Keti yo fwanaka sambu Davidi kuvingila nde Nzambi kutudila yandi dikebi? Keti Nzambi ke kudibanzaka sambu na nge? Bantu mingi ke ndimaka ve nde Nzambi nkwa-ngolo yonso ke tudilaka bo dikebi. Sambu na nki?

Sambu Nzambi me luta mpenza bantu na nene. Yandi kele ti kiyeka ya kuluta nene mpi bantu yonso “kele bonso ditonzi mosi ya masa, bonso mbuma mosi ya zelo me bwa na kilo.” (Yezaya 40:15) Nsoniki mosi ya ke tulaka ntembe ya bilumbu na beto tubaka na lulendo yonso nde “yo kele diambu mosi ya mpamba na kukwikila nde Nzambi ke tudilaka nge ti mambu ya nge ke salaka dikebi.”

Bantu ya nkaka ke yindulaka nde bikalulu na bo ke pesaka ve Nzambi nzila ya kutudila bo dikebi. Mu mbandu, Jim bakala mosi ya bamvula na kati ya 50 ti 60 ke tuba nde: “Mono ke sambaka konso ntangu sambu mono vanda na ngemba mpi kudiyala kansi mono ke waka diaka makasi na nima. Nsuka-nsuka, mono me monaka nde mono kele muntu ya mbi kibeni mpi Nzambi lenda sadisa mono ve.”

Keti Nzambi ke tudilaka ve bantu dikebi sambu yandi kele ntama kibeni ti bo? Inki mutindu yandi ke monaka mpenza bigangwa na yandi ya kukonda kukuka? Kana Nzambi me songa ve bantu ngindu na yandi, ata muntu mosi ve lenda tuba mambu ya Nzambi mpi kupesa mvutu na bangiufula yai. Kansi Biblia, nsangu ya kupemama yina Nzambi me pesaka bantu ke ndimisa beto nde Nzambi kele ve ntama ti bantu sambu na kutudila bo dikebi. Biblia ke tuba nde: “Ya kieleka, yandi kele ntama ve ti konso muntu na kati na beto.” (Bisalu 17:27) Na masolo iya yina ke landa, beto ta tadila mambu yina Nzambi ke zabisa beto sambu na dikebi yina yandi ke tudilaka bantu mpi mutindu yandi me tudilaka dezia bantu yina vandaka bonso nge dikebi.