Mono butukaka na Baku na Azerbaïdjan. Beto butukaka bana zole mpi mono kele mwana ya nsuka. Papa na mono vandaka Muzuluma mpi mama muntu ya dibundu ya Bayuda. Bibuti na mono vandaka kuzolana mpi kuwakana ata bo vandaka na mabundu ya kuswaswana. Mama vandaka kusadisa papa ntangu yandi vandaka kudia ve na nsungi ya Ramadan mpi papa vandaka kusadisa mama ntangu yandi vandaka kuta nkinsi ya Paki. Na nzo, beto vandaka ti Koran, Torah mpi Biblia.

Mono vandaka Muzuluma. Ata mono vandaka kukwikila nde Nzambi kele, mambu ya nkaka vandaka kuyangisa mono. Mono vandaka kudiyula nde: ‘Sambu na nki Nzambi gangaka bantu mpi sambu na nki bantu fwete niokwama luzingu na bo ya mvimba na bilungi?’ Sambu bantu vandaka kutuba nde mambu yonso ya ke salamaka kele luzolo ya Nzambi, mono vandaka kudiyula nde: ‘Keti Nzambi ke vandaka na kisina ya mambu yina ke kuminaka bantu mpi ke sepelaka na kumona bo ke niokwama?’

Ntangu mono lungisaka bamvula 12, mono yantikaka kusala kisambu yina Bamizuluma ke salaka mbala tanu konso kilumbu (namaz). Na ntangu yina, papa tindaka mono ti mpangi na mono na nzo-nkanda ya Bayuda. Katula mambu ya beto vandaka kulonguka, bo longaka beto Kiebreo mpi mikanda tanu ya ntete yina Moize sonikaka. Konso kilumbu na ntwala ya kuyantika nzo-nkanda, beto vandaka kusamba mutindu Bayuda ke sambaka. Na suka, mono vandaka kusala kisambu ya Bamizuluma na nzo kansi na nzo-nkanda, mono vandaka kusala kisambu ya Bayuda.

Mono vandaka ti mpusa ya ngolo ya kubaka bamvutu ya kieleka na bangiufula na mono. Mbala mingi na nzo-nkanda, mono vandaka kuyula bantwadisi ya Bayuda nde: “Sambu na nki Nzambi gangaka bantu? Sambu papa kele Muzuluma, nki mutindu Nzambi ke tadilaka yandi? Yandi kele muntu ya mbote kansi sambu na nki beno ke monaka yandi mvindu? Sambu na nki Nzambi gangaka yandi?” Bamvutu na bo vandaka ve ya kieleka mpi mono vandaka kundima yo ve.

Na 2002, mono vandaka kukwikila diaka ve na Nzambi. Beto katukaka na nsi na beto mpi kwendaka na Allemagne. Mposo mosi mpamba na  nima, papa belaka maladi ya ngolo (accident vasculaire cérébral) mpi vandaka kudizaba diaka ve. Mono vandaka kusamba bamvula mingi sambu dibuta na beto kuvanda mbote. Mono vandaka kundima nde kaka Nkwa-Ngolo Yonso muntu kele na kiyeka na zulu ya luzingu mpi ya lufwa, yo yina mono vandaka kusamba yandi konso kilumbu sambu na papa. Mono vandaka kuyindula nde: ‘Yo kele pete sambu Nzambi kulungisa mambu yina mwana ya fioti ke lomba yandi na masonga yonso.’ Mono tulaka ntima nde yandi ta pesa mvutu na bisambu na mono, kansi papa fwaka.

Mono lembaka nitu mpi waka mpasi sambu mono monaka nde Nzambi waka ve bisambu na mono. Mono kudiyulaka nde: ‘Keti mono muntu ke sambaka mbote ve’ to ‘Nzambi kele ve?’ Yo pesaka mono mpasi mpi mono vandaka kusala diaka ve kisambu ya bamizuluma. Mono kumaka kumona mabundu yonso mpamba mpi bakisaka nde Nzambi kele ve.

