Prublémas di dinheru ta ben dexa di izisti?
Na txeu país diferenti, pesoas ta sai na rua ta faze manifestason pamodi kes prubléma di dinheru ki es ta pasa pa el. Ku COVID-19 situason fika más difísil inda. Pamodi COVID-19 pesoas tevi ki fika na kaza i kel-li pô-s ta xinti falta di txeu kuzas i ti ku difikuldadi na konsigi kuida di ses saúdi. Kes prubléma li poi kel diferénsa entri kes algen riku i kes algen póbri ta bira más txeu i pur isu pesoas kumesa ta faze revólta.
Algun dia nu ta ben vive na un mundu sen prublémas di dinheru? Sin. Bíblia ta mostra modi ki Deus sta ta ben kaba ku kes prublémas ki nu ta pasa pa es.
Prublémas di dinheru ki Deus ta ben rezolve
Prubléma: Ómis ka ta konsigi ranja un manera pa tudu algen ten kel dinheru ki es ta meste.
Soluson: Deus ta ben troka kes govérnu di ómis pa se própi govérnu, Reinu di Deus. El ta ben governa Téra interu la di Séu. — Daniel 2:44; Mateus 6:10.
Rezultadu: Dja ki el ta ben governa Téra interu, Reinu di Deus ta ben kuida di kes asuntu di Téra di manera perfeitu. Ningen ka ta ben sufri más pamodi pobréza ô pamodi medu di ka ten kel ki es meste pa vive. (Salmo 9:7-9, 18) Má, tudu algen ta ben goza di rezultadu di trabadju di ses mô i es ta ben ten un vida sábi djuntu ku ses família. Bíblia ta promete: ‘Es ta ben faze kazas i mora na es; Es ta ben planta lugaris xeiu di pé di uva i kume di ses fruta. Es ka ta faze kazas pa otus algen mora, es ka ta planta pa otus algen ba kume.’ — Isaías 65:21, 22.
Prubléma: Pesoas ka ta konsigi ivita situasons ki ta faze-s sufri i pobréza.
Soluson: Através di se Reinu, Deus ta ben kaba ku tudu kes kuza ki ta poi algen ka ta xinti suguru i ku medu.
Rezultadu: Dibaxu di Reinu di Deus, ningen ka ta ben xinti más falta di kes kuza ki es meste pa es vive. Pur izénplu, géras, falta di kumida i duénsas ki ta spadja faxi ka ta ben ten más. (Salmo 46:9; 72:16; Isaías 33:24) Deus ta fla: ‘Nha povu ta ben mora na un lugar ki ten pas, na kazas suguru i na lugaris di diskansu trankilu.’ — Isaías 32:18.
Prubléma: Kes algen ki é ganansiozu i ki ta pensa sô na ses kabésa, txeu bês ta splora i ta maltrata otus algen.
Soluson: Kes algen ki ta seta pa Reinu di Deus governa-s, ta ben prende mostra ma es ta ama otus algen más di ki ses kabésa. — Mateus 22:37-39.
Rezultadu: Dibaxu di Reinu di Deus, tudu algen ta ben imita amor di Deus ki ‘ka ta djobe sô ses interesi’. (1 Coríntios 13:4, 5) Bíblia ta fla: ‘Ka ta fazedu ninhun stragu nen distruison na nha monti santu, pamodi Téra ta intxi di konhisimentu di Jeová a sima agu ta kubri mar.’ — Isaías 11:9.
Bíblia ta mostra ma nu sta ta vive na fin di ténpu di kel mundu li i ma ka ta dura Deus ta ben kunpri se promésa di kaba ku tudu pobréza. b (Salmo 12:5) Má désdi gósi, kes prinsípiu di Bíblia pode djuda-u lida ku kes prubléma di dinheru ki bu sta pasa pa el. Pur izénplu, odja kes artigu li, “Modi ki nu pode vive ku ménus dinheru?” i “Um conceito equilibrado sobre o dinheiro”.
a Sima Bíblia ta mostra Jeová é nómi di Deus. — Salmo 83:18.
b Pa sabe más sobri pamodi ki bu pode kunfia na Bíblia, odja artigu, “Bíblia é un livru di kunfiansa i ki ta pâpia verdadi.”
Bu pode gosta di kes-li tanbê
SENTINÉLA
Kuzê ki Reinu di Deus ta ben faze?
Jizus sabeba ma é sô Reinu di Deus ki ta ben rezolve tudu kes prubléma na Téra. Kuzê ki Reinu dja faze ki ta da-nu kel sertéza li?
SPLIKASON DI TESTUS DI BÍBLIA
Splikason di Mateus 6:34 — ‘Ka nhos fika preokupadu dimás ku kuzas di kel otu dia’
Jizus ka krê flaba ma nu ka debe faze planu pa futuru.
