Karta di Tiagu 2:1-26
2 Nhas irmon, nhos sta ta mostra fé na nos Sinhor Jizus Kristu ki sta xeiu di glória i omésmu ténpu nhos sta faze diferénsa di algen?
2 Si un ómi ku anel di oru na dédu i ku ropa finu entra na nhos runion, má un ómi póbri ku ropa suju tanbê entra,
3 nhos ta da más ónra pa kel ki sta bistidu ku ropa finu i nhos ta fla-l: “Xinta li na un lugar midjór”, i nhos ta fla kel póbri: “Fika di pé” ô: “Fika la na txon djuntu di nha bankinhu ki N ta poi pé”?
4 Si nhos faze si, nhos ka sta ta faze diferénsa di kunpanheru, i nhos ka sta ta julga pesoas di manera mariadu?
5 Nhas irmon ki N krê txeu, nhos obi. Deus ka skodje kes algen ki mundu ta atxa ma é póbri pa bira riku na fé i pa erda Reinu, ki el promete pa kes ki ta ama-l?
6 Má, nhos sta ta trata póbri sen ruspetu. É ka kes ki é riku ki sta ta maltrata nhos i ta rasta nhos pa tribunal?
7 É ka es ki ta pâpia mal di kel bon nómi ki nhos dadu?
8 Si nhos kunpri kel lei di rei, sima Skrituras ta fla: “Ama bu prósimu sima bu kabésa”, nhos sta ta faze dretu.
9 Má si nhos kontinua ta mostra diferénsa, nhos sta ta faze pekadu i lei ta mostra klaru ma nhos é pekador.
10 Pamodi si algun algen obi ku Lei interu, má el fadja ti mésmu na kunpri un di kes mandamentu, el ta bira kulpadu di viola Lei interu.
11 Pamodi kel ki fla: “Bu ka debe faze adultériu”, tanbê fla: “Bu ka debe mata”. Má, si bu ka faze adultériu má bu mata, bu ta bira kulpadu di viola lei.
12 Nhos kontinua ta pâpia i ta konporta sima kes algen ki ta ben julgadu pa lei di un povu ki é livri.*
13 Pamodi kenha ki ka ta mostra mizerikórdia ta ben julgadu sen mizerikórdia. Mizerikórdia ta vense julgamentu.
14 Nhas irmon, pa kuzê ki ta sirbi si un algen ta fla ma el ten fé, má el ka ten óbra? Kel fé ka ta pode salva-l, ka simé?
15 Si algun irmon ô irman tene falta di ropa* i el ka tene kumida ki ta txiga pa kel dia,
16 i un di nhos ta fla-l: “Bai na pas, pa bu ten ropa i kumida pa kada dia”, má bu ka da-l kel ki se korpu sta ta meste, pa kuzê ki kel-la ta sirbi?
17 Di mésmu manera, fé el sô, sen óbra, sta mortu.
18 Má un algen ta fla: “Bu ten fé i ami N ten óbra. Mostra-m bu fé sen óbra, i N ta mostra-u nha fé através di nhas óbra.”
19 Bu ta kridita ma ten sô un Deus? Bu sta ta faze rei di dretu. Ti dimónis ta kridita i es ta treme di medu.
20 Ó ómi iginoranti, bu ka sabe ma fé sen óbra ka ta sirbi?
21 É ka Abraon, nos pai, ki txomadu justu pamodi óbra dipôs ki el oferese Izaki, se fidju, na altar?
22 Odja ma el mostra se fé djuntu ku se óbra i ma se fé bira perfeitu pamodi se óbra.
23 Asi kunpri un párti di Skrituras ki ta fla: “Abraon poi fé na Jeová,* i Deus fla ma el é justu”, i el fika ta txomadu di amigu di Jeová.*
24 Nhos odja ma un ómi ta txomadu justu pamodi óbra, i ka sô pamodi fé.
25 Di mésmu manera, Raabi, kel prostituta, tanbê ka txomadu di justu pamodi óbra, dipôs ki el resebe dretu kes mensajeru i el manda-s bai pa otu kaminhu?
26 Na verdadi, sima korpu sen spritu* sta mortu, tanbê fé sen óbra sta mortu.
Nótas di rodapé
^ Na gregu ta fla: “lei di liberdadi”.
^ Na gregu ta fla: “Si algun irmon ô irman sta nu”.
^ Ô: “folgu”.
