LUZIA É MANKU DI UN PÉRNA. Kantu el éra mininu, el panha poliomeliti, ki é un duénsa ki ta pega faxi i ki ta ataka nérvus na korpu. Kantu Luzia tinha 16 anu, kel mudjer ki el ta trabadjaba pa el fla-l: “Deus pô-u fika manku pamodi bu ka obi ku bu mai i bu foi mau ku el.” Alguns anu dipôs, Luzia inda ta lenbra modi ki el xinti dizanimadu kantu el obi kel-li.

KANTU DAMARIS FIKA TA SABE MA EL TINHA KÁNSER NA KABÉSA, se pai fla-l: “Kuzê ki bu faze pa kel-li kontise ku bo? Di sertéza bu faze algun kuza rei di mariadu. É pur isu ki Deus sta ta kastiga-u.” Kes palavra li poi Damaris ta fika txeu dizanimadu.

Dja ten txeu ténpu ki pesoas ta kridita ma duénsa é kastigu di Deus. Ten un livru a na inglês, ki ta fla modi ki pesoas ta pensaba kantu Jizus staba na Téra. Txeu algen ta kriditaba ma “duénsa éra rezultadu di pekadus ki kel própi duenti faze ô ki se família faze.” I un otu livru b tanbê na inglês, fla ma monti anu dipôs di Jizus “pesoas ta atxaba ma Deus ta uzaba duénsa pa kastiga-s pamodi ses pekadu.” Dja ten más di 600 anu ki milhons di algen na Europa interu móre pamodi Pesti Negra. Nton, éra Deus ki staba ta kastiga kes algen mau? Ô kel duénsa éra pamodi mikróbius, sima spesialistas diskubri más tardi? Alguns algen pode pergunta: Deus ta uza duénsa pa poi pesoas ta sufri pamodi ses pekadu? c

PENSA NA KEL-LI: Si Deus ta uzaba duénsa i sufrimentu pa kastiga kes algen ki merese, Jizus ta kuraba kes duenti kantu el staba na Téra? Si el fazeba kel-la, el ka sta ta baba kóntra kes julgamentu justu di Deus? (Mateus 4:23, 24) Jizus nunka ka ta fazeba nada ki ta poba el fika kóntra Deus. El fla: ‘Sénpri N ta faze kuzas ki ta dexa-l kontenti’. El fla tanbê: ‘N ta faze tudu sima nha Pai manda-m pa N faze.’ — João 8:29; 14:31.

Bíblia é klaru. Jeová Deus ‘nunka é ka injustu’. (Deuteronómio 32:4) Pur izénplu, Deus nunka ka ta poba un avion kai i mata un monti di algen inosenti sô pa el pode kastiga un algen ki staba na kel avion! Abraon éra un sérvu fiel di Deus ki konxeba se justisa dretu. El fla ma Jeová nunka ka ta ‘distruíba kes algen justu djuntu ku kes algen mau’. (Génesis 18:23, 25) Bíblia ta fla tanbê ma ‘Deus nunka ka ta fazeba kel ki é mau,’ i nen el ‘ka ta fazeba kel ki é mariadu’. — Jó 34:10-12.

Óras ki nu ta sufri, é ka pamodi Deus sta kastiga-nu pa algun pekadu ki nu faze. Jizus dexa kel asuntu li klaru kantu el ku se disiplus odja un ómi ki nase ségu. ‘Se disiplus pergunta-l: “Rabi, ken ki peka i ki poi kel ómi li ta nase ségu? É el ô é se pai ku se mai?” Jizus responde: “É ka kel ómi li ki peka, nen é ka se mai ku se pai, má na se kazu é pa mostradu kes óbra di Deus.”’ — João 9:1-3.

Na kel ténpu, txeu algen ta atxaba ma Deus ta uzaba duénsa i sufrimentu pa kastiga algen. Pur isu, kantu Jizus fla ma nen kel ómi, nen se pai ku se mai ka tinha kulpa, kes disiplu fika spantadu. Jizus ka sô kura kel ómi ségu, má tanbê el mostra ma Deus ka ta kastiga pesoas ku duénsa i sufrimentu. (João 9:6, 7) Kes algen ki sta ta sufri oji pamodi prublémas gravi di saúdi, ta xinti konsoladu di sabe ma Deus é ka kulpadu pa ses sufrimentu.

Bíblia ta garanti-nu

• ‘Pa kuzas mariadu, Deus ka ta provadu, nen el ka ta poi ningen na próva.’ (TIAGO 1:13) Na verdadi, dja ten un monti anu ki kes ‘kuza mariadu’ sima duénsa, dór i mórti sta ta tormenta algen. Má, ka ta dura Deus ta ben kaba ku es.

• Jizus Kristu ‘kura tudu kes ki staba duenti’. (MATEUS 8:16) Di kel manera li, Jizus da-nu un ideia di kuzê ki Reinu di Deus ta ben faze pa tudu kes algen duenti na Téra interu.

• Deus ‘ta linpa di ses odju tudu lágua, i ka ta ten más mórti, nen ka ta ten más tristéza, nen txoru, nen dór. Kuzas di pasadu ka ta ben más.’ — APOCALIPSE 21:3-5.

Nton, pamodi ki nu ta pasa pa tantu dór ku sufrimentu? Dja ten txeu ténpu ki pesoas ta tenta atxa respósta pa kel pergunta li. Si Deus é ka kulpadu, nton kulpa é di kenha? Nu ben odja respósta pa kes pergunta li na kel otu artigu.