UN BARKU sta ta bai Europa, el sta pasa na osianu Atlántiku. Un di kes pasajeru é George Young. El sta kontenti pamodi kes bon rezultadu di se trabadju di pregason na Brazil. a Má, gósi é óra di el konsentra na se novu diziginason. El sta ba leba notísias sábi di Reinu na Spanha ku Purtugal. Nunka ningen ka pregaba inda na kes lugar li. Óras ki el txiga la, el sta ba tenta marka diskursus pa irmon J. F. Rutherford faze i pa el distribui uns 300 mil folhetu.

Kantu irmon Young txiga Lisboa na anu 1925, el atxa un situason difísil. Un ténpu antis, na anu 1910, gentis di partidu republikanu faze un revólta, es kaba ku govérnu di monarkia na Purtugal i es tra Igreja Katólika un bon párti di puder ki el tinha. Nbóra povu dadu más liberdadi, inda es ta fazeba manifestasons i revóltas.

Kantu irmon Young marka diskursus pa irmon Rutherford faze, gentis tenta da un gólpi di stadu na Purtugal i govérnu poi trópas ta kontrola país i es tra povu tudu liberdadi. Sekretáriu di Sociedade Bíblica Britânica e Estrangeira aviza irmon Young ma di sertéza el ta tinha txeu prubléma. Má simé, irmon Young bai pidi pa es dexa-l uza un jináziu di liséu di Camões i el konsigi.

Ti ki enfin txiga dia 13 di maiu, kel dia ki irmon Rutherford ta fazeba diskursu. Gentis staba ku gana di obi-l. Staba kartás na prédius i tinha alguns jornal ta avizaba di se diskursu pa públiku ku téma: “Modi ki nu pode vive pa tudu ténpu na Téra?” Gentis di otu relijion ka perde ténpu na faze pirsigison. Es skrebe un artigu na ses jornal ki ta flaba ses leitoris pa es toma kuidadu ku kes novu “falsus proféta”. Nton es fika na pórta di kel jináziu ta distribui milharis di bruxuras ki ta papiaba mal di ensinus di irmon Rutherford.

Mésmu ku pirsigison, uns 2 mil algen intxi jináziu i tinha más 2 mil algen ki ka konsigi entra. Tinha alguns algen ki krê obiba dretu, nton es subi na uns skada di kórda ki ta fikaba na paredi déntu di jináziu, i tinha otus ki subi riba di kes mákina di faze izersísiu.

Má nen tudu kuza ka kóre dretu. Kes algen ki staba ta faze pirsigison, kumesa ta grita i ta kebra kaderas. Má Rutherford fika kalmu i el subi riba di un méza, asi pa tudu algen pode obiba el. Kantu el kaba di faze se diskursu, la pa un meia-noti, más di 1.200 algen da nómi i ses nderésu pa es resebeba publikasons di Bíblia. Na kel otu dia, un jornal ki txomaba O Século, faze un artigu ki ta papiaba sobri diskursu ki irmon Rutherford faze.

 Na setenbru di 1925, es kumesa ta faze revista A Torre de Vigia na Purtugal. (Un ténpu antis dja es kumesaba ta faze kel revista li na purtugês, na Brazil.) Na kel ténpu, Virgílio Ferguson, ki éra un di kes Studanti di Bíblia na Brazil, staba ta faze planu pa muda pa Purtugal i djuda na trabadju di pregason. Dja el trabadjaba ku irmon Young na un skritóriu pikinoti di Studantis di Bíblia na Brazil. Poku ténpu dipôs, irmon Virgílio ku se mudjer Lizzie, ruma ses maléta i es torna ba trabadja ku irmon Young. Irmon Virgílio txiga déntu d’óra, pamodi lógu dipôs irmon Young mandadu ba prega na otus país, sima União Soviética.

Un ténpu dipôs, dadu gólpi di stadu na Purtugal i kumesa un govérnu di ditadura. Nbóra pirsigison kumesa ta bira kada bês más txeu, irmon Virgílio kontinua na país. El toma alguns medida pa el proteje kel grupu pikinoti di Studantis di Bíblia i pa djuda-s kontinua ta faze ses trabadju. Pur isu, el pidi pa es dexa-l uza se kaza pa faze runion. Es da-l autorizason na otubru di 1927.

Duránti kel primeru anu di ditadura, uns 450 algen na Purtugal sina pa resebe revista A Torre de Vigia. Tanbê através di folhetus i livrus, notísias sábi di Reinu spadja pa txeu tiritóriu ki Purtugal ta governaba, sima Asoris, Angola, Kabu Verdi, Timor-Lésti, Goa, Madera i Mosanbiki.

Na fin di anus 20, un purtugês umildi ki txomaba Manuel da Silva Jordão, ki éra jardineru, muda pa Lisboa. Kantu el ta moraba na Brazil, el obi un diskursu di irmon Young. Manuel ntende lógu ma dja el atxaba verdadi i el krê djudaba irmon Virgílio faze pregason na otus lugar. Pur isu, el bira kolpurtor. Éra si ki es ta txomaba pionerus na kel ténpu. Publikasons di Bíblia kumesa ta inprimidu i ta distribuidu di manera organizadu. Kel-li djuda pa kel novu kongregason na Lisboa kumesa ta omenta.

Na anu 1934, Virgílio ku se mudjer volta pa Brazil. Má simentis di verdadi dja staba spadjadu na Purtugal. Na meiu di kes mudansa ki kontise na Europa pamodi Géra Sivil na Spanha i kel Sugundu Géra na Mundu, kes irmon na Purtugal kontinua lial pa Jeová. Duránti alguns ténpu, kel grupu kuazi ka staba ta omenta. Má kel óbra ganha forsa otu bês na 1947, kantu John Cooke, un misionáriu ki bai Skóla di Jiliádi, txiga Purtugal. Dipôs di kel-li, nunbru di publikadoris ka para di omenta. I mésmu kantu govérnu manda para óbra di Tistimunhas di Jeová na 1962, es kontinua ta omenta. Na dizénbru di 1974 kantu ki dadu liberdadi pa prega, dja tinha más di 13 mil publikador na Purtugal.

Oji, ten más di 50 mil publikador ta prega notísias sábi di Reinu na Purtugal i na txeu país ki ta papiadu purtugês, sima Asoris i Madera. Ten publikadoris na Purtugal oji, ki é bisnétu di alguns di kes ki sisti diskursu ki irmon Rutherford faze na anu 1925, un diskursu ki fika na stória.

Nu ta agradise Jeová i tudu kes irmon fiel, ki mostra koraji pamodi es oferese pa sirbi Jizus Kristu i pa djuda nasons. — Rom. 15:15, 16. — Tradu di dukumentus di Nos stória na Purtugal.