Sugunda Koríntius 8:1-24
8 Gósi irmons, nu krê pa nhos sabe di kel grandi bondadi di Deus ki mostradu pa kes kongregason di Masedónia.
2 Mésmu ku frónta, duránti un grandi próva, es da ku grandi alegria, enbóra es éra txeu póbri. Kel-li mostra ma es gosta txeu di da.
3 Es da tudu kel ki es ta podeba. Sin, ami é tistimunha ma es da ti más di ki kel ki es ta podeba.
4 Di es pa es, es fika sénpri ta inplora-nu pa nu da-s kel priviléjiu di da ku bondadi, asi pa es pode partisipaba na trabadju di djuda kes santu.
5 I es faze más di ki kel ki nu sta speraba, dja ki pa vontadi di Deus, primeru es intrega ses kabésa pa Sinhor i pa nos.
6 Nton, nu insentiva Titu pa tirmina koléta di kel kontribuison ki nhos faze ku bondadi, dja ki é el ki kumesa ta faze kel trabadju li na nhos meiu.
7 Pur isu, sima nhos é riku na tudu kes kuza li: na fé, na palavra, na konhisimentu, na sforsu ki nhos ta faze pa djuda otus i na imita amor ki nu ten pa nhos, tanbê nhos ser riku na es trabadju di da.
8 N sta fla kel-li, ka pa da nhos órdi, má pa dexa nhos sabe di sforsu ki otus sta ta faze i pa poi sinseridadi di nhos amor na próva.
9 Pamodi nhos konxe kel grandi bondadi di nos Sinhor Jizus Kristu, ma enbóra el éra riku, el bira póbri pamodi nhos, asi pa nhos pode bira riku através di se pobréza.
10 I sobri kel-li N ta da nha opinion: kel-li é pa nhos ben, pamodi dja ten un anu ki nhos kumesa kel trabadju li i tanbê nhos mostra dizeju di faze-l.
11 Nton gósi, nhos tirmina kel trabadju ki nhos kumesa, asi pa kel ki nhos ta da di akordu ku kel ki nhos ta pode, mostra nhos vontadi di da.
12 Pamodi si algen dja tene vontadi di da, kel ki el ta da ta setadu ku alegria si kel algen da di akordu ku kel ki el ten, ka di akordu ku kel ki el ka ten.
13 Pamodi N ka krê poi kuzas ta fika fásil pa otus i difísil pa nhos,
14 má pa kuzas fika igual. Pa kel ki ta resta nhos gósi kubri ses nisisidadi, asi tanbê pa kel ki ta resta-s kubri kel ki nhos tene falta, i di kel manera li kuzas ta fika igual.
15 Sima sta skrebedu: “Kel algen ki tinha txeu ka tinha txeu dimás, i kel algen ki tinha poku ka tinha poku dimás.”
16 Nu ta agradese Deus pamodi el poi na korason di Titu kel mésmu preokupason ki nu ta xinti pa nhos,
17 ka sô pamodi el seta nos pididu, má dja ki el tene txeu vontadi di djuda, el sta ba vizita nhos di el pa el.
18 Má djuntu ku el, nu sta ta manda kel irmon ki tudu kongregason sta ta ilojia-l pamodi kuzas ki el sta ta faze pa notísias sábi.
19 Ka sô kel-li, má tanbê kongregason skodje-l pa el viaja ku nos, i asi pa el djuda-nu distribui kel ajuda. Nu ta faze kel-li pa da glória pa Sinhor, i pa nu mostra ma nu sta prontu pa djuda otus.
20 Asi nu ta ivita pa ningen ka kritika-nu pamodi kel txeu kontribuison ki nu dadu pa kuida di el.
21 Pamodi nu ta ‘sforsa pa faze tudu kuza ku onestidadi, ka sô dianti di Jeová,* má tanbê dianti di ómis’.
22 Tanbê, nu sta manda nos irmon djuntu ku es, ki txeu bês prova ma el faze se midjór, má gósi el sta mostra inda mutu más zelu pamodi kel grandi kunfiansa ki el ten na nhos.
23 Má si algen ten kalker dúvida sobri Titu, el é nha kunpanheru i kolaborador pa sirbi pa nhos ben. Ô si algen ten dúvida sobri nos irmons, es é apóstlus di kongregason i es ta traze glória pa Kristu.
24 Pur isu, nhos mostra kes irmon li ma nhos ta ama-s i nhos mostra pa kongregasons pamodi ki nu ta pâpia di nhos ku orgulhu.
