Primera di Juan 3:1-24
3 Nhos odja ki tipu di amor ki nos Pai mostra-nu, asi pa nu pode txomadu fidjus di Deus! I é kel-li ki nos é. É pur isu ki mundu ka konxe-nu, pamodi es ka txiga di konxe-l.
2 Nhas irmon ki N krê txeu, gósi nos é fidjus di Deus, má inda ka mostradu kuzê ki nu ta ben ser. Nu sabe ma óras ki el mostradu, nu ta ben ser sima el, pamodi nu ta ben odja-l sima el é.
3 I tudu algen ki ten es speransa na el, es ta bira puru sima el é puru.
4 Tudu kel ki ta kontinua ta faze pekadu tanbê el sta faze kel ki é kóntra lei, i pekadu é kel ki é kóntra lei.
5 Nhos sabe tanbê, ma Jizus ben pa tra nos pekadu, i na el ka ten pekadu.
6 Tudu kel ki ta kontinua unidu ku el ka ta kontinua ta faze pekadu. Kel ki ta kontinua ta faze pekadu ka odja-l, nen ka txiga di konxe-l.
7 Nhas fidju, pa ningen ka ingana nhos. Ken ki ta kontinua ta faze justisa é justu, sima el é justu.
8 Ken ki ta kontinua ta faze pekadu ta ben di Diabu, pamodi Diabu sta ta peka désdi komésu.* Fidju di Deus ben ku es obijetivu: pa disfaze* kes óbra di Diabu.
9 Tudu kel ki nase di Deus ka ta kontinua ta faze pekadu, pamodi spritu santu* di Deus ta kontinua na el, i el ka pode kontinua ta faze pekadu, pamodi el nase di Deus.
10 Nu ta sabe ken ki é fidju di Deus i ken ki é fidju di Diabu di kel manera li: kel ki ka ta kontinua ta faze justisa ka ben di Deus, i nen kel ki ka ta ama se irmon.
11 Pamodi é kel mensajen li ki nu obi désdi komésu: nu debe ama kunpanheru,
12 ka sima Kain, ki ben di kel Malvadu i el mata se irmon. I pamodi ki el mata-l? Pamodi se própi óbra éra mau, má kes di se irmon éra justu.
13 Irmons, ka nhos fika dimiradu pamodi mundu ta ôdia nhos.
14 Nu sabe ma nu pasa di mórti pa vida, pamodi nu ta ama nos irmons. Ken ki ka ta ama ta kontinua mortu.
15 Tudu kel ki ta ôdia se irmon é asasinu, i nhos sabe ma ninhun asasinu ka ta ten vida pa tudu ténpu.
16 Através di kel-li nu txiga di konxe amor: el intrega se vida* pa nos, i nos nu ten obrigason di intrega nos vida* pa nos irmons.
17 Má si algen ten kuzas material di es mundu i el odja se irmon ta pasa nisisidadi i simé el ta nega mostra-l konpaxon, modi ki amor di Deus pode kontinua na el?
18 Nhas fidju, nu debe ama, ka sô ku palavra nen sô ku bóka, má na kuzas ki nu ta faze i di verdadi.
19 Di kel manera li nu ta sabe ma nu ben di verdadi, i nu ta poi nos korason ta xinti suguru* dianti di Deus
20 mésmu óras ki nos korason kondena-nu, pamodi Deus é más grandi ki nos korason i el sabe tudu kuza.
21 Nhas irmon ki N krê txeu, si nos korason ka ta kondena-nu, nu pode pâpia ku Deus ku kunfiansa,
22 i tudu kel ki nu pidi nu ta resebe di el, pamodi nu sta obi ku se mandamentus i nu sta faze kel ki ta agrada-l.
23 Na verdadi, kel-li é se mandamentu: pa nu ten fé na nómi di se Fidju, Jizus Kristu, i pa nu ama kunpanheru, sima el manda-nu.
24 Alén di kel-li, ken ki ta obi ku se mandamentu ta kontinua unidu ku el, i el unidu ku kel algen. I através di spritu ki el da-nu, nu sabe ma el ta kontinua unidu ku nos.
Nótas di rodapé
^ Ô: “désdi ki el kumesa”.
^ Ô: “distrui”.
^ Na gregu ta fla: “simenti”. Kel-li krê fla simenti ki ta pode da frutu.
^ Ô: “alma”.
^ Ô: “alma”.
^ Ô: “nu ta konvense nos korason”.
