Roma mba 5:1-21
5 Mbʋ yebina nɛ ɛzɩma paya-ɖʋ lɛɛlɛɛyɔ se siɣsiɣ tɩnaa tisuu yɔɔ yɔ pʋyɔɔ lɛ,+ ɖiyele nɛ laŋhɛzɩyɛ wɛɛ* ɖa nɛ Ɛsɔ ɖɛ-hɛkʋ taa pɩtɩŋnɩ ɖa-Kɩbaɣlʋ Yesu Krɩstʋ yɔɔ,+
2 ɛnʋ weyi pɩtɩŋnɩ ɛ-yɔɔ nɛ ɖa ɖɔɖɔ ɖihiɣ lootiye ɖɩnɛ, nɖɩ ɖɩ-taa ɖɩwɛ lɛɛlɛɛyɔ pɩtɩŋnɩ tisuu yɔɔ yɔ;+ iyele ɖɔɖɔ nɛ ɖa-taa la leleŋ* lidaʋ ŋgʋ ɖɩwɛna se Ɛsɔ kaɣ-ɖʋ kpazʋʋ lone sɔsɔɖɛ taa* yɔ kɩ-yɔɔ.
3 Pɩtɩkɛ pi-ɖeke, ɛlɛ iyele nɛ ɖa-taa la leleŋ* alɩwaatʋ ndʋ ɖɩwɛɣ kʋñɔmɩŋ taa yɔ,+ mbʋ pʋyɔɔ yɔ ɖɩnawa se kʋñɔŋ yeki se ɖɩwɛɛnɩ laŋɩyɛ ɖɔkʋʋ;+
4 laŋɩyɛ ɖɔkʋʋ ñeyeki se ɖɩwɛɛnɩ wɛtʋ ndʋ tɩkɛdɩnɩ Ɛsɔ yɔ;+ nɛ wɛtʋ ndʋ tɩkɛdɩnɩ Ɛsɔ yɔ, tʋtʋ ñeyeki se ɖɩwɛɛnɩ lidaʋ,+
5 nɛ lidaʋ eeyeki se fɛyɛ ɛkpa-ɖʋ;+ mbʋ pʋyɔɔ yɔ patɩŋnɩ fezuu kiɖeɖeu ŋgʋ paha-ɖʋ yɔ kɩ-yɔɔ nɛ papɩyɩ Ɛsɔ sɔɔlɩm ɖa-laŋa taa.+
6 Mbʋ pʋyɔɔ yɔ, toovenim taa lɛ, alɩwaatʋ ndʋ ɖɩɩkpɛndɩ ɖɩwɛnɩ ɛjandʋ yɔ,+ Krɩstʋ sɩbɩ ɛyaa mba paañaŋ Ɛsɔ yɔ pɔ-yɔɔ alɩwaatʋ ndʋ paɖʋwa yɔ tɩ-yɔɔ.
7 Mbʋ pʋyɔɔ yɔ pɩwɛ kaɖɛ se nɔɔyʋ etisi se ɛsɩkɩ ɛyʋ siɣsiɣ tʋ yɔɔ; ɛlɛ pɩtɩla yɔ, nɔɔyʋ katɩɣ se ɛsɩ ɛyʋ kɩbanʋ nɔɔyʋ yɔɔ.
8 Ɛlɛ ɛzʋnɔ Ɛsɔ wɩlɩ-ɖʋ ɛ-sɔɔlɩm: Alɩwaatʋ ndʋ ɖɩɩkɛ kɩwɛɛkɩm laɖaa yɔ, Krɩstʋ sɩbɩ ɖɔ-yɔɔ.+
9 Pʋyɔɔ lɛ, ɛzɩma paya-ɖʋ lɛɛlɛɛyɔ se siɣsiɣ tɩnaa pɩtɩŋnɩ ɛ-calɩm yɔɔ yɔ,+ pɩkaɣ tɩŋnʋʋ ɛ-yɔɔ nɛ paya ɖa-ñʋʋ pana taa.+
10 Mbʋ pʋyɔɔ yɔ ye alɩwaatʋ ndʋ ɖɩɩkɛ koyindinaa yɔ, Ɛsɔ Pɩyalʋ sɩm eyeba nɛ ɖa nɛ Ɛsɔ ɖiceɣ yɔ,+ pɩtʋʋ fɛyɩ se lɛɛlɛɛyɔ ɖa nɛ ɩ ɖiceɣu yɔ, e-wezuu kaɣ ɖa-ñʋʋ yabʋ kpem nɛ pɩkɩlɩ.
