Algun dia Téra ta ben distruídu?
Respósta di Bíblia
Nau. Téra nunka ka ta ben ser distruídu, nen el ka ta kemadu ku lumi i nen el ka ta trokadu pa otu planéta. Bíblia ta inxina ma Deus kria Téra, asi pa algen mora na el pa tudu ténpu.
‘Téra ta ben ser di kes algen justu i es ta ben vive na el pa tudu ténpu.’ — Salmo 37:29.
‘Deus poi Téra na ses lisérsi; i nunka más el ka ta tradu di se lugar.’ — Salmo 104:5.
‘Téra ta fika pa tudu ténpu.’ — Eclesiastes 1:4.
‘Kel ki forma Téra i ki faze-l, ki finka-l firmi. . . ka kria-l pa nada, má el faze-l pa moradu na el’. — Isaías 45:18.
Ómis ta ben kaba ku Téra?
Deus ka ta ben dexa ómis kaba ku Téra através di poluison, géra, nen ku ninhun otu kuza. Envês di kel-li, el ta ben ‘distrui kes ki sta distrui Téra.’ (Apocalipse 11:18) Modi ki el ta ben faze kel-li?
Deus ta ben troka govérnu di ómis, ki ka ta konsigi proteje Téra, pa un Reinu ô govérnu perfetu, ki sta na Séu. (Daniel 2:44; Mateus 6:9, 10) É Fidju di Deus, Jizus Kristu, ki ta ben governa na kel Reinu li. (Isaías 9:6, 7) Kantu Jizus staba na Téra, el faze milagris ki mostra ma el ten puder di kontrola kes forsa di naturéza. (Marcos 4:35-41) Dja ki Jizus é Rei di Reinu di Deus, el ta ben kontrola Téra interu i kes forsa di naturéza. Jizus ta ben bira tudu kuza novu na Téra otu bês, asi pa Téra ser un paraízu sima jardin di Éden. — Mateus 19:28; Lucas 23:43.
Má Bíblia ka ta inxina ma Téra ta ben ser distruídu ku lumi?
Nau. Txeu algen ta pensa si pamodi alvês 2 Pedro 3:7 ta ntendedu mariadu. Kel testu li ta fla: ‘Séu ku téra ki ta izisti gósi sta ta guardadu pa lumi’. Odja dôs kuza inportanti ki ta djuda-nu ntende kes palavra li:
Na Bíblia kes palavra ‘séu’, ‘téra’ i ‘lumi’ pode siginifika más di ki un kuza. Pur izénplu, Génesis 11:1 ta fla: ‘Téra interu kontinua ta ten sô un língua’. Na kel testu li kel palavra ‘téra’ krê fla kes algen di kel ténpu.
Kes versíklu antis i dipôs di 2 Pedro 3:7 ta mostra kuzê ki siginifika kes palavra séu, téra i lumi ki sta na kel testu la. Versíklus 5 ku 6 ta konpara kel distruison ki versíklu 7 ta pâpia di el ku kel distruison ki kontise ku Dilúviu na ténpu di Nué. Na kel ténpu kel ‘téra’, ki distruídu ku Dilúviu, éra kes algen mau i violéntu. Má nos planéta Téra ka distruídu. (Génesis 6:11) Kes versíklu tanbê ta fla ma kel Dilúviu distrui ‘séu’, ki krê fla kes algen ki ta governaba na kel ténpu. Nton, kes algen violéntu distruídu, má nos planéta ka distruídu. Nué ku se família skapa di kel distruison, i dipôs di Dilúviu, es ku ses disendentis mora na Téra. — Génesis 8:15-18.
Sima kes agu di Dilúviu, kel lumi ki 2 Pedro 3:7 ta pâpia di el, krê fla distruison di algen mau, ka di planéta Téra. Deus ta promete ma ta ben ten un ‘séu novu ku un Téra novu’ i ma ‘ta ben ten justisa’ na es. (2 Pedro 3:13) Kel ‘téra novu’ krê fla kes algen ki ta ben vive na kel ténpu i kel ‘séu novu’ é un govérnu novu, ki ta ben governa kes algen. Kel govérnu li é Reinu di Deus i el ta ben poi Téra ta bira un paraízu xeiu di pas. — Apocalipse 21:1-4.
Bu pode gosta di kes-li tanbê
NHOS KORDA!
Deus promete ma nos planéta ka ta ser distruídu
Ki serteza nu ten ma téra ka ta ben distruídu i ma el ben midjora?
ESSENTIAL BIBLE TEACHINGS
Pamodi ki Deus kria Téra?
Nos Téra é rei di bunitu. El podu na distánsia sértu di sól, ku inklinason sértu i ta da vólta na velosidadi sértu. Pamodi ki Deus kria Téra di kel manera spesial li?
OTUS ASUNTU
Bu pode spéra un futuru midjór
Pamodi ki promésas ki sta na Bíblia ka ten nada aver ku promésas i previzons ki pesoas ta faze?
ESSENTIAL BIBLE TEACHINGS
Kuzê ki é Reinu di Deus?
Na se trabadju di pregason, kuza ki más Jizus pâpia di el éra Reinu di Deus. Dja ten txeu ténpu ki se sigidoris ta ora pa kel Reinu ben.
NOS ORGANIZASON
Pidi un vizita
Pâpia sobri un pergunta di Bíblia ô prende más sobri Tistimunhas di Jeová.