Ki ténpu ki fin di mundu ta ben?
Respósta di Bíblia
Pa nu sabe ki ténpu ki fin di mundu ta ben, nu meste ntende kuzê ki siginifika palavra ‘mundu’ na Bíblia. Palavra gregu kósmos ki ta kustuma traduzidu pa ‘mundu’, txeu bês ta siginifika pesoas, prinsipalmenti kes algen ki ka ta faze vontadi di Deus. (João 15:18, 19; 2 Pedro 2:5) Alvês tanbê, kósmos ta siginifika manera ki sosiadadi sta organizadu na pulítika, na relijion i na komérsiu. — 1 Coríntios 7:31; 1 João 2:15, 16. a
Kuzê ki é ‘fin di mundu’?
Frazi fin di ‘mundu’ ki ta parse na txeu traduson di Bíblia, tanbê pode ser traduzidu pa ‘fin di sistéma’ ô ‘fin di ténpus’. (Mateus 24:3; Nova Versão Internacional) Frazi ‘fin di mundu’ ka ten nada aver ku distruison di Téra ô di tudu algen. El ten aver ku fin di kel manera ki sosiadadi sta organizadu oji. — 1 João 2:17.
Bíblia ta fla ma kes ‘algen mau ta ben ser distruídu’ i sô kes algen dretu ki ta ben vive na Téra. (Salmo 37:9-11) Es ta ben ser distruídu na ‘grandi tribulason’ ki ta ben finda na géra di Armajedon. — Mateus 24:21, 22; Apocalipse 16:14, 16.
Ki ténpu ki fin di mundu ta ben?
Jizus fla: ‘Sobri kel dia i kel óra ningen ka sabe, nen anjus na Séu nen Fidju, má sô Pai ki sabe.’ (Mateus 24:36, 42) Tanbê, el fla ma fin ta ben na un ‘óra ki nu ka sta ta spéra’. — Mateus 24:44.
Nu ka sabe ki dia i ki óra ki fin ta ben. Má, Jizus pâpia di txeu kuza ki ta kontiseba antis di fin di mundu. Tudu kes kuza ta faze párti di un ‘sinal’ ki ta mostra ma ténpu di fin sta pértu. (Mateus 24:3, 7-14) Bíblia ta txoma kel ténpu li, di ‘ténpu di fin’. — Daniel 12:4; 2 Timóteo 3:1-5.
Ta resta algun kuza dipôs di fin di mundu?
Sin, Téra ta kontinua ta izisti. Bíblia ta fla ma Téra ‘nunka ka ta tradu di se lugar.’ (Salmo 104:5) Téra ta ben fika xeiu di algen dretu. Bíblia ta fla: ‘Kes algen justu ta ben toma kónta di Téra i es ta ben vive na el pa tudu ténpu.’ (Salmo 37:29) Téra ta ben fika sima Deus kreba:
Téra ta ben bira un paraízu. — Isaías 35:1; Lucas 23:43.
Pesoas ta ben ten suguransa i es ta ben ten tudu kuza ki es ta meste pa es vive. — Miqueias 4:4.
Tudu algen ta ben ten un trabadju ki bale péna i es ta ben ten alegria. — Isaías 65:21-23.
Ningen ka ta ben fika duenti i nen es ka ta ben bira bédju. — Jó 33:25; Isaías 33:24.
a Na alguns Bíblia, palavra gregu aión, tanbê ta traduzidu pa ‘mundu’. Óras, ki el ta uzadu di kel manera li, el ten kuazi mésmu siginifikadu ki kósmos, ki ten aver ku manera ki sosiadadi sta organizadu.
Bu pode gosta di kes-li tanbê
RESPÓSTAS PA PERGUNTAS DI BÍBLIA
Kal ki é sinal di “ténpu di fin”?
Bíblia dja flaba txeu kuza ki ta ben kontiseba omésmu ténpu i ki ta djuda-nu identifika ténpu di fin.
RESPÓSTAS PA PERGUNTAS DI BÍBLIA
Kuzê ki é géra di Armajedon?
Palavra Armajedon ta parse sô un bês na Bíblia, má otus livru di Bíblia ta pâpia di kel géra li tanbê.
ENSINUS DI BÍBLIA
Sprimenta studa Bíblia ku nos
Ten un studu di Bíblia djuntu ku un algen ki ta djuda-u ntende-l.