11 Pɩtɩkɛ pi-ɖeke, ɛlɛ ɖa-Kɩbaɣlʋ Yesu Krɩstʋ weyi ɛ-yɔɔ pɩtɩŋnɩ lɛɛlɛɛyɔ nɛ ɖiceɣ yɔ ɛ-yɔɔ lɛ, ɖa-taa lakɩ leleŋ ɖɔɖɔ nɛ Ɛsɔ.+
12 Pʋyɔɔ lɛ, kɩwɛɛkɩm tɩŋnɩ ɛyʋ kʋɖʋm yɔɔ nɛ pɩlɩɩ ɛjaɖɛ yɔɔ nɛ sɩm ñatɩŋnɩ kɩwɛɛkɩm yɔɔ nɛ pɩlɩɩ,+ nɛ piyele nɛ sɩm wadɩ ɛyaa kpeekpe yɔɔ, mbʋ pʋyɔɔ yɔ pa-tɩŋa palabɩ kɩwɛɛkɩm.+
13 Mbʋ pʋyɔɔ yɔ kɩwɛɛkɩm kaawɛ ɛjaɖɛ yɔɔ pʋcɔ nɛ Paɣtʋ kɔɔ; ɛlɛ paakpakɩɣ kɩwɛɛkɩm nɛ pasʋʋ nɔɔyʋ alɩwaatʋ ndʋ paɣtʋ natʋyʋ fɛyɩ yɔ.+
14 Paa mbʋ yɔ, sɩm tɔɔ kewiyitu kpaɣnɩ Aɖam nɛ pɩkɔɔ nɛ pɩtalɩ Moyizi, halɩ pɩtɔɔ kewiyitu mba patɩla kɩwɛɛkɩm mbʋ pɩnɩɣzɩnɩ Aɖam ñɩmbʋ yɔ pɔ-yɔɔ, ɛnʋ weyi ɛɛkɛ weyi ɛkaɣaɣ kɔm yɔ ɛ-lɛzʋʋ yɔ.+
15 Ɛlɛ kʋjɔʋ fɛyɩ ɛzɩ kɩwɛɛkɩm yɔ. Mbʋ pʋyɔɔ yɔ ye ɛyʋ kʋɖʋm kɩwɛɛkɩm eyeba nɛ ɛyaa sakɩyɛ sɩ yɔ, pɩtʋʋ fɛyɩ se pɩtɩŋnɩ ɛyʋ kʋɖʋm, Yesu Krɩstʋ, lootiye yɔɔ lɛ+ ɛyaa sakɩyɛ wɛnɩ Ɛsɔ lootiye nɛ ɛ-kʋjɔʋ* nɛ pɩkɩlɩ!+
16 Pɩtasɩ lɛ, kʋjɔʋ* fɛyɩ ɛzɩ mbʋ pɩlɩ ɛyʋ kʋɖʋm kɩwɛɛkɩm taa yɔ.+ Mbʋ pʋyɔɔ yɔ kɩwɛɛkɩm kʋɖʋmʋm yebina nɛ pahʋʋnɩ ɛyaa tɩŋa tɔm nɛ pakʋ pɔ-tɔm;+ ɛlɛ kʋjɔʋ ŋgʋ palabɩ kɩwɛɛkɩm sakɩyɛ wayɩ yɔ, ŋgʋ lɛ se paya ɛyaa sakɩyɛ se siɣsiɣ tɩnaa.+
17 Mbʋ pʋyɔɔ yɔ ye ɛyʋ kʋɖʋm kɩwɛɛkɩm eyeba nɛ sɩm tɩŋnɩ ɛyʋ ɛnʋ ɛ-yɔɔ nɛ pɩtɔɔ kewiyitu yɔ,+ pɩtʋʋ fɛyɩ se mba pamʋ lootiye sakɩyɛ nɛ siɣsiɣ wɛtʋ kʋjɔʋ* yɔ,+ pakaɣ tɩŋnʋʋ ɛyʋ kʋɖʋm, Yesu Krɩstʋ yɔɔ+ nɛ pɔtɔɔ kewiyitu+ wezuu taa nɛ pɩkɩlɩ!
18 Ye mbʋ, ɛzɩ kɩwɛɛkɩm kʋɖʋmʋm yebu nɛ pahʋʋnɩ tɔm ɛyaa tɩŋa nɛ pakʋ pɔ-tɔm yɔ,+ mbʋ ɖɔɖɔ siɣsiɣ lakasɩ kʋɖʋmsɩ kaɣ yebu nɛ payaa ɛyaa ndɩ ndɩ*+ se siɣsiɣ tɩnaa nɛ pehiɣ wezuu.+
19 Mbʋ pʋyɔɔ yɔ ɛzɩ ɛyʋ kʋɖʋm kaañamtʋ yebu nɛ ɛyaa sakɩyɛ pɩsɩ kɩwɛɛkɩm laɖaa yɔ,+ mbʋ ɖɔɖɔ ɛyʋ kʋɖʋm ñamtʋ kaɣ yebu nɛ ɛyaa sakɩyɛ pɩsɩ siɣsiɣ tɩnaa.+
20 Ŋgʋ Paɣtʋ lɩwa se kɩwɛɛkɩm ɛpɩzɩ nɛ pihuu.+ Ɛlɛ ɖenɖe kɩwɛɛkɩm ɖɔwa yɔ, lootiye ɖɔwa nɛ pɩkɩlɩ.
21 Ɛbɛ yɔɔ? Se pɩsa nɛ ɛzɩ kɩwɛɛkɩm nɛ sɩm pɔtɔɔʋ kewiyitu yɔ,+ lootiye ɖɔɖɔ pɩzɩ nɛ ɖɩtɔɔ kewiyitu pɩtɩŋnɩ siɣsiɣ wɛtʋ ndʋ tiwokini wezuu maatɛŋ taa, ɖa-Kɩbaɣlʋ Yesu Krɩstʋ yɔɔ yɔ tɩ-yɔɔ.+
Pɩ-tɛɛ tɔm
^ Pɩpɩzɩɣ pɩkɛ, «laŋhɛzɩyɛ wɛ.»
^ Pɩpɩzɩɣ pɩkɛ, «ɖa-taa lakɩ leleŋ.»
^ Yaa «se Ɛsɔ kaɣ-ɖʋ sam.»
^ Pɩpɩzɩɣ pɩkɛ, «ɛlɛ ɖa-taa lakɩ leleŋ.»
^ Yaa «ɛ-falaa kʋjɔʋ.»
^ Yaa «falaa kʋjɔʋ.»
^ Yaa «falaa kʋjɔʋ.»
^ Yaa «ɛyaa tindima tɩŋa.»
