Izaayii 43:1-28
43 Lɛɛlɛɛyɔ, tɔm tʋnɛ Yehowa yɔɔdʋʋ,Ña-Lɩzɩyʋ, Oo Yakɔɔb, Weyi ɛma-ŋ yɔ, Oo Izrayɛɛlɩ:+
«Sɔɔndʋ ɛtaakpa-ŋ, mbʋ pʋyɔɔ yɔ manɖaɣnɩ-ŋ yabʋ.+
Maya-ŋ nɛ ña-hɩɖɛ.
Ŋkɛ man-pʋyʋ.
2 Alɩwaatʋ ndʋ ŋtɛzɩɣ lɩm yɔ, mankaɣ wɛʋ ñɔ-cɔlɔ,+Nɛ ŋŋtɛzɩɣ pɔsɩ lɛ, sɩɩkaɣ ñɔ-yɔɔ wadʋʋ.+
Alɩwaatʋ ndʋ ŋtɩŋɩɣ miŋ taa yɔ, ɩɩkaɣ-ŋ kou,Yaa miŋ nzʋlʋmɩyɛ ɛɛkaɣ-ŋ kou.
3 Mbʋ pʋyɔɔ yɔ mɛnkɛ Yehowa, ñɛ-Ɛsɔ,Izrayɛɛlɩ tɛ Kiɖeɖeu, ña-Ñʋʋ Yaɖʋ.
Mɛncɛlɩ Ejipiti se kɩkɛ kɩhɛyʋʋ pʋ-ñʋʋ taa ñɔ-yɔɔ,Mankpaɣ Etiyoopii nɛ Seba nɛ mɛncɛlɩ ñɔ-yɔɔ.
4 Mbʋ pʋyɔɔ yɔ ŋpɩsɩ mbʋ pɩmʋ ñɩm mɛ-ɛsɩndaa yɔ,+Paɖʋ-ŋ hɩɖɛ, nɛ mɔnsɔɔlɩ-ŋ.+
Pʋyɔɔ lɛ mankaɣ cɛlʋʋ samaɣ ño-lone taaNɛ mankpaɣ ajɛɛ nɛ mɛncɛlɩ ñe-wezuu* yɔɔ.
5 Sɔɔndʋ ɛtaakpa-ŋ, mbʋ pʋyɔɔ yɔ mɛwɛ ñɔ-cɔlɔ.+
Mankaɣ kpaɣʋ ña-lʋlʋʋ taa mba* nɛ wɩsɩ ɖɩlɩyɛ taa nɛ mɔnkɔnaNɛ mankaɣ-ŋ ketuu nɛ wɩsɩ ɖɩɖʋyɛ taa nɛ menkpeɣli.+
6 Mankaɣ heyuu hayo kiŋ se: “Yele-wɛ!”+
Nɛ meheyi hadɛ kiŋ se: “Taaɖɔkɩ-wɛ.
Kpaɣ man-pɩyalaa nɛ ɖooo poliŋ taa, nɛ ŋkpaɣ mɛn-pɛlaa nɛ tɛtʋ kamasɩ yɔɔ nɛ ŋkɔna,+
7 Mba payɩ payaɣ-wɛ nɛ ma-hɩɖɛ+Nɛ malɩzɩ-wɛ* ma-maɣmaɣ man-samtʋ yɔɔ yɔ,Mba mama-wɛ nɛ malabɩ-wɛ yɔ.”+
8 Ɩlɩzɩ awayɩ samaɣ ŋga kayʋlʋmaa, paa kɛwɛnɩ ɛsa yɔ,Nɛ ŋga katamaa, paa kɛwɛnɩ nɩŋgbaaŋ yɔ.+
9 Ajɛɛ tɩŋa ikpeɣli lone kʋɖʋmɖɩyɛ taa,Nɛ ɛyaa samasɩ ikpeɣli ɖama.+
Pa-taa anɩ pɩzɩɣ nɛ ɛyɔɔdɩ tɔm tʋnɛ?
