Mono yelaka na mbanza Alicante, na esti ya Espagne pene-pene ya nzadi-mungwa. Dibuta na beto vandaka ti bikalulu ya mbi. Yo yina, ntangu mono kumaka toko, mono vandaka kuzinga na bala-bala. Nzo na beto vandaka pene-pene ti kisika ya bo ke yidikaka bapine ya kaminio. Mono taka kinduku ti José Maria, muntu mosi ya vandaka kusala kuna. Yandi vandaka muntu ya kikesa mpi yandi vandaka kutudila mono dikebi kuluta bantu ya dibuta na mono. Na bantangu ya mpasi, yandi vandaka kusadila mono mambu bonso mpangi na mono ya dibuta. Yandi vandaka nduku na mono ya kieleka ata yandi vandaka mbuta na mono ya bamvula 20.

José María yantikaka kulonguka Biblia ti Bambangi ya Yehowa. Yandi vandaka kuzola Biblia mingi mpi yandi vandaka kulonga mono Biblia mbala mingi. Mono vandaka kuwidikila yandi na luzitu yonso kansi mono vandaka ve kutula dikebi na mambu yina yandi vandaka kutuba. Mono vandaka toko mpi mono vandaka ti mambu mingi ya kusala. Kansi, mambu sobaka.

Mono ke zolaka ve kutubila mingi aksida yina mono salaka na moto. Kansi, diambu ya mono lenda tuba kele nde mono kondaka mayele mpi salaka buzoba. Luzingu na mono ya mvimba sobaka kaka na kilumbu mosi. Mono vandaka toko mosi ya kikesa, kansi na kintulumukina mono belaka paralizi mpi bo nataka mono na lupitalu. Yo vandaka mpasi sambu mono ndima mambu yai ya kuminaka mono. Mono vandaka kudiyula mbala na mbala nde: ‘Inki kele mfunu ya luzingu?’

José María kwisaka kutala mono mpi yandi bakaka bangidika nswalu sambu Bambangi ya Yehowa ya kisika yina kukwisa kutala mono na lupitalu. Bo vandaka kutala mono mbala na mbala mpi baviziti na bo simbaka ntima na mono. Na nima ya kubaka lusansu ya ngolo, mono yantikaka kulonguka Biblia. Mono zabaka kikuma yina bantu ke monaka mpasi, ke fwaka mpi sambu na nki Nzambi ke pesaka nzila nde mambu ya mbi kukumina bantu. Diaka, mono zabaka mambu yina Nzambi ta sala na bilumbu ya ke kwisa, mu mbandu, ntoto ta fuluka ti bantu ya kukuka mpi ata muntu mosi ve ta tuba diaka nde: “Mono ke bela.” (Yezaya 33:24) Yai vandaka mbala ya ntete ya mono kumaka ti kivuvu ya kitoko na luzingu na mono.

Ntangu mono basikaka na lupitalu, mono landaka kulonguka Biblia. Nkutu, mono yantikaka kukwenda na balukutakanu mpi kusamuna sambu mono vandaka ti velo ya bikata. Na Novembri 5, 1988 ntangu mono vandaka ti bamvula 20, mono bakaka mbotika. Bo dindisaka mono ya mvimba na dilonga mosi ya nene ya masa. Yehowa Nzambi me sadisaka mono na kuvanda ti mabanza ya mbote sambu na luzingu. Kansi, nki mambu mono lenda sala sambu na kumonisila yandi ntonda?

Mono bikaka ve nde kimbefo na mono kukanga mono nzila na kusadila Yehowa. Yo yina, yo lombaka nde mono yela na kimpeve. (1 Timoteo 4:15) Na luyantiku, yo vandaka ve pete sambu bantu ya dibuta na mono telaminaka dibundu na mono ya mpa. Kansi, mono kumaka ti bampangi ya Bakristu, disongidila bampangi ya babakala mpi ya bankento. Bo vandaka kusadisa mono na kukwenda na balukutakanu mpi na kubasika na kisalu ya kusamuna.

Na nima, yo lombaka nde mono baka lusansu mosi ya ngolo mpimpa-ntangu. Na nima ya kusosa nzo ya lusansu, mono monaka nzo mosi ya bo ke sansaka bantu ya kele ti bifu na nitu. Nzo yango vandaka na mbanza Valence na kitamina ya bakilometre 160 na nordi ya Alicante. Kisika yai me kumaka nzo na mono kibeni.

Ata mono ke kukaka ve kutelama na mbeto mono mosi, mono me bakaka lukanu ya kulanda kusadila Yehowa. Mbongo yina luyalu ke pesaka beto me sadisaka mono na kusumba ordinatere mpi mono me tulaka yo na lweka ya mbeto na mono. Mono sumbaka mpi telefone. Muntu yina ke sadisaka mono ke kangudila mono ordinatere ti telefone. Sambu na kusadila ordinatere na mono, mono ke sadilaka apareyi mosi ya mono ke niemaka ti kibeku. Diaka, mono ke vandaka ti kanti mosi buna ya mono ke tulaka na munoko. Kanti yango ke sadisaka mono na kusonika na ordinatere mpi na kusonika nimero na telefone.

