Óras ki bu kumesa ta vive djuntu ku bu maridu ô bu mudjer, pode kontise txeu prubléma. Kel-li pode kontise, pamodi kada un di nhos ta pensa i ta xinti di manera diferenti, ô pamodi manera ki nhos kriadu. Tanbê nhos pode ten prublémas pamodi otus kuza ki pode kontise, sima falta di kumida, un dizastri na naturéza ô mórti di un algen na família.

Pode parse ma é más faxi fuji di kes prubléma. Má Bíblia ta konsedja-nu pa nu lida ku es. (Mateus 5:23, 24 ) I bu ta odja ma midjór manera di lida ku prublémas é óras ki nu ta sigi konsedjus di Bíblia.

KUZÊ KI BÍBLIA TA FLA: ‘Ten un ténpu pa pâpia’. (Eclesiastes 3:1, 7 ) Nhos ranja un ténpu pa nhos pâpia di kel prubléma. Ser onéstu ku bu maridu ô bu mudjer, dexa-l sabe modi ki bu sta xinti i kuzê ki bu ta pensa sobri kel asuntu. Sénpri ‘pâpia verdadi’ ku bu maridu ô bu mudjer. (Efésios 4:25 ) Sikrê bu sta xatiadu, ka bu dexa raiba pô-u ta briga. Un respósta brandu ka ta dexa un konbérsu sinplis bira un géra. — Provérbios 15:4; 26:20.

Sikrê bu ka ta konkorda ku bu maridu ô bu mudjer, fika kalmu, nunka ka bu skese di mostra amor i ruspetu pa bu maridu ô bu mudjer. (Colossenses 4:6 ) Nhos tenta rezolve kel prubléma más faxi ki nhos pode, i ka nhos para di pâpia ku kunpanheru. — Efésios 4:26.

KUZÊ KI BU PODE FAZE:

• Nhos ranja un óra sértu pa pâpia di kel prubléma.

• Óras ki txiga bu vês di obi, ivita tendénsia di korta konbérsu. Spéra bu vês di pâpia.

KUZÊ KI BÍBLIA TA FLA: ‘Nhos ten amizadi fórti pa kunpanheru. Nhos ser primeru na da ónra pa kunpanheru.’ (Romanos 12:10 ) Manera ki bu ta obi é inportanti. Tenta ntende kuzê ki bu maridu ô bu mudjer ta pensa. Tenta poi na se lugar i ser umildi. (1 Pedro 3:8; Tiago 1:19 ) Ka bu finji ma bu sta obi. Sénpri ki da, para di faze kel ki bu sta faze i presta tudu atenson na bu maridu ô bu mudjer. Ô tanbê bu pode pergunta-l si nhos pode pâpia di kel asuntu más tardi. Trata bu maridu ô bu mudjer sima un algen ki nhos sta na mésmu ekipa envês di un algen ki sta kóntra bo. Asi bu ‘ka ta ofende faxi’. — Eclesiastes 7:9.

KUZÊ KI BU PODE FAZE:

• Kontinua ta obi i seta kuzê ki bu maridu ô bu mudjer sta ta fla, sikrê bu ka gosta.

• Ka bu obi sô palavras. Tenta ntende kuzê ki bu maridu ô bu mudjer sta ta fla-u. Kuzê ki se odju, se jéstu i se ton di vós sta ta mostra?

KUZÊ KI BÍBLIA TA FLA: ‘Ten vantaji na tudu tipu di trabadju duru, má fika sô ta pâpia ta poi algen na pobréza.’ (Provérbios 14:23 ) Konkorda ku un asuntu é un bon soluson, má sô kel-li ka ta txiga. Nhos debe faze sima nhos disidi. Kel-li pode ser difísil, má ta bale péna. (Provérbios 10:4 ) Si nhos trabadja djuntu sima un ekipa, nhos ta ten ‘un bon rekonpénsa’ pa sforsu ki nhos ta faze. — Eclesiastes 4:9

KUZÊ KI BU PODE FAZE:

• Nhos disidi kuzê ki kada un di nhos ta faze pa rezolve nhos prubléma.

• Sima ténpu ta pasa, nhos djobe si nhos sta ta midjora.