Sin, na Bíblia nu ta atxa próvas ki ta mostra klaru ma Deus ta izisti. Bíblia ta insentiva-nu pa nu ten fé na Deus. Má kel fé ka debe ser pa nu kridita di manera ségu na tudu kuza ki relijions ta inxina, má nu debe uza nos ‘kapasidadi di pensa’ i ‘kapasidadi di ntende’. (Romanos 12:1; 1 João 5:20, nóta di rodapé) Odja alguns manera ki Bíblia ta splika kel-li:

•   Manera ki séu ku Téra sta organizadu i vida ki ten na Téra, ta mostra klaru ma izisti un Kriador. Bíblia ta fla: ‘É klaru ki tudu kaza ten un algen ki faze-l, má ken ki faze tudu kuza é Deus.’ (Hebreus 3:4) Nbóra kel manera di pensa li ta parse sinplis, txeu algen ki ten bon skóla ta atxa ma é un próva ki ta konvense algen. a

•   Tudu algen nase ku dizeju di ntende siginifikadu i obijetivu di vida. Mésmu dipôs di nu ten tudu kuza ki nu meste, inda nu ta kontinua ku kel dizeju. Kel-li ta faze párti di kel ki Bíblia ta txoma di ‘nisisidadi spritual’, ki ta inklui kel vontadi di konxe i adora Deus. (Mateus 5:3; Apocalipse 4:​11) Ten kel nisisidadi spritual li ta prova ma Deus ta izisti i tanbê ma el é un Kriador ki ta ama-nu i ki krê pa nu ten un amizadi ku el. — Mateus 4:4.

•   Profesias di Bíblia skrebedu monti ténpu antis di es kontise i es kunpri tintin pa tintin. Kel-li ta mostra klaru ma es ben di Deus. — 2 Pedro 1:​21.

•   Kes algen ki skrebe Bíblia sabia kuzas sobri siênsia ki kes algen di ses ténpu ka ta ntendeba. Pur izénplu, na ténpu antigu txeu algen ta kriditaba ma Téra ta staba riba di un animal, sima un elifanti, un javali ô un boi. Má Bíblia ta fla ma Deus ‘ta susti Téra riba di nada’. (Jó 26:7) Di mésmu manera, Bíblia ta splika dretu ma Téra é un ‘sirklu’. (Isaías 40:22) Txeu algen ta atxa ma splikason ki ta faze más sentidu pa kel asuntu avansadu li, é ma kes skritor di Bíblia resebe kes informason di Deus.

•   É sô Bíblia ki ta responde kes pergunta difísil ki nu ta faze. Óras ki pesoas ka ta atxa respóstas ki ta konvense-s, kel-li pode pô-s ta atxa ma Deus ka ta izisti. Pur izénplu: Si Deus é amor i el é tudu-poderozu, pamodi ki ten txeu maldadi i sufrimentu na mundu? Pamodi ki relijion txeu bês ta poi algen ta faze kuzas mariadu envês di faze kuzas dretu? — Tito 1:16.