NA KEL lei ki Jeová daba israelitas, ta mostra ma es pode ofereseba ponba ô ponba rola pa fazeba sakrifisiu. Na kes lei sobri sakrifisiu, kes dôs pasu li sénpri ta papiadu di es djuntu i pesoas pode ofereseba un na lugar di kel otu. (Lev. 1:14; 12:8; 14:30) Pamodi ki kel-li éra bon? Un di kes razon é pamodi alvês é ka éra fásil atxaba ponba rola pa es ofereseba. Pamodi?

Na Israel ten txeu ponba rola, má es é un tipu di pasu ki ta sta sénpri ta viaja pa otus lugar na ténpu kalor. Tudu mês di otubru, es ta viaja pa sul, pa kes país más kenti. Dipôs, es ta volta pa Israel na primavéra. (Cân. 2:11, 12; Jer. 8:7) Kel-li krê fla ma na ténpu di friu éra difísil pa un israelita atxaba un ponba rola pa ofereseba pa faze sakrifisiu.

Má kes otu ponba ki es ta ofereseba na sakrifisiu ka ta kustuma viaja, pur isu es ta staba na Israel duránti anu interu. Tanbê, es éra un tipu di ponba ki pesoas ta kriaba. (Konpara ku João 2:14, 16.) Un livru * sobri kes planta i animal ki Bíblia ta pâpia di es, ta fla: “Na tudu kes zóna i na kes sidadi na Palestina, tinha algen ki ta kriaba ponba. Tudu kes algen tinha braku na paredi di ses kaza pa kes ponba viveba na el.” — Konpara ku Isaías 60:8.

Kel-li ta mostra ma Jeová é un Deus di amor i ma el ta ntende situason di se povu. El seta pa israelitas oferese-l kes pasu ki es podia atxaba na Israel duránti anu interu.