“Nzambi ya zulu tatula kimfumu mosi yina bo ta bedisa ve. Mpi kimfumu yango ta luta ve na maboko ya bantu yankaka. Yo ta fwa mpi ta sukisa bimfumu yai yonso, mpi yo ta yala mvula na mvula.”​—Daniele 2:44, NW.

Kimfumu ya Nzambi kele luyalu yina kele na zulu. Yezu Kristu, Mfumu yina Nzambi me solaka, ta yinga bimfumu yonso ya bantu mpi ta sala na mpila nde luzolo ya Nzambi kusalama na zulu mpi na ntoto. (Matayo 6:9, 10) Ata luyalu mosi ve ta yinga luyalu yai sambu yo kele “kimfumu ya mvula na mvula ya Mfumu na beto mpi Ngulusi Yezu Kristu.” Yo ta tula ngemba ya kimakulu.​—2 Piere 1:11.

“Satana yandi mosi ke landa na kudikitula bonso wanzio ya nsemo. Yo yina, yo kele ve diambu ya kuyituka kana bansadi na yandi mpi ke landa na kudikitula bonso bansadi ya lunungu. Kansi nsuka na bo ta vanda na kutadila bisalu na bo.”​—2 Bakorinto 11:14, 15.

Yo ta monana pwelele nde mabundu ya luvunu kele bisalu ya Diabulu mpi bo ta katula yo na ntoto. Kimbeni yina ke vandaka na kati ya mabundu ta vanda diaka ve mpi yo ta tiamuna menga diaka ve. Yo ta pesa bantu yonso ya “Nzambi ya moyo mpi ya kieleka” dibaku ya kusambila yandi na “lukwikilu mosi” mpi “na mpeve mpi na kieleka.” Yo ta nata kibeni ngemba mpi bumosi!​—1 Batesalonika 1:9; Baefezo 4:5; Yoane 4:23.

“Nzambi yandi mosi ta vanda ti bo. Mpi yandi ta kusula mansanga yonso na meso na bo, lufwa ta vandaka diaka ve; mawa, bidilu, mpi mpasi ta vandaka diaka ve. Mambu ya ntama me vila.”—Kusonga 21:3, 4.

Yehowa Nzambi ta sala mambu yai na nzila ya Mwana na yandi, Yezu, yina pesaka luzingu na  yandi sambu na bantu. (Yoane 3:16) Na lutwadisu ya Yezu, bantu ta kuma ya kukuka. Bampasi ta vanda diaka ve sambu “Nzambi yandi mosi ta vanda ti bo” mpi yandi ta katula “mansanga yonso na meso na bo.” Ntama mingi ve, kukonda kukuka mpi bampasi ta kuma mambu ya ntama; ‘bantu ya mbote ta baka ntoto mpi ta zinga tii kuna.’​—Nkunga 37:29.

“Yandi [Yezu Kristu] simbaka dragoni, nioka ya ntama, yina kele Diabulu mpi Satana, mpi kangaka yandi bamvula 1000. Ebuna yandi losaka yandi na dibulu ya nda, kangaka yo, mpi tulaka kidimbu na zulu na yo, na mpila nde yandi kusa diaka ve makanda.”​—Kusonga 20:2, 3.

Bupusi yonso ya Satana ta mana ntangu bo ta losa yandi ti bademo na yandi na “dibulu ya nda,” disongidila nkadilu ya kukonda kisalu. Bo ta sala diaka ve bantu mbi. Yo ta vanda kiese kibeni na kuzinga na nsi-ntoto ya me konda bupusi ya Satana mpi ya bampeve ya mbi!

“Bilumbu ya nsuka” ta suka na diambu yina Yezu bingaka “mpasi ya nene.” Yandi tubaka nde: “Na ntangu yina mpasi ya nene ta vanda, mpasi mosi ya me bwaka ntete ve katuka na luyantiku ya nsi-ntoto tii bubu yai, ve, mpi yo ta bwa diaka ve.”​—Matayo 24:21.

Mpasi yina ta vanda nene sambu yo ta basisa bampasi yina bantu me monaka ntete ve. Yo ta suka na “bitumba ya kilumbu ya nene ya Nzambi Nkwa-Ngolo Yonso,” yina me zabanaka na zina “Armagedoni.”​—Kusonga 16:14, 16.

Bantu ya bisika yonso yina ke zolaka mambu ya mbote ke vingila nsuka ya ngidika yai ya mbi ya bima. Bika beto tadila ntete mwa balusakumunu yina ke vingila bo na nsi ya Kimfumu ya Nzambi.

“Kibuka mosi ya nene” ta guluka mpi ta zinga na nsi-ntoto ya mpa ya ngemba: Ndinga ya Nzambi ke tuba nde “kibuka ya nene” ya bantu yina ntalu na bo me zabana ve ta “katuka na mpasi ya nene” mpi ta guluka sambu na kuzinga na nsi-ntoto ya mpa ya lunungu. (Kusonga 7:9, 10, 14; 2 Piere 3:13) Yezu Kristu, “Mwana-Dimeme ya Nzambi yina ke katula disumu ya nsi-ntoto,” muntu ta gulusa bo.​—Yoane 1:29.

Malongi ya Nzambi ta nata mambote ya mingi: Na nsi-ntoto ya mpa, ‘ntoto ta fuluka ti nzayilu ya Yehowa.’ (Yezaya 11:9) Malongi yai ya Nzambi ta vanda ti bantuma ya me tala mutindu ya kuzinga na ngemba ti bantu yonso mpi na kuwakana ti bima yina kele na nziunga na bo. Nzambi ke sila nde: ‘Mono Yehowa Nzambi na nge, mono muntu ke longa nge sambu na mambote na nge, mono muntu ke twadisa nge na nzila ya nge fweti tambula.’​—Yezaya 48:17.

Bantu yina beto vandaka kuzola ya me fwaka ta futumuka: Ntangu Yezu vandaka na ntoto, yandi tedimisaka nduku na yandi Lazare na bafwa. (Yoane 11:1, 5, 38-44) Mpidina, yandi monisaka mambu yina yandi ta sala na kiteso ya nene na Kimfumu ya Nzambi.​—Yoane 5:28, 29.

Ngemba mpi lunungu ta vanda kimakulu: Na luyalu ya Kristu, kufwa nsiku ta kuma diambu ya ntama. Inki mutindu beto me zaba yo? Sambu Yezu kele ti makuki ya kutanga mambu yina kele na bantima, mpi yandi ta sadila makuki yina sambu na kusambisa bantu ya lunungu mpi ya mbi. Bantu yina ke buya kusoba banzila na bo ya mbi, ta baka ve dibaku ya kuzinga na nsi-ntoto ya mpa ya Nzambi.​—Nkunga 37:9, 10; Yezaya 11:3, 4; 65:20; Matayo 9:4.

Beto me tadila kaka mwa bambikudulu ya Biblia yina ke monisa mambu ya kitoko yina ta salama ntama ve. Ntangu Kimfumu ya Nzambi ta yala ntoto, “ngemba” ya mingi ta vanda kimakulu. (Nkunga 37:11, 29) Bisina yonso ya bampasi ya bantu ta vanda diaka ve. Beto lenda ndima yo sambu Nzambi yandi mosi ke tuba nde: “Tala! Mono ke sala bima yonso ya mpa. . . . Mambu yai kele ya kwikama mpi ya kieleka.”​—Kusonga 21:5.