɖɩfɛyɩ siɣsiɣ yɔ, ɛnʋ ñɛwɛɣ siɣsiɣ mbʋ, mbʋ pʋyɔɔ yɔ ɛɛpɩzɩɣ nɛ ekizi ɛ-tɩ.
14 Wɛɛ nɛ ŋtɔzʋʋ-wɛ tɔm ndʋ, nɛ ŋwɩlɩɣ-wɛ* Ɛsɔ ɛsɩndaa se pataayoo tɔm pee yɔɔ, pɩkɛ mbʋ pɩɩwazɩɣ pʋyʋ paa ññɩɩ yɔ; mbʋ pʋyɔɔ yɔ pɩkɔŋnɩ kaɖɛ* mba pewelisiɣ yɔ.
15 La mbʋ payɩ ŋpɩzɩɣ yɔ nɛ ŋwɩlɩ ña-tɩ ɛzɩ weyi ɛ-tɔm kɛdɩnɩ Ɛsɔ yɔ, ɛzɩ tʋmlaɖʋ weyi fɛyɛ ɛɛkpaɣ-ɩ nɛ pʋyʋ yɔ, weyi ɛwɩlɩɣ toovenim tɔm camɩyɛ yɔ.+
16 Ɛlɛ kizi tɔm ndʋ tɩɩwazɩɣ pʋyʋ nɛ tipisiɣ wondu kiɖeɖetu yɔ,+ mbʋ pʋyɔɔ yɔ tɩkaɣ yebu nɛ Ɛsɔ yɔɔ kaañamtʋ wɛnʋʋ ɖɔɔ nɛ pɩkɩlɩ;
17 nɛ pɔ-tɔm kaɣ yɛlʋʋ ɛzɩ kɩjɩkpʋʋ ŋgʋ kɩtɛzɩɣ walʋʋ yɔ. Pa-taa kɛlɛ Imenee nɛ Filɛɛtɩ.+
18 Ɛyaa mba, peyebi toovenim, nɛ pɔtɔŋ se pɛtɛm sɩɖaa fezuu,+ nɛ pɛwɛɛ nɛ paɖʋzʋʋ nabɛyɛ tisuu.
19 Paa mbʋ yɔ, Ɛsɔ tɛ tigiɖe nɖɩ ɖɩwɛ ɖoŋ yɔ ɖɩsɩŋ camɩyɛ, nɛ ɖɩwɛnɩ mayaɣ kanɛ: «Yehowa* sɩm mba pɛkɛ ɛ-ñɩma yɔ,»+ nɛ: «Weyi ɛyaɣ Yehowa* hɩɖɛ yɔ,+ ekizi mbʋ pɩfɛyɩ siɣsiɣ yɔ.»
20 Piyele nɛ ɖɩɣa sɔsɔɔ taa lɛ, pɩtɩkɛ sika nɛ liidiye wondu* ɖeke wɛna; ɛlɛ ɖasɩ nɛ cʋʋ wondu ɖɔɖɔ wɛɛ, nɛ palakɩnɩ natʋyʋ mbʋ pɩwɛ wazaɣ siŋŋ yɔ, ɛlɛ lɛɛtʋ lɛ palakɩnɩ-tʋ mbʋ pɩfɛyɩ wazaɣ siŋŋ yɔ.
21 Pʋyɔɔ lɛ, ye nɔɔyʋ eposini kɛdɛzaɣ ñɩndʋ yɔ, ɛkaɣ kɛʋ wonuu* ŋgʋ palakɩnɩ mbʋ pɩwɛ wazaɣ siŋŋ yɔ, ɛkaɣ wɛʋ kele kele, ɛkaɣ wɛʋ ɛ-tʋ wazaɣ, ɛkaɣ kɛʋ weyi pɔñɔɔzɩ-ɩ se ɛla paa tʋmɩyɛ kɩbanɖɛ nɖɩ yɔ.
22 Pʋyɔɔ lɛ, se evebitu kɔɖɛyɩ; ɛlɛ ñɩnɩ siɣsiɣ wɛtʋ, tisuu, sɔɔlɩm, laŋhɛzɩyɛ, ña nɛ mba payaɣ Kɩbaɣlʋ nɛ laŋɩyɛ kele kele ñɩnɖɛ yɔ.
23 Pɩtasɩ lɛ, kizi kɩmɛlɛndʋ nɛ kɩɩsɩŋɩyɩtʋ tɔm hɔm,+ ŋsɩm mbʋ se pɩkɔŋnɩ yoŋ.
24 Mbʋ pʋyɔɔ yɔ, pɩtɩmʋna se Kɩbaɣlʋ yom eyoo; ɛlɛ pɩmʋnaa se ɛla ɛyaa tɩŋa camɩyɛ,+ ɛtɩlɩ tɔm wɩlʋʋ, ɛɖɔkɩ ɛ-tɩ alɩwaatʋ ndʋ paɖʋʋ-ɩ ɖɩwɩzɩyɛ yɔ,+
25 ɛwɩlɩ tɔm mba pakaɖɩɣnɩ-ɩ yɔ nɛ hɛɛɛ wɛtʋ.+ Pʋtɔma yɔ Ɛsɔ yeki nɛ pekpiɖi pa-kɩwɛɛkɩm yɔɔ* nɛ pɛwɛɛnɩ toovenim tɛ sɩmtʋ siŋŋ,+
26 nɛ pa-maɣzɩm pɩzɩɣ pife nɛ palɩɩ Eleeu kpaca taa; mbʋ pʋyɔɔ yɔ ɛɛkpa-wɛ nɛ pɛ-ɛsa se pala ɛ-sɔɔlɩm.+
Pɩ-tɛɛ tɔm
^ Piye piye, «ɛɛsʋzʋʋ ɛ-tɩ.»
^ Pɩpɩzɩɣ pɩkɛ, «ɛɛɖʋʋ ɛ-nɔɔ paa evemiye nɖɩ ɖɩ-tʋma labʋ taa.»
^ Yaa «kaɣ-ŋ haʋ lɛɣtʋ.»
^ Piye piye, «ɖomaɣ.»
^ Piye piye, «ŋlɩzɩɣ-wɛ aseɣɖe tete.»
^ Yaa «pɩɖɩzɩɣ.»
^ Cɔnɩ Tɔm kɩsɔzɩtʋ A5.
^ Cɔnɩ Tɔm kɩsɔzɩtʋ A5.
^ Yaa «ñanzɩ.»
^ Yaa «ñanaɣ.»
^ Yaa «nɛ pɛlɛɣzɩ pa-lɩmaɣza.»
