Ntangu muntu mosi yina beto vandaka kuzola me fwa, beto ke basisaka mansanga sambu beto ta mona yandi diaka ve. Ata Yezu vandaka kuzola Lazare mingi, yandi basisaka ve mansanga sambu Lazare fwaka. Yandi salaka yo sambu na mawa yina yandi vandaka ti yo sambu na dibuta mpi banduku ya Lazare, mutindu baverse ya nkaka ya disolo yina ke monisa yo.​—Yoa. 11:36.

Ntangu Yezu waka sambu na mbala ya ntete nde Lazare ke bela, yandi kwisaka ve nswalu na nzo na bo sambu na kubelula yandi. Disolo yina ke tuba nde: “Ntangu [Yezu] waka nde [Lazare] vandaka kubela, yandi bikalaka diaka bilumbu zole na kisika yina yandi vandaka.” (Yoa. 11:6) Sambu na nki Yezu sukininaka? Yandi vandaka ti lukanu yina pusaka yandi na kusala mpidina. Yandi tubaka nde: “Lukanu ya maladi yai kele ve lufwa, kansi yo kele sambu na nkembo ya Nzambi, na mpila nde Mwana ya Nzambi kubaka nkembo na nzila na yo.” (Yoa. 11:4) Lufwa vandaka ve “lukanu” ya maladi ya Lazare. Yezu zolaka kusadila lufwa ya Lazare “sambu na nkembo ya Nzambi.” Inki mutindu? Yezu zolaka kusala kimangu mosi ya nene na kufutumunaka nduku na yandi ya ngolo.

Ntangu Yezu tubilaka diambu yina na balongoki na yandi, yandi fwanisaka lufwa ti mpongi. Yo yina, yandi songaka bo nde yandi “ke kwenda kuna sambu na kutedimisa [Lazare].” (Yoa. 11:11) Sambu na Yezu, kutedimisa Lazare na lufwa vandaka bonso tata yina ke tedimisa mwana na yandi na mpongi. Yo yina, Yezu vandaka ve ti kikuma ya kuwa mawa sambu na lufwa ya Lazare.

Kansi, inki pusaka Yezu na kubasisa mansanga? Na mbala yai diaka, baverse ya nkaka ya disolo yina ke pesa mvutu. Ntangu Yezu kutanaka ti Maria, mpangi ya Lazare ya nkento mpi monaka yandi ti bantu ya nkaka ke dila, Yezu “waka mpasi mingi na kati na yandi mpi kumaka kisaka-saka.” Kumona mawa na bo pesaka Yezu mpasi mingi na mpila nde yandi “waka mpasi mingi na kati na yandi.” Yo kele kikuma yina “Yezu basisaka mansanga.” Yezu waka mawa mingi na kumona nde banduku na yandi ya ngolo vandaka na mpasi.​—Yoa. 11:33, 35.

Disolo yai ke monisa nde Yezu kele ti ngolo mpi makuki ya kuvutula na luzingu bantu yina beto ke zolaka ya me fwaka, ti mavimpi ya mbote na nsi-ntoto ya mpa yina ke kwisa. Yo ke sadisa beto mpi na kumona nde Yezu ke kuditulaka na kisika ya bantu yina ke fwisaka bampangi mpi banduku na bo na lufwa yina beto me bakaka na Adami. Dilongi ya nkaka ya beto lenda baka na disolo yai kele nde beto fwete monisa mawa sambu na bantu yina me fwila bantu yina bo vandaka kuzola.

Yezu zabaka nde yandi ke kwenda kufutumuna Lazare. Ata mpidina, yandi basisaka mansanga sambu na zola mpi mawa yina yandi vandaka na yo sambu na banduku na yandi. Mutindu mosi, kuditula na kisika ya bankaka lenda pusa beto na ‘kudila ti bantu yina ke dila.’ (Bar. 12:15) Kumonisa mawi yina ke tendula ve nde muntu me konda lukwikilu na kivuvu ya lufutumuku. Yo yina, Yezu bikaka mbandu ya mbote na yina me tala kuditula na kisika ya bantu yina me fwila, na mutindu yandi basisaka mansanga ata yandi zabaka nde yandi ta futumuna Lazare.