Oji nu ta atxa pornografia na tudu lugar. * El pode atxadu na publisidadis, revista di móda, filmis, múzika i revistas. Tanbê na tilivizon, jogus eletróniku, telemóvel, tablet i na internet. Ta parse ma pornografia sta kada bês más konxedu. Oji, más ki antis, más algen i na más lugar sta ta odja pornografia. — Odja kuadru “ Informasons sobri pornografia”.

Tanbê, pornografia sta ta bira kada bês más mariadu. Ten un prufésora * ki skrebe: “Kes imájen ki antis ta atxadu ma éra kel tipu di pornografia más piór ki ten gósi dja bira normal.”

Kuzê ki bu ta atxa? Pornografia é sô un diverson ô el ta prujudika algen? Jizus fla: ‘Tudu arvi bon ta da frutu bon, má tudu arvi mau ta da frutu ki ka bale.’ (Mateus 7:17) Ki tipu di frutu pornografia ta da? Pa bu atxa respósta odja alguns pergunta sobri pornografia.

KUZÊ KI SPESIALISTAS TA FLA: É fásil un algen fika visiadu na pornografia. Alguns spesialista ta fla ki el é sima un dróga.

Brian, * ki éra visiadu na pornografia na internet fla: “N ka ta konsigiba para di odja. Éra sima si N staba drogadu. Kulpa ki N ta xintiba ta poba mi ta treme i ku dór na kabésa. N sforsa txeu pa para, má txeu anu dipôs inda N staba visiadu na pornografia.”

Pesoas ki ta odja pornografia, ta kustuma konta mintira pa sukundi ses vísiu. Pur isu, nu ka ta fika dimiradu pamodi ki txeu di es ta xinti es sô, es ta xinti vergónha, ansiadadi, depreson i raiba. Na alguns kazu, alguns di es, ta pensa na mata kabésa. Serge ki ta baxaba pornografia na se telemóvel kuazi tudu dia fla: “N ta pensaba sô na nha kabésa, N staba dizusperadu. N ta xintiba sen valor, kulpadu, mi sô i dizanimadu. N tinha txeu medu i vergónha di pidi ajuda.”

Sikrê nu odja pornografia sen nu krê, pode ser prigozu. Un sinhora * ki ta faze piskiza sobri pornografia, faze un diskursu na Mérka i el fla kel-li: “Kes imájen di pornografia ta fika gravadu na sérbru ki é difísil i ti inposível di skese.” Suzan ki ten 19 anu i ki odja pornografia na internet, fla: “N ka ta konsigi skese kes imájen i txeu bês es ta parse dirapenti na nha menti. Ta parse ma nunka N ka ta konsigi skese di es.”

KUZÊ KI NU TA PRENDE: Pornografia ta poi un algen ta bira se skravu i kel-la ta traze txeu dór. — 2 Pedro 2:19.

KUZÊ KI SPESIALISTAS TA FLA: “Pornografia ta kaba ku kazamentu i família.” — A Armadilha da Pornografia (The Porn Trap) di Wendy i Larry Maltz.

Alguns manera ki pornografia ta prujudika kazamentus i famílias:

• El ta frakise kunfiansa, amizadi i amor entri maridu ku mudjer. — Provérbios 2:12-17.

• Maridu ô mudjer ta pensa sô na se kabésa. Es ka ta ser amigu di kunpanheru i es ka ta ser filís. — Efésios 5:28, 29.

• Pornografia pode kria ideia mariadu sobri séksu. — 2 Pedro 2:14.

• Maridu ô mudjer ta tenta obriga se kunpanheru faze séksu di un manera suju. — Efésios 5:3, 4.

• Pornografia ta poi un algen ta ser infiel na manera di pensa i na manera di aji. — Mateus 5:28.

Bíblia ta fla ma maridu ku mudjer ka debe ‘trai kunpanheru.’ (Malaquias 2:16) Adultériu é un tipu di traison ki pode kaba ku kazamentu, traze siparason i ti divórsiu. I kel-li ta prujudika fidjus.

