Chibayilo cha Jesu i zila Ndzimu ya a no chidza, kene, ku sungunula bathu mu chibi ne lufu. Baibili i noti malopa a Jesu a ka tebugwa a no tenga ku sungunugwa kwe bathu. (Baefesiya 1:7; 1 Pita 1:18, 19) Ndizo, Jesu a kati wa ka zha “kuwoshingila ne kupa butjilo gugwe kudzitunula banji.”​—Matewu 20:28, King James Version.

Ini “ku tengunugwa kwe banji” kwa ka be ku sheteka?

 Nlume we kutanga, Adamu, wa ka bumbiwa a ka zwilizanila, kakale a sina chibi. Wa ka be a nga chilila cha chose ngono ku ka si khoneke ne kuti wa ka lamba nlayo we Ndzimu. (Genesisi 3:17-19) Wa ka ti e thama bana, a ka pindisila chibi mu bali. (Baroma 5:12) Ndizo, Baibili i ti Adamu wa ka “zwitengesa” iye kose ne bana babe ku be nlanda we chibi ne lufu. (Baroma 7:14) Ngobe ba sa ka zwilizanila, ha kuna wabo wa ka be a nga tenga cha ka lashiwa na Adamu.​—Pisalema 49:7, 8.

 Ndzimu wa ka be ne mahwilangoni mu ludzi gwa Adamu mu chimo chi no hwisa zogwadza. (Johani 3:16) Ne kwa ka jalo, ndulamo ye Ndzimu ya ka be i si kuti A leche zwibi zwabo koga ku sina mabaka a no hwika. (Pisalema 89:14; Baroma 3:23-26) Ndzimu U no da bathu, ngono U no thama chingwe ne kwe zwibi zwabo kuti zwi si zwibatigwe koga ngono zwi pedzisiwe. (Baroma 5:6-8) Ndicho chi no miligwa ne ku tengunugwa.

Ku tengunugwa ko shingikadziwa chini?

 Mu Baibili, dama “tengunula” lo leba ne kwe zwithu zwitatu:

1.   I chithu chi no shingisiwa ku ruwela.​—Palo 3:46, 47.

2.   Lo dwa ku sungunula, kene ku tengunula.​—Ekezodo 21:30.

3.   Lo dwa chi no lizana ne mari e chithu chi no tengwa. a

 Bona se kwa zwithu izwezwi zwi yendidzana ne ku tengunula kwe chibayilo cha Jesu Kirisiti.

1.   Ku ruwela. Baibili i no leba kuti Bakirisiti ba ka “tengwa ne chithu chikulu.” (1 Bakorinta 6:20; 7:23) Chithu ichecho chikulu i malopa a Jesu, a a ka “dzutunulila Ndzimu bathu kudwa mu ludzi ne lulimi ne mu bathu ne tjaba dzose.”​—Zumbunulo 5:8, 9.

2.   Ku sungunugwa. Chibayilo cha Jesu cho “sungunula ne zila ye ku” tengunugwa mu chibi.​—1 Bakorinta 1:30; Bakolosa 1:14; Bahebera 9:15.

3.   Ku fanidzanya. Chibayilo cha Jesu cho lizana dumbu ne cha ka lashiwa na Adamu​—buchilo gwe nthu wa ka zwilizanila. (1 Bakorinta 15:21, 22, 45, 46) Baibili i noti: “Ngobe se bathu banji bakabe batjinyi nge kusahwa kwe nthu nng’ompela [Adamu], sa ikokobo nge kuhwa kwe nthu nng’ompela [Jesu Kirisiti],bathu bose banowolulwamisiwa.” (Baroma 5:19) Ichecho cho lakidza se kwa lufu gwe nthu u ngompela gu nga tengunula bathu banjinji mu chibi. Malebeswa wose, chibayilo cha Jesu i “nlipilili we bathu bose” ba no tola thambo dza ka fanila ku bona mbayilo wacho.​—1 Timoti 2:5, 6.