Kusolula ya kieleka ke vandaka kana beno ke pesana bangindu ti bana na beno mpi ke tubila mawi na beno.

Kusolula ti batoko lenda kuma kibeni mpasi. Ntangu bana na beno vandaka bana ya fioti, bo vandaka kusonga beno mambu yonso. Kansi ntangu yai ya bo me kuma batoko, bo ke songa beno mambu fioti, mpi beno ke zaba diaka ve bangindu mpi mawi na bo. Yo kele bonso nde beno me telama na simu ya nzadi mosi ya nene mpi bana na beno kele na simu yina ya nkaka ya nzadi. Kansi kana yo me salama mutindu yai, bana ke vandaka kibeni na mfunu ya kusolula ti bibuti na bo!

Solula ti bana na ntangu yina bo ke zola. Beno sala yo ata yo ke lomba nde beno solula tii na midi ya mpimpa.

“Ziku nge lenda tuba nde, ‘Nge ke zola nde beto solula ntangu yai? Mono vandaka ti nge kilumbu ya mvimba!’ Kansi sambu na nki nge ke bokuta ntangu bana ke zola kusonga nge mambu yina bo kele na yo? Keti yai kele ve mambu yina bibuti yonso ke zolaka?”—Lisa.

“Ata mono ke zolaka kulala na ntwala, masolo ya nkaka ya mfunu yina mono solulaka ti mwana na mono ya kele toko vandaka na nima ya midi ya mpimpa.”—Herbert.

MUNSIKU YA BIBLIA: “Konso muntu kulanda na kusosa, mambote na yandi mosi ve, kansi ya muntu ya nkaka.”—1 Bakorinto 10:24.

Kubika ve nde kima mosi kukatula nge dikebi. Tata mosi ke tuba nde: “Bantangu ya nkaka mono ke yindulaka mambu ya nkaka ntangu bana na mono ke solulaka ti mono. Bo ke monaka yo mpi bo ke zabaka nde mono ke widikila bo ve!”

Kana nge ke salaka mambu yai, kanga televizio mpi ba-apareyi yonso. Tula kibeni dikebi na mambu yina mwana na nge ke tuba mpi baka yo na valere ata yo lenda monana kukonda mfunu.

“Beto fwete ndimisa bana na beto nde mawi na bo kele mfunu sambu na beto. Kana bo ke bakisa nde beto ke baka ve na valere mambu ya bo ke tuba, bo ta songa beto ve mambu ya bo ke yindula mpi bo ta kwenda kusosa lusadisu kisika ya nkaka.”—Maranda.

“Kuwa ve makasi ata mambu yina mwana na nge ke yindula kele kibeni mbi.”—Anthony.

MUNSIKU YA BIBLIA: “Beno keba na mutindu beno ke wa.”—Luka 8:18.

Sadila mabaku ya mbote. Bantangu ya nkaka bana ke solulaka mpenza kukonda mpasi kana bo ke talana ve ti kibuti.

“Beto ke solulaka ntangu beto kele na kamio. Beto ke solulaka mbote ntangu beto ke vandaka na lweka ya bana kansi ve ntangu beto ke talanaka ti bo.”—Nicole.

Beto ke solulaka mpi ti bana na ntangu ya kudia.

“Ntangu beto ke diaka na nkokila, konso muntu ke tubilaka mambu ya mbi mpi mambu ya mbote yina yandi kutanaka ti yo na kilumbu. Yo ke salaka nde beto vanda na bumosi mpi konso muntu na kati na beto kuzaba nde yandi fwete nwana ve yandi mosi ti bampasi.”—Robin.

MUNSIKU YA BIBLIA: ‘Wa nswalu, mpi kunwanina ve na kutuba.’—Yakobo 1:19.