Inki mutindu bisadilu yai ya teknolozi ke sadisaka mono? Ntete-ntete, yo ke sadisaka mono na kukota na site Internet jw.org mpi na biblioteke ya kele na Internet. Yo kele bisadilu ya kitoko mpenza sambu na mono! Konso kilumbu, mono ke bakaka ntangu mingi sambu na kulonguka mpi kusala bansosa na mikanda yina ke tendulaka Biblia. Kusala mutindu yai ke sadisaka mono na kulanda kulonguka mambu ya Nzambi mpi bikalulu na yandi ya kitoko. Kana mono ke kudiwa mono mosi to me lemba nitu, mono ke zwaka kima mosi na site Internet na beto ya ke pesaka mono kikesa.

Ordinatere na mono mpi ke sadisaka mono na kulanda balukutakanu mpi na kupesa bamvutu. Mono lenda sala kisambu, masolo mpi nkutu kutanga Nzozulu ya Nkengi kana bo me lomba mono na kusala yo. Ata mono ke kukaka ve kukwenda na balukutakanu, mono ke monaka ntangu yonso nde mono kele mfunu na dibundu na beto.

Diaka, ordinatere mpi telefone ke sadisaka mono na kusala mingi na kisalu ya kusamuna. Ya kieleka, mono lenda samuna ve nzo na nzo bonso Bambangi ya Yehowa ya nkaka. Ata mpidina, mono ke landaka kaka kusamuna. Bisadilu yai ke sadisaka mono na kulonga bantu ya nkaka Biblia. Mono ke sepelaka mingi na kusolula ti bantu na telefone. Nkutu, bankuluntu ya dibundu na beto me pesaka mono mukumba ya kutwadisa bakampanye ya kisalu ya kusamuna na nzila ya telefone. Bakampanye yai ke sadisaka bampangi ya dibundu ya me kotaka nzo sambu na kimbefo.

Kansi, luzingu na mono me simbama kaka ve na teknolozi. Konso kilumbu, banduku na mono ke kwisaka kutala mono. Bo ke kwisaka ti bampangi na bo ya kinsuni mpi ti bantu ya nkaka ya ke sepelaka na kulonguka Biblia. Mbala mingi, bo ke lombaka mono na  kutwadisa kulonguka ya Biblia. Bantangu ya nkaka, bampangi ya kele ti mabuta ke kwisaka kutala mono mpi bo ke lombaka mono na kusala lusambu ya dibuta ti bo. Mono ke sepelaka mingi ntangu bana-fioti ke vandaka na lweka ya mbeto na mono mpi ke zabisaka mono kikuma yina ke pusaka bo na kuzola Yehowa.

Mono ke vandaka na kiese ya kuyamba bantu mingi. Shambre na mono ke vandaka mbala mingi ya kufuluka ti bantu. Banduku na mono ya ke katuka ntama mpi ya ke vandaka pene-pene ke kwisaka kutala mono. Zola yina bampangi ke monisilaka mono ke yitukisaka bantu ya ke salaka na kisika ya mono ke bakaka lusansu. Konso kilumbu, mono ke pesaka Yehowa matondo sambu yandi me sadisaka mono na kuvanda na kati ya kimvuka ya bampangi.

Konso ntangu ya bantu ke pesaka mono mbote mpi ke yulaka mavimpi na mono, mono ke vutulaka nde: “Mono ke landa kaka na kunwana!” Mono me zaba nde mono mpamba ve ke nwanaka bitumba ya mutindu yai. Ata bampasi to mambu ya luzingu ya Bakristu yonso kele nki mutindu, beto yonso ke nwanaka bitumba, disongidila ke ‘nwanaka ngolo sambu na kuvanda kaka na lukwikilu.’ (1 Timoteo 6:12) Inki me sadisaka mono na kulanda kunwana ti kimbefo bamvula mingi? Konso kilumbu, mono ke sambaka Yehowa mpi ke pesaka yandi matondo sambu yandi me sadisaka mono na kuvanda ti luzingu mosi ya kele ti lukanu. Diaka, mono ke zolaka kuvanda ntangu yonso ti mambu mingi ya kusala na kisalu ya Nzambi mpi mono ke landaka kaka kuvingila kivuvu yina yandi me pesaka beto.

Mbala mingi, mono ke yindulaka nsi-ntoto ya mpa mpi mutindu mono ta bakaka diaka ntinu. Bantangu ya nkaka, mono ke salaka nsaka ti nduku na mono José María yina ke belaka maladi ya buka-buka. Beto ke tubilaka mutindu beto ta bakaka ntinu na nsi-ntoto ya mpa. Mono ke yulaka yandi nde: “Nani ta luta muntu ya nkaka na ntinu?” Yandi ke vutulaka nde: “Yo kele ve mfunu na kuzaba nani ta luta muntu ya nkaka, kansi diambu ya kuluta mfunu kele kuvanda na paladisu sambu na kubaka ntinu.”

Yo vandaka ve pete sambu mono yikana ti kimbefo ya mutindu yai. Mono ke zaba nde ntangu mono vandaka toko, mono salaka diambu mosi ya buzoba ya me natilaka mono bampasi ya mingi kibeni. Mono ke tonda Yehowa mingi sambu yandi me yambulaka mono ve. Yandi me pesaka mono bima mingi, mu mbandu, dibuta ya nene ya kimpeve, luzolo ya kuzinga, kiese ya kusadisa bantu ya nkaka mpi kivuvu ya kitoko sambu na bilumbu ya ke kwisa. Kana mono fwete tuba na bunkufi mambu yonso ya Yehowa me salaka sambu na mono, mono lenda tuba nde yandi me pesaka mono bima mingi kuluta yina mono zolaka kuzwa.