TƆM ÑƲŊ weyi ɩɖɛwa yɔ, ɩwɩlɩ ɛzɩma kaɖɛ wɛtʋ ndɩ ndɩ pɩzɩɣ tiyele nɛ wezuu caɣʋ lɩɩ ɛyʋ sɔŋ yɔ. Alɩwaatʋ ndʋ ŋlʋkɩnɩ ña-kʋñɔmɩŋ yɔ, ŋpɩzɩɣ nɛ ŋpɔzɩ ña-tɩ se, ‘Ye mɛntɛzɩ sɩbʋ pɩɩkɩlɩɣ ɖeu na?’ Yaa pɩpɩzɩɣ nɛ pɩlabɩ-ŋ ɛzɩ nɔɔyʋ eekeŋni-ŋ yɔ. Ɛlɛ tɩlɩ se Ɛsɔ sɩm wɛtʋ ndʋ tɩ-taa ŋwɛɛ yɔ. Ŋmʋ ñɩm ɛ-ɛsɩndaa.

Keɣa 85 maɖʋ wɩlaa se ɛtaɣ Ɛsɔ liu. Ɛyɔɔdaa se: “Kʋñɔŋ kɩyakʋ wiye, maya-ŋ, nɛ ña yɔ, Kɩbaɣlʋ, ŋwelisini-m.” (Keɣa 85:7) Ŋpɩzɩɣ nɛ ŋpɔzɩ se, ‘Ɛzɩma Ɛsɔ pɩzɩɣ nɛ ewelisini-m “kʋñɔŋ kɩyakʋ wiye”?’

Pɩkɛ toovenim se pɩtɩla Ɛsɔ eeyeki nɛ ña-kʋñɔmɩŋ sɩɩ tɩnaɣ kpaagbaa, ɛlɛ ɛ-Tɔm, Bibl haɣ-ŋ lidaʋ se ɛpɩzɩɣ nɛ ɛha-ŋ laŋhɛzɩyɛ nɛ pɩsɩnɩ-ŋ nɛ ŋɖɔkɩ kpam: “Ɩtaanɩɣzɩ nabʋyʋ yɔɔ, ɛlɛ paa mbʋ pɩ-taa lɛ, ɩtɩŋnɩ adɩma nɛ tenduu yɔɔ, pɩkpɛndɩnɩ sɛtʋ nɛ iyele nɛ Ɛsɔ tɩlɩ mbʋ ɩpɔzʋʋ yɔ; nɛ Ɛsɔ tɛ laŋhɛzɩyɛ nɖɩ ɖɩcɛzɩ tɔm taa nɩʋ lɛɣtʋ tɩŋa yɔ, ɖɩkaɣ ɖaŋʋʋ mɩ-laŋa nɛ mɩ-maɣzɩm pɔ-yɔɔ.” (Filiipi mba 4:6, 7) Ðitendi-ŋ, yele nɛ ɖɩna ɛzɩma Bibl masɩ nzɩ sɩkɔŋ yɔ, sɩhaɣ-ɖʋ lidaʋ se Ɛsɔ maɣzɩɣ ɖɔ-yɔɔ yɔ.

“Ɛsɔ ɛɛsɔʋ [cɩʋcɩʋ] kʋɖʋm yɔɔ. . . . Ɩwɛ wazaɣ nɛ pɩkɩlɩ cɩʋcɩʋnaa sakɩyɛ.”​—Luka 12:6, 7.

MAƔZƖ TƆM TƲNƐ TƖ-YƆƆ: Sumasɩ cikpesi ɛzɩ cɩʋcɩʋnaa mbʋ yɔ, tɩmʋ ñɩm ɛyaa sakɩyɛ ɛsɩndaa, paa mbʋ yɔ, sɩmʋ ñɩm Ɛsɔ ɛsɩndaa. Halɩ cɩʋcɩʋ kʋɖʋm maɣmaɣ Ɛsɔ ɛɛsɔʋ ɛ-yɔɔ. Paa sumaɣ cikpelaɣ ŋga lɛ, kamʋ ñɩm Ɛsɔ ɛsɩndaa. Ɛyaa mʋ ñɩm kpem Ɛsɔ ɛsɩndaa nɛ pɩkɩlɩ cɩʋcɩʋnaa. Wondu ndʋ payɩ Ɛsɔ lɩzɩ tɛtʋ yɔɔ yɔ tɩ-taa lɛ, ɛyʋ kɩlɩnɩ ñɩm mʋʋ Ɛsɔ ɛsɩndaa; ɛyʋ ɖeke Ɛsɔ lɩzɩ “ɛ-lɛzʋʋ” nɛ ɛyʋ ɖeke pɩzɩɣna nɛ ɛmaɣzɩnɩ Ɛsɔ wɛtʋ kɩbandʋ.​—Kiɖe Tɛɛ Tɔm 1:26, 27.

