Bambangi ya Yehowa mingi yina ke tubaka ndinga ya Tagalog na Philippines katukaka na bakilometre kuluta 10000 sambu na kuvukana na Roma na insi Italie na lukutakanu mosi ya sipesiali yina salamaka na Yuli 24-​26, 2015.

Na kutadila nsosa mosi, bantu ya Philippines kuluta 850000 ke zingaka ntangu yai na Eropa. Yo yina, kele ti mabundu ya Bambangi ya Yehowa kiteso ya 60 mpi bimvuka ya fioti na Eropa yina ke salaka balukutakanu na ndinga ya Tagalog mpi Bambangi yai ke longaka bantu ya Philippines ya bwala na bo.

Kansi, na lukutakanu ya distrike na Roma, mabundu ti bimvuka yai yonso vukanaka sambu na mbala ya ntete na lukutakanu ya distrike ya bilumbu tatu na ndinga na bo. Bantu 3239 yina vandaka pana, vandaka na kiese ya kuwa konso kilumbu diskure ya nsuka yina Mpangi Mark Sanderson ya Nto-Kimvuka ya Bambangi ya Yehowa vandaka kusala. Mpangi yai vandaka ntete kusala kisalu ya ntangu yonso na Philippines.

Inki luswaswanu kele na kati ya muntu yina ke landa lukutakanu ya distrike na ndinga na yandi mpi yina ke landa yo na ndinga yina yandi me longukaka? Mpangi-nkento Eva, yina ke sansaka bana yandi mosi ke tuba nde: “Mono ke bakisaka ve Kingelesi mbote-mbote, kansi na nzila ya lukutakanu yai ya distrike na ndinga ya Tagalog, malongi ya Biblia me simba kibeni ntima na mono.” Sambu na kuzwa mbongo ya kusala nzietelo katuka na Espagne tii na Italie, yandi ti bana na yandi zole bakaka lukanu ya kudia ve wikendi mosi konso ngonda. Eva ke tuba nde: “Kibansa yina beto salaka fwanaka kibeni sambu mono me bakisa mambu yonso na lukutakanu yai!”

Jasmin yina ke zingaka na Allemagne lombaka nzila na kisalu sambu na kukwenda na lukutakanu ya distrike. Yandi ke tuba nde: “Ntangu fioti na ntwala ya kukwenda bo songaka mono nde mono lenda kwenda ve sambu yo vandaka ti kisalu yina mono fwete manisa. Mono vandaka pima, sambaka Yehowa mpi kwendaka kukutana ti mfumu na mono ya kisalu. Beto yidikaka diaka kisalu na mpila nde mono kwenda na lukutakanu ya distrike! Yo vandaka mpasi na kuzwa dibaku ya nkaka ya kukutana ti bampangi ya Philippines yina katukaka na Eropa ya mvimba.”

Ya kieleka, bampangi mingi ya Philippines na Eropa yambulaka bwala na bo mpi banduku na bo yina kwendaka na bandambu ya nkaka ya Eropa. Lukutakanu ya distrike sadisaka banduku yai mingi na kukutana diaka, kansi ntangu yai bo kumaka bampangi ya kimpeve. (Matayo 12:48-50) Fabrice ke tuba nde: “Kumona bantu ya mono zabaka pesaka ntima na mono kiese!” Na nsuka ya lukutakanu ya distrike, mpangi-nkento mosi vandaka kutuba na ndinga ya ngolo nde, “Yo vandaka lukutakanu mosi ya nene ya dibuta!”