Yaa ɛzɩ papɩzɩɣ peyele nɛ ɖɩnɩɩ kajalaɣ tɔm* na?+
Pɔkɔnɩ pa-aseɣɖe tɩnaa nɛ pawɩlɩ se pɛwɛnɩ toovenim,Yaa pewelisi nɛ pɔyɔɔdɩ se: “Pɩkɛ toovenim!”»+
10 «Ɩkɛ ma-aseɣɖe tɩnaa,+Ɛɛɛ, ma-lɩmɖʋyʋ weyi malɩzaa yɔ,+Se pɩsa nɛ ɩtɩlɩ nɛ ɩwɛɛnɩ tisuu mɔ-yɔɔ*Nɛ ɩnɩɩ pʋ-tɔbʋʋ se mɛnkɛ kʋɖʋm ɛnʋ.+
Ɛsɔ nɔɔyʋ tɩlɛyɩ-m wɛʋ,Nɛ ma-wayɩ lɛ nɔɔyʋ fɛyɩ,»+ Yehowa yɔɔdʋʋna.
11 «Ma, mɛkɛnɩ Yehowa;+ nɛ ma-wayɩ lɛ, ñʋʋ yaɖʋ nɔɔyʋ fɛyɩ.»+
12 «Mɛkɛnɩ Weyi ɛyɔɔdaa nɛ ɛya ñʋʋ nɛ eyele nɛ patɩlɩ,Alɩwaatʋ ndʋ agbaaɣdaa ɛsɔ nɔɔyʋ taawɛɛ mɩ-hɛkʋ taa yɔ.+
Pʋyɔɔ lɛ, mɩkɛnɩ ma-aseɣɖe tɩnaa, nɛ mɛkɛnɩ Ɛsɔ,» Yehowa yɔɔdʋʋna.+
13 «Pɩtasɩ lɛ, mɛnkɛ kʋɖʋm ɛnʋ paa ɛzɩmtaa;+Nɛ nɔɔyʋ ɛɛpɩzɩɣ nɛ ɛlɛɣ nabʋyʋ me-nesi taa.+
Alɩwaatʋ ndʋ malakɩ nabʋyʋ yɔ, apɩzɩɣ nɛ ekizi se mantaalabɩ-pʋ?»+
14 Tɔm tʋnɛ Yehowa yɔɔdʋʋ, Weyi ɛɖaɣnɩ-mɩ yabʋ yɔ,+ Izrayɛɛlɩ tɛ Kiɖeɖeu:+
«Mɩ-yɔɔ lɛ, mankaɣ-wɛ tiyuu Babilɔɔnɩ nɛ petisi ñɩɣtʋ ndʋ paɖɩkɩnɩ nɔnɔsɩ yɔ tɩ-tɩŋa,+Nɛ Kalɩdee mba kaɣ mabʋ kʋñɔŋ kubusi pɛ-mɛlɛnaa taa.+
15 Mɛkɛnɩ Yehowa, mi-Kiɖeɖeu,+ Izrayɛɛlɩ Lɩzɩyʋ,+ mi-Wiyaʋ.»+
16 Tɔm tʋnɛ Yehowa yɔɔdʋʋ,Weyi ɛɖʋʋ nʋmɔʋ teŋgu taa yɔ,Nɛ ɛɖʋʋ nʋmɔʋ halɩ pɩkpɛndɩnɩ lɩm mbʋ pɩwɛ hoɖe yɔ, pɩ-taa yɔ;+
17 Weyi ɛlɩɣnɩ you kɛɛkɛɛ nɛ kpaŋnʋ,+Sɔɔjanaa nɛ sɔdɩŋ ɖoŋ tɩnaa yɔ:
«Pakaɣ hɩnʋʋ nɛ paakaɣ kʋyʋʋ.+
Pakaɣ ɖɩm, pakaɣ-wɛ ɖɩzʋʋ ɛzɩ nimaɣ ŋga keɖiɣni mʋʋ miŋ yɔ.»
18 «Ɩtaatɔzɩ mbʋ pɩlabɩ ɖooo lɔŋ nɛ pɩɖɛɛ yɔ pɩ-yɔɔ,Nɛ ɩtaaka mɩ-lɩmaɣza caanaʋ yɔɔ.
