Kulonga 4:1-49
4 “Ntangu yai, O Izraele, wa bansiku mpi bankanu yina mono ke longa beno na kuzitisa, sambu beno zinga,+ beno kota mpi beno baka insi yina Yehowa, Nzambi ya ba-nkaka na beno, ke pesa beno.
2 Beno fwete yika ve ata kima mosi na mambu yina mono ke songa beno, beno fwete katula mpi ve ata kima mosi na mambu yina,+ sambu na kuzitisa bantuma ya Yehowa Nzambi na beno, yina mono ke pesa beno.
3 Meso na beno mosi monaka mambu yina Yehowa salaka Baale ya Peore; Yehowa Nzambi na beno fwaka na kati na beno konso muntu yina landaka Baale ya Peore.+
4 Kansi beno bantu ya ke kangama na Yehowa Nzambi na beno, beno yonso kele na luzingu bubu yai.
5 Tala, mono me longa beno bansiku mpi bankanu,+ kaka mutindu Yehowa Nzambi na mono me songa mono, sambu beno zitisa yo na insi yina beno ta baka.
6 Beno fwete zitisa+ yo mbote-mbote, sambu yo ta monisa na ntwala ya bantu yina ta wa bansiku yai yonso nde beno kele ti mayele+ mpi mayele ya kubakisa mambu,+ ebuna bo ta tuba nde, ‘Ya kieleka, dikanda yai ya nene kele dikanda ya bantu ya mayele mpi ya kele ti mayele ya kubakisa mambu.’+
7 Sambu, inki dikanda ya nene kele ti banzambi pene-pene ti yo mutindu Yehowa Nzambi na beto ke vandaka pene-pene ti beto konso ntangu yina beto ke bingaka yandi?+
8 Inki dikanda ya nene kele ti bansiku mpi bankanu ya lunungu bonso Nsiku yai yonso ya mono ke tula na ntwala na beno bubu yai?+
9 Kangula meso mpi keba kibeni,* sambu nge vila ve mambu yina meso na nge me mona mpi sambu yo katuka ve na ntima na nge bilumbu yonso ya luzingu na nge. Nge fwete zabisa yo mpi na bana na nge mpi na bantekolo na nge.+
10 Kilumbu ya nge telamaka na ntwala ya Yehowa Nzambi na nge na Orebi, Yehowa tubilaka mono nde, ‘Vukisa bantu na ntwala na mono sambu bo wa mambu na mono,+ na mpila nde bo longuka na kuwa mono+ boma bilumbu yonso ya bo kele na luzingu na ntoto mpi sambu bo longa bana na bo.’+
11 “Yo yina beno kwisaka mpi telamaka na nsi ya ngumba, mpi ngumba yina vandaka kupela tiya tii na zulu kibeni;* mpimpa ti dituti mosi ya ndombe kibeni vandaka pana.+
12 Ebuna Yehowa yantikaka kutubila beno na kati ya tiya.+ Beno waka makelele ya bangogo, kansi beno monaka ve ata kima mosi+—ndinga+ mpamba vandaka kuwakana.
13 Yandi zabisaka beno kuwakana na yandi,+ yina yandi songaka beno na kuzitisa—Bansiku Kumi.*+ Na nima, yandi sonikaka yo na zulu ya matadi zole yina.+
14 Na ntangu yina, Yehowa songaka mono na kulonga beno bansiku mpi bankanu, yina beno fwete zitisa na insi yina beno ta kota sambu na kubaka.
15 “Yo yina, beno keba kibeni*—sambu beno monaka ve ata kima mosi na kilumbu yina Yehowa tubilaka beno na Orebi na kati-kati ya tiya—
16 na mpila nde beno sala ve mambu ya mbi mpi beno kudisadila kiteki yina me fwanana ti konso kima yina, kifwanisu ya bakala to ya nkento,+
17 kifwanisu ya konso mbisi yina kele na ntoto to kifwanisu ya konso ndeke yina ke pumbukaka,+
18 kifwanisu ya konso kigangwa yina ke tambulaka divumu na ntoto to kifwanisu ya konso mbisi yina ke vandaka na masa yina kele na nsi ya ntoto.+
19 Ebuna kana nge tala na zulu mpi nge mona ntangu, ngonda, mpi bambwetete—makesa yonso ya zulu—kubika ve nde yo pukumuna nge mpi nge fukama na ntwala na yo mpi nge sadila yo.+ Yehowa Nzambi na nge me pesa yo na bantu yonso yina kele na ntoto ya mvimba.
