Izaayii 19:1-25
19 Tɔm ndʋ pɔyɔɔdɩ Ejipiti yɔɔ yɔ:+
Ɩna! Yehowa caɣ ɛsɔmɩnʋʋ ŋgʋ kiseɣ lɛɛ lɛɛ yɔ kɩ-yɔɔ nɛ eɖiɣni sʋʋ Ejipiti taa.
Ejipiti ɛsɔnaa mba pɛfɛyɩ wazaɣ yɔ, pakaɣ seluu ɛ-ɛsɩndaa;+Nɛ Ejipiti mba laŋa kaɣ yoluu.
2 «Mankaɣ seɣtuu Ejipiti mba nɛ pakʋyɩ ɖama yɔɔ,Nɛ pakaɣ ɖama yonuu,Paa weyi ɛkaɣ yonuu e-koobu nɛ ɛ-cɔlɔ tʋ,Tɛtʋ kaɣ yonuu tɛtʋ lɛɛtʋ, kewiyaɣ kaɣ yonuu kewiyaɣ lɛɛka.
3 Nɛ Ejipiti mba maɣzɩm taa kaɣ siduu,Nɛ mankaɣ siduu ɖʋtʋ ndʋ palaba yɔ tɩ-taa.+
Pakaɣ pɩsɩnʋʋ ɛsɔnaa mba pɛfɛyɩ wazaɣ yɔ pɔ-yɔɔ,Pakaɣ pɩsɩnʋʋ fadɩŋ hɔkɩyaa yɔɔ nɛ mba pasʋzʋʋ nɛ pɔyɔɔdʋʋnɩ sɩɖaa yɔ pɔ-yɔɔ nɛ tɩyaa mba pɔyɔɔdʋʋ cee wayɩ tɔm yɔ pɔ-yɔɔ.+
4 Mankaɣ Ejipiti ɖʋzʋʋ ñʋʋdʋ weyi ɛ-tɔm wɛ kaɖɛ yɔ e-nesi taa,Nɛ wiyaʋ weyi ɛ-tɔm wɛ kaɖɛ yɔ, ɛkaɣ tɔɔʋ kewiyitu pɔ-yɔɔ;»+ Kɩbaɣlʋ toovenim tʋ, yoyaa tɛ Yehowa yɔɔdʋʋna.
5 Teŋgu taa lɩm kaɣ sɔʋ,Nɛ pɔɔ kaɣ sɔʋ nɛ ka-taa wɩlɩ waɣwaɣ.+
6 Nɛ pɔsɩ kaɣ lɩʋ sɔŋ siŋŋ;Ejipiti taa Niili lɔɔŋ taa lɩm kaɣ pasʋʋ nɛ pɩsɔɔ.
Kañɩŋgbayɩsɩ nɛ ñɩtʋ kɩɖaɣlɩtʋ pakaɣ ɖazʋʋ.+
7 Mbʋ mbʋ pɩñɔ Niili Pɔɔ nɔɔ, ɖenɖe Niili sʋʋ teŋgu taa yɔ,Nɛ tɛtʋ ndʋ tɩ-yɔɔ payɩ poɖu ɖomaɣ Niili nɔɔ yɔ+ pɩkaɣ wɩlʋʋ.+
Helim kaɣ-pʋ kpaɣʋ nɛ pɩɖɛna, nɛ pɩɩkaɣ tasʋʋ wɛʋ.
8 Nɛ kpakpasɩ kpayaa kaɣ caɣʋ kʋñɔwiye,Mba pɔlɔʋ kolasɩ Niili taa yɔ, pakaɣ peenduu;Nɛ mba pɔlɔʋ pe-piyiŋ lɩm taa yɔ, paakaɣ tasʋʋ ɖɔʋ.
9 Mba palakɩnɩ tʋmɩyɛ lɛɛ pɩsatʋ ndʋ peseɣtaa yɔ+Nɛ mba patɩŋɩɣnɩ wonuu ŋgʋ palʋʋnɩ pɩsaŋ yɔ kɩ-yɔɔ nɛ palʋʋ pɩsaŋ kʋhʋlʋmɩŋ yɔ, fɛyɛ kaɣ-wɛ kpaʋ.
10 Pakaɣ tɔyɩtʋʋ Ejipiti pɩsaŋ lʋyaa;Abaa laɖaa tɩŋa kaɣ wɛʋ laŋwɛɛkɩyɛ taa.
11 Zowaanɩ+ awumbiya kɛ kɩmɛlɛmɩŋ.
Farawɔɔ lɔŋsɩnɖaa mba pakpaɖaa yɔ, patasɩɣ kɩmɛlɛndʋ lɔŋ.+
Ɛzɩma ɩpɩzɩɣ nɛ iheyi Farawɔɔ se:
«Mɛnkɛ lɔŋsɩnɖaa lʋlʋʋ taa tʋ,Caanaʋ taa awiya lʋlʋʋ taa tʋ»?
12 Ye mbʋ, le ñɔ-lɔŋsɩnɖaa wɛɛ?+
Yele nɛ peheyi-ŋ, ye pasɩm lɩmaɣza wena yoyaa tɛ Yehowa kpaɣ Ejipiti yɔɔ yɔ.
13 Zowaanɩ awumbiya labɩ kɩmɛlɛndʋ lakasɩ;Pɛcɛtɩ Nof*+ awumbiya;Ki-cejewe ñʋndɩnaa yeba nɛ Ejipiti le.
14 Yehowa pɩyɩ kɩ-yɔɔ fezuu ŋgʋ kisidiɣ kɩ-ñʋʋ taa yɔ;+Nɛ peyeba nɛ Ejipiti le mbʋ payɩ kɩlakɩ yɔ pɩ-taa,Ɛzɩ weyi sʋlʋm kʋʋ-ɩ nɛ ɛcɛŋɛsɩɣ ɛ-tɔtʋ taa yɔ.
