Mateus 8:1-34
8 Dipôs ki Jizus dixi di monti, txeu algen sigi-l.
2 Nton, un ómi ki tinha lépra txiga na el, el inbaxa se frenti i el fla-l: “Sinhor, si nho krê, nho pode bira-m linpu.”
3 Nton, el stika mô, el toka na kel ómi i el fla-l: “N krê! Bira linpu.” Kel óra kel ómi fika linpu di lépra.
4 Dipôs Jizus fla-l: “Toma kuidadu pa bu ka konta ningen. Má ba mostra saserdóti i faze un oférta sima Muizés manda, asi pa es odja ma dja bu sta kuradu.”
5 Kantu el entra na Kafarnaun, un xéfi di trópa txiga na el, ta pidi-l ajuda.
6 El fla: “Sinhor, nha sérvu sta paralizadu. El sta na kaza detadu i el sta sufri txeu.”
7 Jizus fla-l: “Óras ki N txiga la, N ta kura-l.”
8 Kel xéfi di trópa responde: “Sinhor, N ka merese pa nho entra baxu di nha tétu, má basta nho fla un palavra i nha sérvu ta kuradu.
9 Pamodi ami tanbê N ten algen ki ta da-m órdi i N ten trópas ki N ta da órdi. I N ta fla un: ‘Bai!’ i el ta bai. I N ta fla kel otu: ‘Ben!’ i el ta ben. I N ta fla nha skravu: ‘Faze kel-li!’ i el ta faze.”
10 Kantu Jizus obi kel-li, el fika dimiradu, i el fla pa kes algen ki staba ta sigi-l: “N ta fla nhos verdadi, ma na Israel, nunka N ka atxa ningen ku un fé grandi sima kel-li.
11 Má N ta fla nhos ma txeu algen ta ben di lésti i di oésti, i es ta xinta na méza ku Abraon, Izaki i Jakó na Reinu di séu.
12 Má, kes fidju di Reinu ta ben botadu la fóra na sukuru. É la ki es ta txora i es ta rintxa* denti.”
13 Nton, Jizus fla kel xéfi di trópa: “Bu pode bai pa kaza. Pa kontise ku bo sima fé ki bu mostra.” I kel sérvu kuradu kel óra.
14 Kantu Jizus entra na kaza di Pedru, el odja sógra di Pedru detadu na kama ku fébri.
15 Jizus pega-l na mô i kel fébri sai di el. Nton, el labanta i el kumesa ta sirbi Jizus.
16 Dipôs ki fika noti, pesoas leba txeu algen ki tinha dimónis. I ku un sinplis órdi, el tra kes spritu i el kura tudu kes ki staba duenti,
17 asi pa kunpri kes palavra ki proféta Izaías fla: “El leba nos duénsa i el karega nos dór.”
18 Kantu Jizus odja un monti di algen na se vólta, el manda se disiplus pa es bai pa kel otu ladu di mar.
19 I un instrutor di lei txiga na el i el fla-l: “Instrutor, N ta sigi-u pa undi bu bai.”
20 Má Jizus fla-l: “Rapozas ten ses braku i pasus di séu ten ses ninhu, má Fidju di Ómi ka ten undi poi kabésa.”
21 Nton, otu disiplu fla-l: “Sinhor, dexa-m ba intera nha pai primeru.”
22 Jizus fla-l: “Kontinua ta sigi-m, i dexa mortus intera ses mortu.”
23 Kantu Jizus entra na un barku, se disiplus bai djuntu ku el.
24 Dipôs, kumesa un tenporal fórti na mar i óndias staba ta kubri barku. Má Jizus staba ta durmi.
25 Es bai korda-l, i es fla-l: “Sinhor, djuda-nu pamodi nu sta kuazi ta móre!”
26 Má, el fla-s: “Pamodi ki nhos sta ku tantu medu si,* ómis di poku fé?” Nton, el labanta i el manda béntu ku mar pa para, i tudu kuza fika kalmu.
27 Nton, kes ómi fika spantadu i es fla: “Kel-li é ki tipu di algen? Ti mésmu béntu ku mar ta obi ku el.”
28 Kantu el txiga na kel otu ladu di mar, na téra di gadarenus, dôs ómi ki tinha dimónis sai di simitériu i es bai inkontra ku el. Es éra tantu violéntu ki ningen ka tinha koraji di pasa na kel strada.
29 I es grita: “Kuzê ki bu krê di nos, Fidju di Deus? Bu ben li pa kastiga-nu antis di ténpu markadu?”
30 Lonji di la, staba un monti porku ta kume.
31 Nton, kes dimóni kumesa ta inplora-l: “Si bu tra-nu di es, manda-nu pa kes porku.”
32 I el fla-s: “Nhos bai!” Nton, es sai di kes ómi i es entra na kes porku. Tudu kes porku kai di rótxa, es da déntu mar i es móre fogadu.
33 Kes algen ki ta tomaba kónta di kes porku fuji, es entra na sidadi i es konta tudu kuza, i tanbê kuzê ki kontise ku kes ómi ki tinha dimónis.
34 Nton sidadi interu sai i es bai inkontra ku Jizus, i, kantu es odja-l, es pidi-l pa el sai di la.
Nótas di rodapé
^ Ô: “perta; nheme”. Un sinal di raiba i dizusperu.
^ Ô: “nhos ka sta xinti suguru”.