20 Kansi beno kele bantu yina Yehowa bakaka mpi basisaka na fulu ya tiya ya ke kumisaka bibende masa-masa, na Ezipte, sambu beno kuma dikabu na yandi mosi,*+ mutindu beno kele bubu yai.
21 “Yehowa wilaka mono makasi sambu na beno,+ mpi yandi zengaka kieleka nde mono fwete sabuka ve Yordani to kukota na insi ya mbote yina Yehowa Nzambi na beno ke pesa beno bonso dikabu.+
22 Sambu, mono ta fwa na insi yai; mono ta sabuka ve Yordani,+ kansi beno, beno ta sabuka mpi ta baka insi yai ya mbote.
23 Beno keba na mpila nde beno vila ve kuwakana ya Yehowa Nzambi na beno yina yandi salaka ti beno,+ mpi beno kudisadila ve kiteki, kifwanisu ya konso kima yina Yehowa Nzambi na beno me buyisaka beno.+
24 Sambu, Yehowa Nzambi na beno kele tiya ya ke yokaka,+ Nzambi yina ke lombaka nde bo kangama kaka na yandi.+
25 “Kana nge buta bana ti bantekolo mpi beno me zinga mingi na insi yina ebuna beno sala mambu yina ta natila beno lufwa mpi beno sala kiteki+ ya konso mutindu yina mpi beno sala mambu yina kele mbi na meso ya Yehowa Nzambi na beno sambu na kupesa yandi makasi,+
26 mono ke baka zulu ti ntoto bonso bambangi na mono bubu yai nde beno ta fwa kibeni kukonda kusukinina na insi yina beno ke sabuka Yordani sambu na kubaka yo. Beno ta zinga ve mingi na insi yina, kansi beno ta mana.+
27 Yehowa ta panza beno na kati ya bantu,+ mpi na kati na beno bantu fioti mpamba ta guluka+ na kati ya makanda yina Yehowa ta nata beno.
28 Kuna beno ta sadila banzambi ya banti mpi ya matadi yina bantu me salaka,+ banzambi yina lenda mona ve, lenda wa ve, lenda dia ve mpi lenda wa nsudi ve.
29 “Kana beno sosa Yehowa Nzambi na beno kuna, ntembe kele ve nde nge ta mona yandi,+ kana nge sosa yandi na ntima na nge ya mvimba mpi na moyo*+ na nge ya mvimba.
30 Ntangu nge ta vanda na mpasi ya nene mpi mambu yai yonso kukumina nge na nima, nge ta vutukila Yehowa Nzambi na nge mpi ta widikila ndinga na yandi.+
31 Sambu Yehowa Nzambi na nge kele Nzambi yina ke wilaka bantu mawa.+ Yandi ta yambula nge ve, ta fwa nge ve, mpi ta vila ve kuwakana yina yandi zengaka kieleka na ba-nkaka na nge.+
32 “Ntangu yai, yula na yina me tala bilumbu ya ntama yina vandaka na ntwala ya ntangu na nge, katuka kilumbu yina Nzambi gangaka muntu na ntoto; sosa katuka na nsuka mosi ya zulu tii na nsuka ya nkaka ya zulu. Keti diambu ya nene ya mutindu yai me salamaka dezia to keti bantu me waka+ dezia diambu ya mutindu yai?