15 Nɛ Ejipiti ɛɛkaɣ wɛnʋʋ tʋmɩyɛ naɖɩyɛ se kɩla,Paa pɩtɩɩkɛ ñʋʋ yaa suu, mbʋ pɩñɔwa yɔ yaa ñɩtʋ kɩɖaɣlɩtʋ* yɔ.
16 Kɩyakʋ ŋgʋ ki-wiye lɛ, nesi nzɩ yoyaa tɛ Yehowa kpazɩɣ Ejipiti yɔɔ se ɛhɔ kɩ-nɩŋgbaŋʋʋ yɔ sɩ-yɔɔ lɛ, kɩkaɣ pɩsʋʋ ɛzɩ halaa yɔ, kɩkaɣ seluu nɛ sɔɔndʋ kaɣ-kʋ kpaʋ.+
17 Nɛ Yuuda ɛjaɖɛ kaɣ pɩsʋʋ mbʋ pɩkpaɣ Ejipiti sɔɔndʋ siŋŋ yɔ. Sɔɔndʋ sɔsɔtʋ kaɣ-wɛ kpaʋ alɩwaatʋ ndʋ payaɣ ɖɩ-hɩɖɛ yɔ, lɩmaɣzɩyɛ nɖɩ yoyaa tɛ Yehowa kpaɣ pɔ-yɔɔ yɔ ɖɩ-yɔɔ.+
18 Kɩyakʋ ŋgʋ ki-wiye lɛ, tɛtʋ 5 kaɣ wɛʋ Ejipiti ɛjaɖɛ taa nɛ tɩyɔɔdʋʋ Kanaŋ kʋnʋŋ+ nɛ tiɖuki se tɩwɛɣ siɣsiɣ yoyaa tɛ Yehowa ɛsɩndaa. Pakaɣ yaʋ tɛtʋ ndʋ tɩ-taa kʋɖʋmtʋ se Yɔkʋʋ Tɛtʋ.
19 Kɩyakʋ ŋgʋ ki-wiye lɛ, altaaru nakʋyʋ kaɣ wɛʋ Ejipiti ɛjaɖɛ hɛkʋ taa se paɖʋnɩ Yehowa hɩɖɛ, nɛ tilimiye naɖɩyɛ kaɣ wɛʋ kɩ-kamaɣ yɔɔ se paɖʋnɩ Yehowa hɩɖɛ.
20 Pɩkaɣ kɛʋ yʋsaɣ nɛ aseɣɖe yoyaa tɛ Yehowa Ejipiti ɛjaɖɛ taa; mbʋ pʋyɔɔ yɔ pakaɣ mabʋ kubusi se Yehowa ɛsɩnɩ-wɛ, mba panazɩɣ-wɛ yɔ pɔ-yɔɔ, nɛ ɛkaɣ-wɛ tiyinuu ñʋʋ yaɖʋ nɔɔyʋ, ñʋʋ yaɖʋ sɔsɔ nɔɔyʋ, nɛ ɛkaɣ pa-ñʋʋ yabʋ.
21 Nɛ Yehowa kaɣ wɩlʋʋ Ejipiti mba weyi ɛkɛnaa yɔ, nɛ Ejipiti mba kaɣ tɩlʋʋ Yehowa kɩyakʋ ŋgʋ ki-wiye, nɛ pakaɣ laʋ kɩlaŋ nɛ pala kʋjɔŋ nɛ poɖuu Yehowa ɛsɩndaa nɛ pɔɖɔ ɖuutu ndʋ tɩ-yɔɔ.
22 Yehowa kaɣ hɔm Ejipiti nɩŋgbaŋʋʋ,+ ɛkaɣ hɔm kɩ-nɩŋgbaŋʋʋ nɛ ɛwaa-kʋ, nɛ pakaɣ pɩsʋʋ Yehowa cɔlɔ, nɛ ɛkaɣ welisuu pe-tenduu nɛ ɛwaa-wɛ.
23 Kɩyakʋ ŋgʋ ki-wiye lɛ, nʋmɔʋ sɔsɔʋ+ nakʋyʋ kaɣ wɛʋ nɛ kɩlɩɣnɩ Ejipiti nɛ kiwoki Asiirii. Ðɩnɛ ɛlɛ Asiirii kaɣ wobu Ejipiti, nɛ Ejipiti kaɣ wobu Asiirii, nɛ Ejipiti nɛ Asiirii pakaɣ kpɛndʋʋ nɛ pɛsɛɛ Ɛsɔ.
24 Kɩyakʋ ŋgʋ ki-wiye lɛ, Izrayɛɛlɩ kaɣ kɛʋ tozo tʋ, ɛkaɣ kpɛndʋʋ Ejipiti nɛ Asiirii pɔ-yɔɔ;+ pɩkaɣ kɛʋ wazaɣ tɛtʋ hɛkʋ taa,
25 mbʋ pʋyɔɔ yɔ yoyaa tɛ Yehowa tɛŋ-wɛ wazʋʋ nɛ ɛyɔɔdɩ se: «Pawazɩ man-samaɣ, Ejipiti; nɛ me-nesi tɛɛ tʋmɩyɛ, Asiirii; nɛ ma-ñɩm, Izrayɛɛlɩ.»+
