Na bamvula ya me katuka kuluta, mbongo kumaka mpasi mpi bampasi ya nkaka ya luzingu kumaka mingi kuluta na ntwala. Mbangi mosi ya Yehowa na zina ya Edgar ya ke zingaka na insi yai ke tuba nde: “Kaka na bamvula fioti mpamba, luzingu me kuma mpasi mingi. Yo ke monana bonso nde beto me soba insi kukonda kukwenda na insi yango.”

 Inki me sadisaka Edgar na kuyikama? Yandi ke tuba diaka nde: “Mono ti nkento na mono Carmen, beto yindulaka mutindu bamisionere ke zingaka. Bo ke kwendaka kuzinga na bansi yina kinsukami ke vandaka mingi mpi bo ke longukaka mutindu ya kuzinga kukonda bima yina bo vandaka ti yo na bansi na bo. Yo sadisaka beto na kunata luzingu mosi ya kukonda mindondo mpi nkutu na kusala mambu ya beto me salaka ntete ve bonso, kusala mwa bilanga na beto mosi ya ndunda.”

 Kansi Edgar ti nkento na yandi Carmen salaka mambu mingi ya nkaka. Bo salaka mpi yonso sambu na kusiamisa bampangi-babakala mpi bankento, mingi-mingi bayina vandaka kudiyangisa na mabanza. (1 Batesalonika 5:11) Edgar ke tuba nde: “Yo lombaka nde beto pesa bo kikesa. Kansi beto zolaka mpi kusadisa bo na kubakisa nde bo mosi mpi, bo lenda sadisa bampangi ya nkaka ya babakala mpi ya bankento, mpi nde kana bo sala yo, bo ta vanda na kiese ya mingi.”—Bisalu 20:35.

 Na luyantiku ya COVID-19, Argenis bakaka lukanu ya kuta kimbangi na bampangi na yandi ya dibuta. Bamingi ndimaka kulonguka Biblia ti yandi na nzila ya telefone.

 Argenis zolaka mpi nde bampangi na yandi ya dibuta yina vandaka ve ti Internet kulanda lukutakanu ya distrike ya 2020. Mpangi-bakala mosi ya Mbangi ya Yehowa yina ke zingaka na mbanza mosi ya kele pene-pene ti bo, pesaka bo manaka ya lukutakanu yina bo lendaka kulanda na apareyi. Na nima, bo defaka televizio mosi ya nene mpi ba haut-parleurs. Na ntwala ya kulanda lukutakanu ya distrike, Argenis vandaka kubinga bo na telefone sambu na kusala kisambu ti bo. Bikesa na yandi butaka mbuma ya mbote. Bantu 4 ya dibuta na bo mpi bantu ya nkaka 15 landaka lukutakanu yina ya distrike.

 Kaka Jairo ti nkento na yandi Johana bantu ke vandaka ti vwatire na dibundu na bo ya mvimba. Bo ke sadilaka yo na luzolo yonso sambu na kusadisa bampangi ya nkaka. Diambu ya mpasi kele nde, kuzwa karbira ke vandaka mpasi. Jairo ke tuba nde: “Beto ke kingaka bangunga mingi na ndonga sambu na kusumba karbira, bantangu ya nkaka nkutu, beto ke kingaka mpimpa ya mvimba.”

 Sambu na Jairo, yo me fwana kusadisa bampangi mutindu yina. Yandi ke tuba nde: “Ntangu beto ke natilaka bampangi bima, beto ke waka kiese ntangu beto ke monaka mutindu bo ke pesaka mersi na beto ve, kansi na Yehowa, yina ke pesaka bansadi na yandi bima yina bo kele ti yo mfunu.”—2 Bakorinto 9:11, 14.

 Norianni kele mpangi-nkento ya bamvula 30. Kansi yandi vandaka kuyindula nde yandi vandaka toko mingi sambu na kusadisa bantu ya nkaka. Kansi na nima, yandi tangaka 1 Timoteo 4:12 ya ke tuba nde: “Kubika ve nde muntu kuvweza kileke na nge. Kansi, kuma mbandu sambu na bantu ya kwikama.”

 Verse yai pusaka Norianni na kulutisa ntangu mingi ti bampangi ya bambuta na dibundu na bo. Yandi ke sadisaka bo na kulonga na nzila ya kusonika mikanda mpi nkutu, yandi ke lombaka bo na kufidisa yandi ntangu yandi ke zola kulonguka Biblia ti muntu. Yandi ke bingaka bo mpi ke tindilaka bo ba message ya ke pesaka kikesa. Yandi ke tuba nde: “Yehowa me monisaka mono nde mono lenda sala mambu mingi.”

 Bampangi na beto ya babakala mpi ya bankento ya ke zingaka na Vénézuéla ke kutana ti bampasi mingi na ntangu yai ya mpasi. Ata mpidina, bo ke landa kulonga nsangu ya mbote ti kikesa mpi bo “ke lembikaka” bampangi ya nkaka.—Bakolosai 4:11; 2 Timoteo 4:2.