Jénezis 18:1-33
18 Dipôs, Jeová parse pa el na meiu di kes arvi grandi di Manre, timenti el staba xintadu na entrada di ténda na kel óra más kenti di dia.
2 El djobe i el odja três ómi paradu ka mutu lonji di el. Kantu el odja-s, el kóre di entrada di ténda pa ba inkontra ku es i el inbaxa ses dianti.
3 Nton el fla: “Jeová, si nho sta kontenti ku mi, favor, ben vizita-m.
4 Favor, nhos dexa pa es traze nhos un bokadinhu di agu i pa es laba nhos pé, dipôs nhos diskansa baxu di arvi.
5 Dja ki nhos ben ti li na nhos sérvu, nhos dexa-m traze nhos un bokadinhu di pon pa nhos ganha forsa. Dipôs nhos pode kontinua nhos kaminhu.” Nton es fla: “Sta dretu. Bu pode faze sima bu fla.”
6 Nton Abraon kóre pa ténda undi Sara staba i el fla-l: “Faxi! Panha uns 10 kilu* di farinha finu, masa-l i faze pon.”
7 Dipôs Abraon kóre pa undi ki kes animal staba i el skodje un boi novu ku karni móli. El da se ajudanti el, i el bai pripara-l faxi.
8 Nton, el panha mantega, leti i kel boi novu ki priparadu i el pô-s ses dianti. I el fika di pé djuntu ku es baxu di arvi timenti es staba ta kume.
9 Es pergunta-l: “Undi Sara, bu mudjer, sta?” El responde: “Li na ténda.”
10 I un di es kontinua ta fla: “Di li un anu di serteza N ta torna ben na bo na kel ténpu li, i Sara, bu mudjer, dja ta sta ku un fidju.” Sara staba ta obi na entrada di ténda, ki staba tras di kel ómi.
11 Abraon ku Sara dja staba algen grandi. Sara dja pasaba di idadi di ten fidju.*
12 Nton Sara kumesa ta ri déntu di el i el fla: “Gósi ki N sta bédju i nha sinhor dja sta algen grandi, N ta ten es alegria li própi?”
13 Nton Jeová fla Abraon: “Pamodi ki Sara ri i el fla: ‘Mésmu ki N sta bédju N ta ten un fidju própi?’
14 Ten algun kuza ki é difísil dimás pa Jeová? N ta torna ben na bo na kel anu ki sta pa ben, na kel ténpu markadu i Sara dja ta sta ku un fidju.”
15 Má dja ki Sara staba ku medu, el nega i el fla: “N ka ri!” Nton el fla: “Bu ri sin!”
16 Kantu kes ómi labanta pa bai, es djobe pa baxu i es odja Sudoma. Abraon staba ta kunpanha-s pa dispidi di es.
17 Jeová fla: “N ta sukundi di Abraon kuzê ki N sta ta ben faze?
18 Abraon di serteza ta bira un nason grandi i poderozu, i tudu nason di téra ta ben abensuadu através di el.
19 Pamodi N skodje-l, pa el da se fidjus i kes algen di se kaza órdi pa es sigi kaminhu di Jeová, i pa es faze kel ki é dretu i justu, asi pa Jeová kunpri kuzê ki el promete Abraon.”
20 Nton Jeová fla: “Kes kexa* kóntra Sudoma ku Gumora é txeu dimás, i ses pekadu é gravi dimás.
21 N ta dixi pa N odja si es sta ta aji sima kel kexa ki txiga na mi. I si é ka si, N ta fika ta sabe.”
22 Nton, kes ómi sai di la i es bai na direson di Sudoma, má Jeová fika ku Abraon.
23 Nton, Abraon txiga más pértu i el fla: “Bu sta pensa própi na distrui kes algen justu djuntu ku kes algen mau?
24 Imajina ma na kel sidadi ten 50 ómi justu. Simé, bu ta distrui-s i bu ka ta púrdua kel lugar pamodi kes 50 justu ki ten la?
25 Nunka bu ka ta fazeba un kuza di kel-li, pa bu mata kes algen justu djuntu ku kes algen mau, i pa kontise ku kes algen justu mésmu kuza ki ta kontise ku kes algen mau! Bu ka ta faze un kuza di kel-li. Juís di téra interu ka ta faze kel ki é justu?”
26 Nton Jeová fla: “Si N atxa 50 ómi justu na sidadi di Sudoma, N ta púrdua tudu algen ki ta mora la pamodi es.”
27 Má Abraon responde-l: “Favor Jeová, diskulpa-m pamodi liberdadi ki N sta ta toma na insisti, enbóra ami é téra i sinza.
28 Imajina ma sta falta sinku algen pa konpleta kes 50 justu. Bu ta distruíba kel sidadi interu pamodi kes sinku?” Nton el fla: “N ka ta distrui-l si N atxa 45 justu la.”
29 Má Abraon torna fla-l: “Imajina ma sta 40 algen justu la.” El responde: “N ka ta distrui-l pamodi kes 40.”
30 Má Abraon kontinua ta fla: “Favor Jeová, ka nho fika xatiadu, má dexa-m kontinua ta pâpia: imajina ma la ten sô 30.” El responde: “Si N atxa 30, N ka ta distrui-l.”
31 Má Abraon kontinua ta fla: “Favor Jeová, diskulpa-m pamodi liberdadi ki N sta toma na insisti: i si atxadu sô 20 justu la?” El responde: “N ka ta distrui-l pamodi kes 20.”
32 Pa tirmina Abraon fla: “Favor Jeová, ka nho fika xatiadu, má dexa-m pâpia sô más un bês: imajina ma la ten sô 10.” El responde: “N ka ta distrui-l pamodi kes 10.”
33 Kantu Jeová tirmina di pâpia ku Abraon, el sigi se kaminhu i Abraon volta pa se ténda.
