Kolosensis 3:1-25
3 Má si nhos resusitadu* djuntu ku Kristu, nhos kontinua ta buska kes kuza di riba, undi Kristu sta xintadu na direita di Deus.
2 Nhos konsentra nhos menti ka na kes kuza di téra, má na kes kuza di riba.
3 Pamodi nhos móre i nhos vida sta sukundidu ku Kristu ki sta unidu ku Deus.
4 Óras ki Kristu, ki é nos vida, mostra se puder, nton tanbê nhos ta mostradu djuntu ku el na se glória.
5 Pur isu, nhos poi ménbrus di nhos korpu* ta fika mortu pa kuzas ki ten aver ku konportamentu seksual mariadu,* inpuréza, paxon seksual diskontroladu, dizejus ki ta prujudika i ganánsia ki é idolatria.
6 É pamodi kes kuza li ki raiba di Deus ta ben.
7 É si tanbê ki nhos ta konportaba* na manera ki nhos ta viveba antis.*
8 Má gósi, nhos debe bandona tudu kes kuza li: raiba, fúria, maldadi i palavras ki ta ofende, i nhos debe kaba ku konbérsu mariadu di nhos bóka.
9 Ka nhos konta kunpanheru mintira. Nhos duspi di kel manera di ser bédju* ku ses kustumu.
10 I nhos bisti di kel manera di ser novu, ki através di konhisimentu izatu el sta ta bira novu di akordu ku imajen di Kel ki kria-l.
11 Na kel situason li, ka ten nen gregu nen judeu, nen kes ki faze sirkunsizon nen kes ki ka faze sirkunsizon, nen stranjeru, nen sita,* nen skravu nen ómi livri. Má Kristu é tudu kuza i el sta na tudu algen.
12 Pur isu, dja ki Deus skodje nhos i nhos é santu i se fidjus ki el ta ama, nhos bisti di konpaxon, bondadi, umildadi,* brandura i paxénxa.
13 Nhos kontinua ta aguenta kunpanheru i sta sénpri prontu pa púrdua kunpanheru, sikrê algen ten razon pa kexa kóntra kel otu. Sima Jeová* sta sénpri prontu pa púrdua nhos, nhos tanbê nhos debe faze mésmu kuza.
14 Má, alén di tudu kes kuza li, nhos bisti di amor, pamodi amor ta uni tudu algen di manera konplétu.
15 Tanbê, pa pas di Kristu reina na nhos korason* pamodi nhos txomadu pa kel pas ki ta forma sô un korpu, i sénpri nhos agradese.
16 Pa palavra di Kristu mora txeu na nhos ku tudu sabedoria. Nhos kontinua ta inxina i ta anima* kunpanheru ku salmus, lovor pa Deus i kántikus spritual kantadu pa agradese.* Nhos kontinua ta kanta pa Jeová* na nhos korason.
17 Kalker kuza ki nhos fla ô ki nhos faze, nhos faze-l na nómi di Sinhor Jizus, i através di el nhos agradese Deus, ki é nos Pai.
18 Mudjer, obi ku bu maridu sima sigidoris di Sinhor debe faze.
19 Maridu, kontinua ta ama bu mudjer i ka bu sai di kabésa ku el.*
20 Fidjus, nhos obi ku nhos pai i ku nhos mai na tudu kuza, pamodi kel-li ta poi Sinhor kontenti.
21 Anhos ki é pai, ka nhos irita* nhos fidjus pa es ka fika dizanimadu.*
22 Anhos ki é skravu, nhos obi ku nhos dónu na tudu kuza, ka sô óras ki es sta ta odja nhos, sô pa agrada ómis, má ku korason sinseru i ku txeu ruspetu pa Jeová.*
23 Kalker kuza ki nhos faze, nhos trabadja na el di tudu alma,* sima ki é pa Jeová* envês di ómis.
24 Pamodi nhos sabe ma nhos ta ben resebe eransa di Jeová* sima un rekonpénsa di akordu ku se promésa. Nhos trabadja sima skravu pa nhos Dónu, ki é Kristu.
25 É klaru ki ken ki ta faze kuzas mariadu ta ben kastigadu pamodi kes kuza mariadu ki el faze. Deus ta tra ta tudu algen igual.
Nótas di rodapé
^ Na gregu ta fla: “labantadu”.
^ Na gregu ta fla: “ménbrus ki sta na téra”.
^ Na gregu é porneia. Djobe Disionáriu di Bíblia.
^ Ô: “andaba”.
^ Ô: “kantu nhos ta viveba di kel manera li”.
^ Na gregu ta fla: “kel ómi bédju”.
^ Na ténpu antigu, kel palavra li éra uzadu pa pâpia di pesoas ki éra disprezadu pamodi ses manera di ser i ses kustumu.
^ Ô: “umildadi na menti”.
^ Ô: “kontrola nhos korason”.
^ Ô: “konsedja”.
^ Ô: “kantadu ku gratidon”.
^ Ô: “ka bu trata-l duru”.
^ Ô: “provoka”.
^ Ô: “ka perde koraji”.
^ Djobe Disionáriu di Bíblia.
