Judas 1:1-25
1 Di Judas, ki é skravu di Jizus Kristu, má irmon di Tiagu, pa kes ki Deus, nos Pai, txoma i ki el ta ama, i ki sta guardadu pa Jizus Kristu:
2 Pa nhos ten kada bês más mizerikórdia, pas i amor.
3 Nhas irmon ki N krê txeu, N staba ta faze tudu sforsu pa N skrebe nhos sobri modi ki Deus ta ben salva-nu. Má, N odja ma N meste skrebeba nhos, pa N insentiva nhos pa luta duru pa difende kel fé ki kes santu dadu, un bês pa tudu ténpu.
4 N sta faze kel-li pamodi dja entra na nhos meiu alguns ómi, ki dja ten txeu ténpu ki Skrituras dja flaba ma es ta tinha kel julgamentu li. Es é ómis ki ka ta ruspeta Deus, ki ta bira kel grandi bondadi di nos Deus na un diskulpa pa faze konportamentu diskaradu* i ki ta mostra ma es é falsu pa nos úniku dónu* i Sinhor, Jizus Kristu.
5 Enbóra nhos sabe tudu kel-li, N krê lenbra nhos ma Jeová* salva un povu di téra di Ijitu, má dipôs el distrui kes ki ka mostra fé.
6 I kes anju ki dexa ses trabadju na séu i ki bandona kel lugar ki es debe moraba, el tene-s maradu ku korentis ki ka ta rabenta, na un lugar sukuru dimás, ti ki txiga kel grandi dia di julgamentu.
7 Di mésmu manera, Sudoma ku Gumora i kes sidadi pértu di es tanbê faze konportamentu seksual mariadu* dimás i es kóre tras di dizeju di karni ki é ka normal. Es sta nos dianti pa sirbi di izénplu di avizu, pamodi es kastigadu ku lumi pa tudu ténpu.
8 Má simé, kes ómi li tanbê sta ta kontinua ta imajina kuzas mariadu,* ta suja karni,* ta dispreza autoridadi i ta pâpia mal di kes ki resebe glória di Deus.*
9 Má, kantu arkanju* Migel tevi un prubléma ku Diabu i es diskuti sobri korpu di Muizés, el ka tenta kondena-l ku palavras ki ta ofende, má el fla: “Pa Jeová* koriji-u.”
10 Má, kes ómi li sta ta pâpia mal di tudu kuza ki na verdadi es ka ta intende. I na tudu kes kuza ki es ta intende, es é sima animal ki ka ta pensa. Es ta aji sima animal na tudu kuza ki es ta faze, i é kes kuza li ki sta ta straga-s.
11 Ai di es, pamodi es sigi kaminhu di Kain i es imita konportamentu mariadu di Balaon pamodi un rekonpénsa. Tanbê, es ta distruídu pamodi es pâpia kóntra kes ómi ki tinha autoridadi, sima Korá faze.*
12 Kes ómi li é sima kes rótxa sukundidu baxu di agu, óras ki es ta kume ku nhos na kes fésta ki nhos ta faze pa mostra amor pa irmons. Es é sima kes pastor sen vergónha, ki ta pensa sô na ses kabésa. Es é sima kes núven ki ka ten agu, ki béntu ta leba di un ladu pa kel otu. Es é sima kes arvi ki ka ta da fruta na ses ténpu, ki móre dôs bês* i ki rinkadu di raís.
13 Es é sima kes óndia di mar brabu ki ta bota skuma di ses própi vergónha. Es é sima kes stréla ki sta sen un direson sértu. Deus ta pô-s na kel lugar más sukuru ki ten i es ta fika la pa tudu ténpu.
14 Enoki, kel sétimu ómi ki ben di família di Adon, tanbê dja papiaba sobri es kantu el fla: “Nhos odja! Jeová* ben ku se monti* anju
15 pa faze julgamentu kóntra tudu algen i pa kondena tudu kes ki ka ten ruspetu pa Deus, pamodi tudu kes kuza mariadu ki es faze ku maldadi i tudu kes palavra duru ki kes pekador mau pâpia kóntra el.”
16 Kes ómi li ta kexa i es ta reklama di ses sórti na vida. Es ta sigi ses própi dizeju. Ses bóka ta ingaba di kuzas grandi, timenti es ta izajera na ilojia* otus pa ses própi interesi.
17 Má anhos, nhas irmon ki N krê txeu, nhos lenbra di kes kuza ki apóstlus di nos Sinhor Jizus Kristu dja flaba.
18 Es ta flaba nhos: “Na ténpu di fin ta ten kes algen ki ta faze trósa, ki ta aji di akordu ku ses própi dizeju mariadu.”
19 Kes-li é kes ómi ki ta kria divizon, ki é sima animal* i ki ka ten spritu di Deus.
20 Má anhos, nhas irmon ki N krê txeu, nhos bira nhos fé ki é santu más fórti i nhos faze orason ku ajuda di spritu santu.
21 Asi, pa nhos kontinua na amor di Deus, timenti nhos sta spera pa mizerikórdia di nos Sinhor Jizus Kristu, ki ta leba pa vida pa tudu ténpu.
22 Tanbê, nhos kontinua ta mostra mizerikórdia pa alguns ki tene dúvida,
23 i nhos tra-s di lumi pa nhos pode salva-s. Má, nhos kontinua ta mostra mizerikórdia pa kes otu i nhos faze-l ku kuidadu, i nhos ôdia ti mésmu kel ropa ki ses karni mantxa.
24 Deus é kel ki ta pode proteje nhos pa nhos ka tropesa i el ta poi nhos fika di pé sen kulpa, ku txeu alegria dianti di se glória.
25 Pa kel úniku Deus, ki salva-nu através di Jizus Kristu nos Sinhor, dadu glória, grandéza, puder i autoridadi pa tudu kel ténpu ki dja pasa, gósi i pa tudu ténpu. Amén.
Nótas di rodapé
^ Ô: “konportamentu sen vergónha”. Na gregu é aseljeia. Djobe Disionáriu di Bíblia.
^ Ô: “méstri”.
^ Djobe Disionáriu di Bíblia.
^ Ô: “tanbê é sunhadoris”.
^ Ô: “suja ses korpu ku konportamentu seksual mariadu”.
^ Ô: “kes gloriozu”.
^ Ô: “xéfi di anjus”. Djobe Disionáriu di Bíblia.
^ Na gregu ta fla: “pamodi konbérsu rebéldi di Korá”.
^ Ô: “ki móre tudu”.
^ Ô: “dizénas di milharis di”.
^ Ô: “ta dimira maneras di ser di”.
^ Ô: “ki ta pensa sô na kuzas karnal”.