19 Ɩna! Menɖiɣni labʋ pʋyʋ kɩfam;+Halɩ lɛɛlɛɛyɔ pɩtɛm paɣzʋʋ lɩʋ.
Ɩɩnaɣ-pʋ yaa we?
Mankaɣ ɖʋʋ nʋmɔʋ kañɩmbusuu taa+Nɛ manɖʋ pɔsɩ kañɩmbusuu taa.+
20 Tɛtɛgbɩna wena awɛ ñɩtʋ taa yɔ akaɣ-m ɖʋʋ hɩɖɛ,Tɛyɛ hasɩ nɛ taataanaa,Mbʋ pʋyɔɔ yɔ meyeki nɛ lɩm wɛɛ kañɩmbusuu taa,Nɛ pɔsɩ wɛɛ kañɩmbusuu taa,+Se man-samaɣ, ŋga malɩzaa yɔ+ kɔñɔɔ.
21 Samaɣ ŋga malɩzɩ man-tɩSe kosusi man-samtʋ yɔ.+
22 Ɛlɛ ŋtɩya-m, Oo Yakɔɔb,+Mbʋ pʋyɔɔ yɔ mɔn-tɔm nɩ-ŋ, Oo Izrayɛɛlɩ.+
23 Ŋtɩkɔnɩ-m heŋ se ŋlaa ña-kɩlaŋ kɩñaɣzɩŋNɛ ŋtɩsamɩ-m nɛ ña-kɩlaŋ.
Mantɩkpa-ŋ nɛ ɖoŋ se ŋkɔnɩ-m kʋjɔʋ nakʋyʋ,Nɛ mantɩpɔzɩ-ŋ ɖɔɖɔ tɩlaaɖɩ kʋhʋlʋmʋʋ se meyele nɛ pɩnɩ-ŋ.+
24 Ŋtɩyabɩ-m sɔzɩŋ kañɩŋgbayaɣ nɛ ñe-liidiye,Nɛ ŋtiyele nɛ mañɩɣzɩ ña-kɩlaŋ num.+
Ɛlɛ ŋyeba nɛ ña-kɩwɛɛkɩm pɩsɩ-m sʋʋtʋNɛ ŋyele nɛ ña-kɩdɛkɛdɩm nɩ-m.+
25 Ma-hɩɖɛ yɔɔ lɛ,+ mohuuzuuni ña-kɩdɛkɛdɩm* yɔɔ,+Nɛ maakaɣ tɔzʋʋ ña-kɩwɛɛkɩm yɔɔ.+
26 Tɔzɩ-m; ɖa-taa paa weyi ɛyɔɔdɩ mbʋ piyeba nɛ ɛyaa lɛlʋ tɔm yɔ;Yɔɔdɩ ñɔ-tɔm nɛ pɩwɩlɩ se ŋwɛnɩ toovenim.
27 Ñɔ-cɔzɔ kajalaɣ ñɩnʋ labɩ kɩwɛɛkɩm,Nɛ ña-maɣmaɣ ñɔ-tɔm ɖɔkɩyaa* kaɖɩnɩ-m.+
28 Pʋyɔɔ lɛ, mankaɣ pisuu lone kiɖeɖeye taa awumbiya,Nɛ mankaɣ cɛlʋʋ Yakɔɔb se paɖɩzɩ-ɩNɛ meyele nɛ patʋʋ Izrayɛɛlɩ.+
Pɩ-tɛɛ tɔm
^ Yaa «ña-kalɩzaɣ.»
^ Piye piye, «ño-ɖomaɣ.»
^ Yaa «mama-wɛ.»
^ Pɩkɛɣnɩ kajalaɣ tɔm ndʋ tɩkaɣ labʋ cee wayɩ yɔ.
^ Yaa «nɛ ɩta-m liu.»
^ Yaa «ña-kaañamtʋ lakasɩ.»
^ Pɩkɛɣnɩ Paɣtʋ wɩlɩyaa.
