Ezekiele 39:1-29
39 “Ebuna nge, mwana ya muntu, bikula mambu ya mbi sambu na Gogi+ mpi songa yandi nde, ‘Yehowa Mfumu ya Kuluta Nene me tuba nde: “Mono ke nwanisa nge, Gogi, mfumu ya bamfumu* ya Mesheki mpi ya Tubale.+
2 Mono ta balula nge mpi ta twadisa nge, mpi mono ta sala nde nge kwisa kutombuka katuka na bisika ya kuluta ntama ya nordi,+ mpi mono ta nata nge na zulu ya bangumba ya Izraele.
3 Mono ta bula munduki na nge ya tolo-tolo na diboko na nge ya kimama sambu yo bwa mpi mono ta sala nde batolo-tolo na nge kukatuka na diboko na nge ya kitata mpi kubwa.
4 Nge ta bwa na zulu ya bangumba ya Izraele,+ nge ti basoda na nge yonso mpi bantu yonso yina ta vanda ti nge. Mono ta pesa nge na bandeke ya mitindu yonso ya ke diaka misuni mpi na bambisi ya mfinda sambu nge kuma madia na bo.”’+
5 “‘Nge ta bwa na nseke,+ sambu mono muntu me tuba,’ Yehowa Mfumu ya Kuluta Nene muntu me tuba.
6 “‘Mono ta tinda tiya sambu yo yoka Magogi mpi bantu yina ke zinga na lutaninu na bisanga,+ ebuna bo ta zaba nde mono kele Yehowa.
7 Mono ta sala nde zina na mono ya santu kuzabana na kati ya bantu na mono Izraele, mpi mono ta pesa diaka ve nzila nde bantu kuvweza zina na mono ya santu; ebuna makanda ta zaba nde mono kele Yehowa,+ Santu na Izraele.’+
8 “‘Ee, yo ke kwisa, mpi yo ta salama,’ Yehowa Mfumu ya Kuluta Nene muntu me tuba. ‘Yai kele kilumbu yina mono tubilaka.
9 Bantu yina ke zinga na bambanza ya Izraele ta basika mpi ta pedisa tiya ti binwaninu—bitaninu ya fioti* mpi bitaninu ya nene, minduki ya batolo-tolo mpi batolo-tolo, banti ya bitumba* mpi makonga. Bo ta sadila yo sambu na kupedisa tiya+ bamvula nsambwadi.
10 Bo ta vanda ve ti mfunu ya kubaka bankuni na bilanga to ya kuvukisa bankuni ya kupedisila tiya na bamfinda, sambu bo ta sadila binwaninu sambu na kupedisa tiya.’
“‘Bo ta baka bima ya bantu yina bakaka bima na bo na bitumba, mpi bo ta botula bima ya bantu yina vandaka kubotula bo bima,’ Yehowa Mfumu ya Kuluta Nene muntu me tuba.
11 “‘Na kilumbu yina, mono ta pesa Gogi+ maziamu mosi kuna na Izraele, na muwanda ya bantu yina ke salaka nzietelo na esti ya nzadi-mungwa, mpi yo ta kanga nzila ya bantu yina ke luta. Kuna bo ta zika Gogi ti bimvuka na yandi yonso ya nene ya bantu, ebuna bo ta binga yo Muwanda ya Hamoni-Gogi.*+
12 Nzo ya Izraele ta sala bangonda nsambwadi na kuzika bo sambu na kukumisa insi bunkete.+
13 Bantu yonso ya insi ta sala kisalu ya kuzika bo, mpi diambu yai ta sala nde bo zabana na kilumbu yina mono ta kudipesa nkembo,’+ Yehowa Mfumu ya Kuluta Nene muntu me tuba.
14 “‘Bo ta pona bantu sambu na kuluta na insi mbala na mbala mpi kuzika bamvumbi yina bikalaka na zulu ya ntoto, sambu na kukumisa yo bunkete. Bo ta landa kusosa bangonda nsambwadi.
