Nzambi me pesaka bantu makuki ya kusolula ti yandi mpi ya kusonga yandi mutindu bo ke kudiwa na nzila ya kisambu. Davidi sambaka nde: “O nge Muntu ya ke waka kisambu, bantu ya mitindu yonso ta kwisa na nge.” (Nkunga 65:2) Ebuna nki mutindu beto lenda samba sambu Nzambi kuwa mpi kusakumuna beto?

Kisambu ta sadisa nge na kukangula ntima na nge na ntwala ya Nzambi sambu nge songa yandi mutindu nge ke kudiwa. (Nkunga 62:8) Nkwa-Ngolo Yonso ke zolaka nde beto samba yandi na ntima ya mvimba.

Ata Nzambi kele ti batitre mingi, yandi kele kaka ti zina mosi. Yandi ke tuba nde: “Mono kele Yehowa. Yo yina zina na mono.” (Yezaya 42:8) Zina Yehowa kele bambala kiteso ya 7 000 na Masonuku ya Santu. Baprofete mingi bingaka Nzambi na zina na yandi mosi. Abrahami tubaka nde: “Pardo Yehowa, . . . bika mono tuba diaka.” (Kuyantika 18:30) Beto mpi fwete sadila zina ya Nzambi, Yehowa ntangu beto ke samba.

Nzambi ke bakisaka beto mbote na konso ndinga yina beto ke samba yandi. Ndinga na yandi ke ndimisa beto nde: “Nzambi ke pona-ponaka ve, kansi na konso dikanda yandi ke ndimaka muntu yina ke tinaka yandi boma mpi ke salaka mambu ya mbote.”—Bisalu 10:34, 35.

Ata mpidina, sambu Nzambi kusakumuna beto, beto fwete sala mambu mingi katula kaka kusamba. Masolo ya ke landa ta tubila mambu yina beto fwete sala.