Longuka na Ndinga ya Nzambi

Sambu na Nki Nzambi Kepesaka Nzila na Mambi mpi na Bampasi?

Disolo yai kebasisaka bangyufula yina ziku nge mekudiyulaka mpi kemonisaka kisika nge lenda baka bamvutu na Biblia na nge. Bambangi ya Yehowa tasepela na kusolula ti nge na yina metala bangyufula yango.

1. Inki mutindu mambi kuyantikaka?

Mambi kuyantikaka na ntoto ntangu Satana kutubaka luvunu ya ntete. Satana kuvandaka ve kigangwa ya mbi ntangu Nzambi kugangaka yandi. Yandi vandaka wanzyo mosi ya kukuka, kansi yandi kangamaka ve ngolo na “kieleka.” (Yoane 8:44) Yandi yedisaka mpusa ya kubaka lusambu yina yo lombaka nde bantu kupesa kaka na Nzambi. Satana kukusaka Eva, nkento ya ntete, mpi kundimisaka yandi na kulemfukila yandi na kisika ya kulemfukila Nzambi. Adami, kuvukanaka ti Eva na kukolamaka na Nzambi. Desizio yina Adami kubakaka kunataka mpasi mpi lufwa.​—Tanga Kuyantika 3:1-6, 17-19.

Ntangu Satana kupusaka Eva na kukolama na Nzambi, yandi basisaka mbendumuka sambu na kutelamina luyalu ya Nzambi. Bantu mingi kulandaka Satana na kubuyaka Nzambi na kuvanda Mfumu na bo. Yo yina, Satana kukumaka “mfumu ya nsi-ntoto.”​—Tanga Yoane 14:30; Kusonga 12:9.

2. Keti bima yina Nzambi kugangaka kuvandaka mbi?

Bantu mpi bawanzyo yina Nzambi kugangaka, kuvandaka ti makuki ya kukuka ya kulemfuka na bansiku ya Nzambi. (Kulonga 32:5) Nzambi kugangaka bantu ti kimpwanza ya kupona kusala mambu ya mbote to ya mbi. Kimpwanza yina kepesaka beto dibaku ya kumonisa zola na beto sambu na Nzambi.​—Tanga Yakobo 1:13-15; 1 Yoane 5:3.

3. Sambu na nki Nzambi mepesaka nzila na bampasi?

Tuka ntangu yina mbendumuka kubasikaka na Edeni, Yehowa mepesaka nzila nde bantu kukolama na luyalu na yandi. Sambu na nki? Sambu na kumonisa nde bikesa yina bantu kesalaka sambu na kuyala kukonda Nzambi, tanata ve mambote. (Yeremia 10:23) Na nima ya bamvula 6 000 ya disolo ya luzingu ya bantu, mbutu ya mbendumuka yina memonanaka. Luyalu ya bantu menungaka ve na kumanisa mvita, nku, kukonda lunungu, mpi maladi.​—Tanga Longi 7:29; 8:9; Roma 9:17.

Kansi, bantu yina kendimaka nde, Nzambi kuvanda Mfumu na bo kebakaka mambote. (Yezaya 48:17, 18) Kubika fyoti, Yehowa tafwa baluyalu yonso ya bantu. Kaka bantu yina mendimaka nde Nzambi kuyala bo, bantu tazinga na ntoto.​—Yezaya 2:3, 4; 11:9; tanga Daniele 2:44.

  4. Ntima-nda ya Nzambi kepesaka bantu nki dibaku?

Satana kutubaka nde, ata muntu mosi ve lenda bikala ya kwikama na Nzambi. Ntima-nda ya Nzambi kepesaka beto yonso dibaku ya kumonisa kana beto kendima luyalu ya Nzambi to ya bantu. Beto kemonisaka nsola yina beto kesalaka, na mutindu yina beto ketwadisaka luzingu na beto.​—Tanga Yobi 1:8-11; Bingana 27:11.

5. Inki mutindu beto keponaka nde Nzambi kuvanda Mfumu na beto?

Beto keponaka nde Nzambi kuvanda Mfumu na beto, ntangu beto kesosaka lusambu ya kyeleka mpi kesadilaka malongi na yo yina kekatukaka na Biblia, Ndinga na yandi. (Yoane 4:23) Beto kebuyaka mpi kudikotisa na mambu ya politiki mpi na bitumba, mutindu Yezu kusalaka.​—Tanga Yoane 17:14.

Satana kesadilaka ngolo na yandi sambu na kusyamisa bantu na kusala bisalu ya mansoni mpi ya mbi. Ntangu beto kebuyaka mambu ya mutindu yai, banduku na beto yankaka mpi bampangi ya dibuta lenda seka beto to kumenga beto. (1 Piere 4:3, 4) Yo yina, beto fwete sala nsola. Keti beto tavukana ti bantu yina kezolaka Nzambi? Keti beto talemfuka na bansiku na yandi ya mayele mpi ya zola? Kana beto sala buna, beto tamonisa nde Satana kukusaka ntangu yandi tubaka nde, ata muntu mosi ve zolaka kulemfuka na mambu yina Nzambi kutubaka.​—Tanga 1 Korinto 6:9, 10; 15:33.

Sambu na kuzaba mambu mingi, tala kapu 11 ya mukanda yai, yina Bambangi ya Yehowa mebasisaka. Inki Biblia Kelongaka Mpenza?

[Kifwanisu ya kele na lutiti 12]

Adami kusalaka nsola mosi ya mbi

[Kifwanisu ya kele na lutiti 13]

Nsola na beto kemonisaka kana beto kezola nde, Nzambi kuvanda Mfumu na beto to ve