33 Keti kele ti bantu ya nkaka yina me waka ndinga ya Nzambi ke tuba na kati ya tiya mutindu nge me waka yo mpi me bikalaka na luzingu?+
34 To keti Nzambi me mekaka dezia kubaka dikanda mosi sambu na yandi mosi na kati ya dikanda ya nkaka ti balusambisu,* ti bidimbu, ti bimangu,+ ti bitumba,+ ti diboko ya ngolo+ mpi ya kutandula, mpi ti mambu ya ke pesa boma,+ mutindu Yehowa Nzambi na beno salaka sambu na beno na Ezipte na meso na beno kibeni?
35 Bo songaka beno mambu yai sambu beno zaba nde Yehowa kele Nzambi ya kieleka;+ katula yandi,+ Nzambi ya nkaka kele ve.
36 Yandi salaka nde nge wa ndinga na yandi katuka na zulu sambu na kusungika nge, mpi na ntoto yandi salaka nde nge mona tiya na yandi ya nene, mpi nge waka mambu yina yandi tubaka na kati ya tiya.+
37 “Sambu yandi zolaka ba-nkaka na nge mpi solaka bana* na bo,+ yandi basisaka nge na Ezipte na meso na yandi na nsadisa ya ngolo na yandi ya nene.
38 Yandi kulaka na ntwala na nge makanda yina vandaka nene mpi ngolo kuluta nge, sambu na kukotisa nge mpi kupesa nge insi na bo bonso dikabu, mutindu yo kele bubu yai.+
39 Yo yina, zaba bubu yai mpi tula na ntima nde Yehowa kele Nzambi ya kieleka na zulu mpi na ntoto.+ Nzambi ya nkaka kele ve.+
40 Nge fwete zitisa bansiku na yandi mpi bantuma na yandi yina mono ke pesa nge bubu yai, sambu mambu kukwendila mbote sambu na nge mpi sambu na bana na nge, na mpila nde nge zinga mingi na insi yina Yehowa Nzambi na nge ke pesa nge.”+
41 Na ntangu yina, Moize tulaka bambanza tatu na kingenga, na ndambu ya esti ya Yordani.+
42 Kana muntu me fwa nkweno na yandi kukonda kukana kansi yandi vandaka kumenga+ yandi ve na ntwala, yandi fwete tina na mbanza mosi na kati ya bambanza yai mpi kuzinga.+
43 Bambanza yango kele Besere+ na ntoto-makanga na zulu ya ngumba sambu na bana ya Rubeni, Ramoti+ na Gileadi sambu na bana ya Gadi, mpi Golani+ na Bashani sambu na bana ya Manase.+
44 Yai kele Nsiku+ yina Moize tulaka na ntwala ya bantu ya Izraele.
45 Yai kele bangibusa, bansiku, mpi bankanu yina Moize pesaka bantu ya Izraele na nima ya kubasika na bo na Ezipte,+
46 pene-pene ya Yordani, na muwanda yina ke talana ti Bete-peore,+ na insi ya Sihoni ntotila ya bantu ya Amore, yina vandaka kuzinga na Eshboni,+ yina Moize ti bantu ya Izraele bedisaka na nima ya kubasika na Ezipte.+
47 Bo bakaka insi na yandi mpi insi ya Ogi+ ntotila ya Bashani, bantotila yonso zole ya bantu ya Amore yina vandaka pene-pene ya Yordani na esti,
48 katuka na Aroere,+ yina kele na ndilu ya Muwanda ya Arnoni, tii na Ngumba ya Sioni, disongidila Ermoni,+
49 mpi Araba ya mvimba pene-pene ya Yordani na esti, tii na Nzadi-Mungwa ya Araba,* na nsi ya tu-bangumba ya Pisga.+
Banoti na nsi ya lutiti
^ To “mpi tula kibeni dikebi na moyo na nge.”
^ Na kisina, “tii na ntima ya zulu.”
^ Na kisina, “Bangogo Kumi.” Yo me zabanaka mpi bonso Décalogue.
^ To “beno tula kibeni dikebi na mioyo na beno.”
^ To “dikabu na yandi.”
^ Tala Bantendula ya Bangogo.
^ To “mimekamu.”
^ Na kisina, “nkuna.”
^ Disongidila, Nzadi ya Mungwa, to Nzadi-Mungwa ya Kufwa.