15 Ntangu bantu yina ke luta na insi ta mona mukwa ya muntu, bo ta tula kidimbu mosi na lweka na yo. Ebuna, bantu yina bo ponaka na kuzika ta zika yo na Muwanda ya Hamoni-Gogi.+
16 Yo ta vanda mpi ti mbanza mosi kuna, zina na yo Amona.* Ebuna bo ta kumisa insi bunkete.’+
17 “Kansi nge, mwana ya muntu, Yehowa Mfumu ya Kuluta Nene me tuba nde: ‘Tuba na bandeke ya mitindu yonso mpi na bambisi yonso ya mfinda nde, “Beno vukana kumosi mpi beno kwisa. Beno vukana na nziunga ya kimenga na mono yina mono ke yidikila beno, kimenga mosi ya nene na zulu ya bangumba ya Izraele.+ Beno ta dia misuni mpi ta nwa menga.+
18 Beno ta dia misuni ya bantu ya ngolo mpi ta nwa menga ya bamfumu ya ntoto—mameme ya babakala, bana-mameme, bankombo, mpi bangombe—bambisi yonso ya mafuta-mafuta ya Bashani.
19 Beno ta dia mafuta na lukasi yonso mpi ta nwa menga tii kuna beno ta lawuka kimenga yina mono yidikilaka beno.”’
20 “‘Na mesa na mono, beno ta dia bampunda, bantu yina ke tambusaka bapusu-pusu, bantu ya ngolo, ti basoda ya mitindu yonso+ tii kuna beno ta fuluka,’ Yehowa Mfumu ya Kuluta Nene muntu me tuba.
21 “‘Mono ta monisa nkembo na mono na kati ya makanda, mpi makanda yonso ta mona ndola yina mono pesaka ti ngolo* yina mono monisaka na kati na bo.+
22 Yantika kilumbu yina, nzo ya Izraele ta zaba nde mono kele Yehowa Nzambi na bo.
23 Ebuna makanda ta zaba nde bo nataka nzo ya Izraele na insi ya nzenza sambu na kifu na bo mosi, sambu bo kondaka kwikama na meso na mono.+ Yo yina mono bumbilaka bo luse na mono+ mpi mono pesaka bo na maboko ya bambeni+ na bo, ebuna bo yonso bwaka na mbele ya bitumba.
24 Mono sadilaka bo mambu na kutadila mambu na bo ya mvindu mpi masumu na bo, mpi mono bumbilaka bo luse na mono.’
25 “Yo yina Yehowa Mfumu ya Kuluta Nene me tuba nde: ‘Mono ta vutula bantu ya Yakobi+ yina bo nataka na kimpika mpi ta wila nzo ya mvimba ya Izraele mawa;+ mpi na kikesa yonso mono ta nwanina* zina na mono ya santu.+
26 Na nima ya kubaka nsoni sambu na mambu na bo yonso ya kukonda kwikama yina bo sadilaka mono,+ bo ta zinga na lutaninu na insi na bo, mpi ata muntu mosi ve ta pesa bo boma.+
27 Ntangu mono ta katula bo na kati ya bantu mpi ta vutula bo, mpi ntangu mono ta katula bo na kati ya bansi ya bambeni na bo+ mpi ta vukisa bo kumosi, mono ta kudisantisa mpi na kati na bo na meso ya makanda mingi.’+
28 “‘Bo ta zaba nde mono kele Yehowa Nzambi na bo ntangu mono ta tinda bo na kimpika na kati ya makanda mpi ta vukisa bo na nima sambu bo vutuka na insi na bo, mpi mono ta bikisa ve ata muntu mosi na kati na bo na nima.+
29 Mono ta bumbila bo diaka ve luse na mono,+ sambu mono ta tiamuna mpeve na mono na zulu ya nzo ya Izraele,’+ Yehowa Mfumu ya Kuluta Nene muntu me tuba.”
Banoti na nsi ya lutiti
^ To “mfumu ya nene.”
^ Kitaninu mosi ya fioti, mbala mingi bantu ya ke sadilaka munduki ya tolo-tolo bantu vandaka kulwata yo.
^ To mbala ya nkaka, “batolo-tolo ya maboko,” munduki mosi yina vandaka ti nsongi.
^ To “Muwanda ya Bimvuka ya Nene ya Bantu ya Gogi.”
^ Yo ke tendula “Bimvuka ya Nene ya Bantu.”
^ Na kisina, “diboko.”
^ Na kisina, “ta monisa nde mono ke lombaka nde bo kangama kaka na.”