Bangonda sambanu na nima, Bambangi ya Yehowa kokulaka na kielo na beto. Sambu beto vandaka kutudila ve Bakristu ntima, mono ti mpangi na mono zolaka kumonisa bo na luzitu yonso nde bo ke vandaka na kifu. Beto yulaka bo nde: “Sambu na nki Bakristu ke sambilaka Yezu, kulunsi, Maria mpi biteki ya nkaka kansi Bansiku Kumi ke buyisaka yo?” Na nsadisa ya Masonuku, Bambangi ndimisaka beto nde Bakristu ya kieleka ke sambilaka ve biteki kansi bo ke sambilaka Nzambi mpamba. Mono yitukaka mpenza.

Na nima, beto yulaka bo nde: “Sambu na nki beno ke kwikilaka na Butatu? Kana Yezu kele Nzambi, nki mutindu yandi lenda zinga na ntoto mpi bantu kufwa yandi?” Bo sadilaka diaka Biblia sambu na kupesa beto mvutu mpi bo tendudilaka beto nde Yezu kele ve Nzambi mpi yandi kele ve kiteso mosi ti Nzambi. Sambu na kikuma yai, Bambangi monisaka nde bo ke kwikilaka ve na Butatu. Mono yitukaka mpi kuditubilaka nde: ‘Bakristu yai me swaswana mpenza.’

Diaka, mono zolaka kuzaba sambu na nki bantu ke fwaka mpi sambu na nki Nzambi me pesaka nzila na bampasi. Bambangi pesaka mono mukanda Nzayilu ya Kenataka na Luzingu ya Mvula na Mvula, * yina vandaka ti bakapu ya ke pesa bamvutu na bangiufula na mono. Bo yantikaka mbala mosi kulonguka Biblia ti mono.

Na konso mbala ya beto vandaka kulonguka, bamvutu ya Biblia vandaka kusimba ntima na mono. Mono zabaka mpi nde zina ya Nzambi kele Yehowa. (Nkunga 83:19) Kikalulu na yandi ya nene kele zola ya kukonda bwimi. (1 Yoane 4:8) Yandi gangaka bantu sambu yandi pesa bo dikabu ya luzingu. Mono bakisaka nde ata Nzambi ke pesaka nzila na mambu ya kukonda lunungu, yandi ke mengaka yo mpi ntama mingi ve yandi ta manisa yo kimakulu. Mono longukaka mpi nde kukolama ya Adami ti Eva me natilaka bantu bampasi. (Baroma 5:12) Malanda ya nkaka ya mbi ya yo me natilaka bantu kele lufwa ya bantu ya mono ke zolaka, mu mbandu lufwa ya papa. Kansi, Nzambi ta katula mambu yai yonso na nsi-ntoto ya mpa, kisika yina bantu ya me fwaka ta futumuka.—Bisalu 24:15.

Biblia pesaka bamvutu na bangiufula na mono. Mono yantikaka diaka kukwikila na Nzambi. Ntangu mono zabaka Bambangi ya Yehowa mbote-mbote, mono bakisaka nde bo kele na dibuta ya bampangi ya ntoto ya mvimba. Bumosi mpi zola ya bo vandaka kumonisa yitukisaka mono. (Yoane 13:34, 35) Mambu ya mono longukaka sambu na Yehowa pusaka mono na kusadila yandi, yo yina mono bakaka lukanu ya kukuma Mbangi ya Yehowa. Mono bakaka mbotika na Yanuari 8, 2005.

Malongi ya Biblia me sadisaka mono na kutadila luzingu na mutindu ya mbote. Malongi ya kutudila ntima ya mono sengumunaka na Ndinga ya Nzambi natilaka mono ngemba ya ntima. Kivuvu ya lufutumuku yina Ndinga ya Nzambi ke silaka ke pesaka mono kikesa mpi kiese sambu mono ta mono diaka papa.—Yoane 5:28, 29.

Mono ke vandaka na kiese sambu Jonathan, bakala mosi ya ke tinaka Nzambi boma me kwelaka mono bamvula sambanu me luta. Beto zole me bakisaka nde kieleka ya me tala Nzambi kele ya siki-siki, ya pete, mpi kele kimvwama ya mbalu mingi. Yo yina, beto ke sepelaka na kuzabisa lukwikilu mpi kivuvu na beto ya kitoko na bantu ya nkaka. Bubu yai, mono me bakisaka nde Bambangi ya Yehowa kele Bakristu ya kieleka mpi mutindu na mono ya kutadila bo me sobaka.