Pornografia tanbê pode afeta fidjus di manera más dirétu. Brian, ki dja nu papiaba di el antis, fla: “Kantu N tinha uns 10 anu, N staba ta brinka i sen N krê N atxa revistas di pornografia ki éra di nha pai. N kumesa ta odja-s sukundidu. N ka ta ntendeba pamodi, ma kes imájen ta txomaba mi txeu atenson. Di la, N kumesa ta ten ábitus mariadu ki prujudika-m i kel-la dura txeu anu ti kantu N bira grandi.” Alguns piskiza ta mostra ma pornografia pode poi un jóven ta kumesa se vida seksual más sédu. Tanbê kel-li ta pô-s ta faze séksu ku txeu algen i ta faze séksu di un manera violéntu ki ta afeta ses sentimentu i ses manera di pensa.

KUZÊ KI NU TA PRENDE: Pornografia é sima un venénu na un família ki ten amor i el ta traze dór i sufrimentu. — Provérbios 6:27.

PALAVRA DI DEUS TA FLA: ‘Nhos poi ménbrus di nhos korpu ta fika mortu. . . pa kuzas sima konportamentu seksual mariadu, inpuréza, paxon diskontroladu, dizejus ki ta prujudika-nu i ganánsia, ki é idolatria.’ — Colossenses 3:5.

Nton Jeová * Deus ta ôdia pornografia. Kel-li ka krê fla ma el é kóntra séksu. Jeová kria órgons seksual i el krê pa kes ki é kazadu satisfaze dizeju seksual di kunpanheru i pa es fika más unidu i xinti alegria di ten fidju. — Tiago 1:17.

Modi ki nu sabe ma Jeová ta ôdia pornografia? Nu ben odja alguns motivu.

• El sabe ma pornografia ta kaba ku vida di algen. — Efésios 4:17-19.

• El ta ama-nu i el krê proteje-nu di kes kuza ki ta prujudika-nu. — Isaías 48:17, 18.

• Jeová krê proteje kazamentus i famílias. — Mateus 19:4-6.

• El krê pa nu ser puru i pa nu ruspeta kunpanheru. — 1 Tessalonicenses 4:3-6.

• El krê pa séksu ser linpu i pa nu uza-l ku ruspetu. — Hebreus 13:4.

• Jeová sabe ma pornografia ta poi un algen ta pensa sô na se kabésa i ta ten un ideia mariadu sobri séksu sima Satanás. — Génesis 6:2; Judas 6, 7.

KUZÊ KI NU TA PRENDE: Pornografia ta prujudika kel amizadi ki un algen ten ku Deus. — Romanos 1:24.

Jeová, ten txeu konpaxon pa kes algen ki sta ta luta pa para di odja pornografia. Bíblia ta fla: ‘Jeová ten mizerikórdia i konpaxon, el ten paxénxa i el é xeiu di amor lial. Pamodi el sabe dretu di kuzê ki nu fazedu, el ta lenbra ma nos é di téra.’ (Salmo 103:8, 14) El ta konvida kes algen umildi pa txiga na el asi ‘pa es pode resebe mizerikórdia i atxa bondadi ki ka meresedu, pa djuda-s na ténpu sértu.’ — Hebreus 4:16; odja kuadru “ Kuzê ki pode djuda un algen liberta di pornografia”.

Txeu algen seta ajuda di Deus. Kal ki foi rezultadu? Odja kuzê ki Bíblia ta fla sobri alguns algen ki konsigi vense kes ábitu mariadu: ‘Má nhos labadu, nhos santifikadu, nhos txomadu justu na nómi di Sinhor Jizus Kristu i ku spritu di nos Deus.’ (1 Coríntios 6:11) Sima apóstlu Polu, es pode fla: ‘Pa tudu kuza N ten forsa pamodi kel ki ta da-m puder.’ — Filipenses 4:13.

Suzan konsigi vense vísiu di odja pornografia. El fla: “Jeová é úniku algen ki pode djuda-u fika livri di pornografia. Si bu pidi se ajuda i orientason, bu pode ser se amigu. Nunka el ka ta bandona-u.”