“Kɩbaɣlʋ, ŋwili-m nɛ ŋsɩmɩ-m. . . . Ma-lɩmaɣza ana a-tɩŋa payɩ ŋsɩm-yɛ . . . Takɩ-m camɩyɛ nɛ ŋtɩlɩ ma-lɩmaɣza.”​—Keɣa 138:1, 2, 23.

MAƔZƖ TƆM TƲNƐ TƖ-YƆƆ: Ɛsɔ sɩmɩ-ŋ camɩyɛ tetete. Ɛsɩm ndʋ tɩwɛ ña-laŋɩyɛ taa yɔ camɩyɛ nɛ mbʋ pɩ-yɔɔ ŋnɩɣzɩɣ yɔ. Paa lalaa ɩɩsɩŋ kʋñɔmɩŋ nɛ nɩɣzɛ wena a-taa ŋwɛɛ yɔ yɔ, Ɛsɔ maɣzɩɣ ñɔ-yɔɔ nɛ ɛsɔɔlaa se ɛsɩnɩ-ŋ. Pʋyɔɔ lɛ, paa ɛbɛ taa ŋtɩɩwɛɛ kɔyɔ, wezuu caɣʋ kɩlɩ ɖeu sɩm.

“Kɩbaɣlʋ welisi ma-adɩma, yele nɛ mon-kubuka talɩ-ŋ! . . . Kʋ nɩŋgbaŋʋʋ nɛ mɔn-cɔlɔ kiŋ, kɩyakʋ ŋgʋ mayaɣ-ŋ yɔ, cosi-m. . . . Ɛkɛzɩɣ ɛ-tɩ nɛ ‘pomuli-m’ adɩma cɔlɔ.”​—Keɣa 101:2, 3, 18.

MAƔZƖ TƆM TƲNƐ TƖ-YƆƆ: Kpaɣnɩ ɖooo ɛjaɖɛ kiɖe tɛɛ, Yehowa wɛɛ nɛ ɛnaɣ ɛsɩtɛɣlɩm mbʋ payɩ kʋñɔmɩŋ yeba nɛ ɛyaa tisiɣ yɔ, nɛ pɩwɛ ɛzɩ ɛwɛɛ nɛ eteziɣ-pʋ nɛ ɛɖʋʋ e-tokaɣ taa yɔ. (Keɣa 55:9) Ñɛ-ɛsɩtɛɣlɩm wɛ pɩ-taa. Ɛsɔ ɖiɣni naʋ kʋñɔŋ ŋgʋ kɩ-taa ŋwɛɛ yɔ nɛ ɛsɩtɛɣlɩm mbʋ ŋtisiɣ yɔ, mbʋ pʋyɔɔ yɔ ŋmʋ ñɩm ɛ-ɛsɩndaa.

“Taahʋʋ, mbʋ yɔ mɛnkɛ ñɛ-Ɛsɔ: Mankaɣ-ŋ kpazʋʋ ɖoŋ nɛ mankaɣ-ŋ sɩnʋʋ . . . mɛkɛnɩ Kɩbaɣlʋ ñɛ-Ɛsɔ, . . . nɛ meheyiɣ-ŋ se: ‘Taase sɔɔndʋ, mɔnkɔŋ ña-sɩnaʋ.’”​—Izaayii 41:10, 13.

MAƔZƖ TƆM TƲNƐ TƖ-YƆƆ: Ɛsɔ sɔɔlaa se ɛsɩnɩ-ŋ. Ye ŋtɔlaa yɔ, ɛkaɣ-ŋ kʋsʋʋ.

“Ɛsɔ sɔɔlɩ ɛjaɖɛ pɩŋŋ nɛ ɛcɛlɩ ɛ-Pɩyalʋ ɛgbamɩyɛ, se pɩsa nɛ weyi ɛwɛɣnɩ tisuu ɛ-yɔɔ yɔ, pataaɖɩzɩ-ɩ ɛlɛ ehiɣ wezuu maatɛŋ.” —Yohanɛɛsɩ 3:16.

MAƔZƖ TƆM TƲNƐ TƖ-YƆƆ: Ŋmʋ ñɩm kpem Ɛsɔ ɛsɩndaa, pʋyɔɔ ɛsɔɔlɩ faaa nɛ ɛkpaɣ ɛ-Pɩyalʋ nɛ ɛlaa kɩlaʋ ñɔ-yɔɔ. Kɩlaʋ kʋnɛ kɩhaɣ-ŋ waɖɛ se ŋcaɣ wezuu koboyaɣ taa nɛ ŋnɩɩ wezuu leleŋ tam tam cee wayɩ. *