Bu ta atxa ma na futuru kuzas ta ben midjora? Mésmu ku prublémas gravi ki sta ta kontise oji, txeu algen sta sforsa pa mante un atitudi puzitivu. Má nu ten razon pa spéra ma kuzas ta ben midjora? Sin! Bíblia ta da-nu un speransa sértu ma kuzas ta ben midjora.

•  Kuzê ki Bíblia ta promete pa futuru?

•  Kel ki Bíblia ta fla é bon dimás pa ser verdadi?

•  Modi ki kes promésa ta ben kunpri?

•  Na ki ténpu ki kes promésa ta ben kunpri?

•  Modi ki kes promésa di Bíblia pode djuda-nu gósi?

 Bíblia ta pâpia di tudu kes prubléma ki nu sta pasa el. Má, el ta promete ma kes prubléma ka ta dura pa tudu ténpu. Odja alguns izénplu.

•   Probléma: Falta di kaza pa mora

   Kuzê ki Bíblia ta fla: ‘Es ta ben faze kazas i mora na es’. — Isaías 65:21.

   Kuzê ki ta ben kontise na futuru: Tudu algen ta ben ten se kaza.

•   Probléma: Pobréza i falta di trabadju

   Kuzê ki Bíblia ta fla: ‘I kes ki N skodje ta ba goza rezultadu di trabadju di ses mô.’ — Isaías 65:22.

   Kuzê ki ta ben kontise na futuru: Tudu algen ta ben ten trabadju ki es gosta i ki ta pô-s ta xinti filís.

•   Probléma: Injustisa

   Kuzê ki Bíblia ta fla: ‘Prínsipis tanbê ta ben governa ku justisa.’ — Isaías 32:1.

   Kuzê ki ta ben kontise na futuru: Nunka más ningen ka ta tratadu ku injustisa pamodi se rasa, puzison sosial i ningen ka ta ben ser póbri. Tudu algen ta tratadu ku justisa.

•   Probléma: Fómi i falta di kumida ki é bon pa saúdi

   Kuzê ki Bíblia ta fla: ‘Ta ben ten kumida avontádi na Téra, i riba monti ta ben ten un monti kumida.’ — Salmo 72:16.

   Kuzê ki ta ben kontise na futuru: Tudu algen ta ben ten txeu kumida ki é bon pa saúdi. Ningen más ka ta bai durmi ku fómi ô fika disnutridu.

•   Probléma: Krimi i violênsia

   Kuzê ki Bíblia ta fla: ‘I kada un di es ta ben xinta baxu di se pé di uva i baxu di se pé di figu, i ka ta ten ningen pa pô-s ta xinti medu’. — Miqueias 4:4.

   Kuzê ki ta ben kontise na futuru: Tudu algen ta xinti suguru pamodi kes algen mau ka ta izisti más, i ‘kes algen mansu ta ben toma kónta di Téra.’ — Salmo 37:10, 29.

•   Probléma: Géra

   Kuzê ki Bíblia ta fla: ‘Nason ka ta labanta spada kóntra kel otu nason, nen es ka ta prende géra más.’ — Isaías 2:4.

   Kuzê ki ta ben kontise na futuru: Ta ben ten pas na Téra interu. (Salmo 72:7) Ningen más ka ta ben bira un rafujiadu ô txora pamodi un algen ki el krê txeu móre na géra.

•   Probléma: Duénsa

   Kuzê ki Bíblia ta fla: ‘I ningen ki ta mora la ka ta fla: “N sta duenti.”’ — Isaías 33:24.

   Kuzê ki ta ben kontise na futuru: Ningen más ka ta ten difisénsia ô fika duenti. (Isaías 35:5, 6) Bíblia ti mésmu ta promete ma ‘ka ta ten más mórti’. — Apocalipse 21:4.

•   Probléma: Distruison di meiu anbienti

   Kuzê ki Bíblia ta fla: ‘Dizértu i téra séku ta ben fika kontenti, lugar planu di dizértu ta ben grita ku txeu alegria i el ta ben da flor sima asafron.’ — Isaías 35:1.

   Kuzê ki ta ben kontise na futuru: Téra interu ta ben ser un paraízu pa algen mora na el, sima Deus kreba désdi kumésu. — Génesis 2:15; Isaías 45:18.

 É normal bu pensa si. Má, nu ta insentiva-u pa bu anazila más dretu kuzê ki Bíblia ta fla sobri futuru. Pamodi? Pamodi promésas ki sta na Bíblia ka ten nada aver ku kes promésa i previzons ki pesoas ta faze. Kes promésa ki sta na Bíblia é di Deus. Odja pamodi ki es é diferenti:

•   Deus é di kunfiansa. Bíblia ta fla ma Deus ‘ka pode konta mintira’. (Tito 1:2) Tanbê, é sô Deus ki ta konsigi sabe futuru. (Isaías 46:10) Bíblia ten txeu izénplu ki ta mostra ma tudu kel ki Deus ta fla sénpri ta kontise. Pa bu sabe más, odja vídiu Modi ki nu pode ten sertéza ma Bíblia é verdadi?.

•   Deus ten puder di rezolve nos prublémas. Bíblia ta fla ma Deus ten puder di faze ‘tudu kel ki el krê faze’. (Salmo 135:5, 6) Di otu manera, nu pode fla ma ka ten nada ki ta tadja Deus di kunpri se promésa. Tanbê, Deus krê djuda-nu pamodi el ta ama-nu. — João 3:16.

 Má, talvês bu pode pensa: ‘Si Deus krê djuda-nu i el ten puder pa faze kel-li, pamodi ki inda nu tene txeu prubléma?’ Pa bu sabe respósta di es pergunta, odja vídiu Pamodi ki Deus ta dexa sufrimentu kontise?.

 Deus ta ben uza se Reinu, ô un govérnu na Séu, pa kunpri se promésas. El skodje Jizus Kristu pa ser Rei di es Reinu i el da-l responsabilidadi di kuida di Téra i di pesoa ki ta vive na el. Kantu Jizus staba na Téra, el kura kes algen ki staba duenti, el da kumida pa kes ki sta mesteba, el kontrola forsa di naturéza i ti mésmu el resusita mórtus. (Marcos 4:39; 6:41-44; Lucas 4:40; João 11:43, 44) Através di kes kuza li, el mostra kuzê ki el ta ben faze kómu Rei di Reinu di Deus.

 Pa bu sabe más sobri kuzê ki Reinu di Deus ta ben faze pa bo, odja vídiu Kuzê ki é Reinu di Deus?.

 Já já! Modi ki nu ten sertéza di kel-li? Bíblia dja flaba txeu kuza ki ta ben kontiseba óras ki Reinu di Deus sta kuazi ta ben governa Téra. (Lucas 21:10, 11) Oji nu sta odja kes kuza ta kontise sima Bíblia dja flaba.

 Pa bu sabe más, lé kel artigu li “Ki ténpu ki Reinu di Deus ta ben governa Téra?”.

 Un skritor di Bíblia fla ma speransa ki Bíblia ta da-nu é un ‘ánkura pa alma’. (Hebreus 6:19) Sima un ánkura ta aguenta barku duránti un tenpistadi, speransa ki Bíblia ta da-nu pode djuda-nu lida dretu ku nos prublémas. Nos speransa pode djuda-nu mante kalmu, ser filís, pensa dretu i ti midjora nos saúdi. — 1 Tessalonicenses 5:8.