Jénezis 3:1-24
3 Kóbra éra kel animal brabu más spértu ki Jeová Deus dja fazeba. Nton el fla mudjer: “É si própi ki Deus fla, ma nhos ka debe kume fruta di tudu arvi di jardin?”
2 Nton, mudjer fla kel kóbra: “Nu pode kume fruta di tudu arvi di jardin,
3 ménus fruta di kel arvi ki sta na meiu di jardin, pamodi Deus fla: ‘Ka nhos kume-l, nau, nen ka nhos toka na el, sinon nhos ta móre.’”
4 Nton, kóbra fla mudjer: “Di serteza nhos ka ta móre.
5 Pamodi Deus sabe ma na kel dia ki nhos kume-l, nhos odju ta abri i nhos ta bira sima Deus, ta sabe kel ki é dretu i kel ki é mariadu.”
6 Asi, mudjer odja ma fruta di kel arvi éra bon pa kume, el éra bunitu sô di odja i el ta parseba sábi. Nton, el panha fruta di kel arvi i el kumesa ta kume-l. Dipôs, kantu el staba ku se maridu, el da-l kel fruta tanbê i se maridu kumesa ta kume-l.
7 Nton ses odju abri, i es da kónta ma es staba nu. Pur isu, es koze folha di figera pa es kubri ses korpu.*
8 Dipôs, timenti Jeová Deus staba ta anda na jardin, pa vólta di kel óra ki ta fikaba más frésku, es obi se vós. Nton, ómi ku se mudjer sukundi di Jeová Deus na meiu di kes arvi di jardin.
9 I Jeová Deus kontinua ta txoma ómi: “Undi ki bu sta?”
10 Dipôs el responde: “N obi bu vós na jardin, má N xinti medu pamodi N staba nu, pur isu N sukundi.”
11 Nton Deus fla-l: “Ken ki fla-u ma bu staba nu? Bu kume fruta di kel arvi ki N fla-u pa bu ka kume?”
12 Ómi fla-l: “É kel mudjer ki bu da-m pa sta ku mi ki da-m fruta di kel arvi, pur isu N kume-l.”
13 Nton, Jeová Deus fla mudjer: “Kuzê ki bu faze?” Mudjer responde-l: “Kel kóbra ingana-m, pur isu N kume.”
14 Nton Jeová Deus fla kel kóbra: “Dja ki bu faze kel-li, abo é maldisuadu entri tudu kes animal doméstiku i tudu kes animal selvajen. Bu ta fika ta rasta ku bu bariga i bu ta kume téra tudu dia di bu vida.
15 I N ta poi inimizadi entri bo ku mudjer i entri bu disendenti* i se disendenti. El ta pila-u kabésa i bu ta fri-l kalkanhada.”
16 El fla kel mudjer: “N ta ben poi dór di bu gravidês ta bira más txeu. Ku dór bu ta ten fidju i bu ta ten dizeju di sta ku bu maridu, i el ta manda na bo.”
17 I el fla Adon:* “Pamodi bu obi ku bu mudjer i bu kume fruta di kel arvi ki dja N flaba bo: ‘Ka bu kume-l’, txon ta fika maldisuadu pamodi bo. Ku dór bu ta kume kes kuza ki el ta da, tudu dia di bu vida.
18 Txon ta ben da-u tudu tipu di spinhu i bu ten ki kume planta ki txon ta da.
19 Ku suor di bu tésta bu ta kume pon* ti ki bu bai pa txon otu bês, dja ki é di el ki bu fazedu. Pamodi bo é téra i pa téra bu ta bai otu bês.”
20 Dipôs di kel-li, Adon txoma se mudjer di Eva* pamodi el ta ben biraba mai di tudu algen.*
21 I Jeová Deus faze ropa kunpridu di péli pa Adon i pa se mudjer, pa el bisti-s.
22 Nton Jeová Deus fla: “Ómi dja bira sima un di nos ta sabe kel ki é dretu i kel ki é mariadu. Gósi pa el ka longa mô i panha tanbê kel fruta di arvi di vida pa el kume i pa el vive pa tudu ténpu,...”
23 Nton, Jeová Deus pô-l fóra di jardin di Éden, pa el trabadja txon ki el fazedu di el.
24 Asi el poi ómi pa fóra, i el poi kes kerubin na lésti di jardin di Éden i kel lámina di un spada ku lumi ki ta rodaba sen para, pa guarda kaminhu pa arvi di vida.
Nótas di rodapé
^ Ô: “kubri kel párti na vólta di anka”.
^ Na ebraiku ta fla: “simenti”.
^ Ki krê fla “ómi ki fazedu di téra”.
^ Ô: “kumida”.
^ Ki krê fla “kel ki sta bibu”.
^ Na ebraiku ta fla: “tudu algen ki sta bibu”.
