Kusonga 14:1-20
14 Na nima mono talaka mpi monaka Mwana-Dimeme+ me telama na zulu ya Ngumba ya Sioni,+ mpi yandi vandaka ti bantu 144 000+ yina kele ti zina na yandi mpi zina ya Tata na yandi+ ya kusonika na bambunzu na bo.
2 Mono waka ndinga mosi ke katuka na zulu bonso makelele ya bamasa mingi mpi bonso makelele ya ngolo ya nzasi; mpi ndinga ya mono waka vandaka bonso ndinga ya bantu yina ke yimba mpi ke bula bakidare na bo.
3 Bo ke yimba nkunga yina vandaka bonso nkunga ya mpa+ na ntwala ya kiti ya kimfumu mpi na ntwala ya bigangwa iya ya moyo+ mpi ya bankuluntu,+ mpi muntu mosi ve vandaka na mpila ya kulonguka nkunga yina mbote-mbote, katula kaka bantu 144 000+ yina bo me sumbaka na ntoto.
4 Bo kele bantu yina me kudikumisaka ve mvindu ti bankento; ya kieleka, bo kele bamwense.+ Bo kele bantu yina ke fula kulanda Mwana-Dimeme konso kisika yina yandi ke kwenda.+ Bo sumbaka bo+ na kati ya bantu bonso bambuma ya ntete+ sambu na Nzambi mpi sambu na Mwana-Dimeme,
5 mpi bo monaka ve luvunu na munoko na bo; bo kele ya kukonda mvindu.+
6 Mono monaka wanzio ya nkaka ke pumbuka na kati-kati ya zulu,* mpi yandi vandaka ti nsangu ya mbote ya mvula na mvula ya kuzabisa na bantu yina ke zingaka na ntoto, na makanda yonso, na mabuta yonso, na bandinga yonso, mpi na bansi yonso.+
7 Yandi vandaka kutuba na ndinga ya ngolo nde: “Beno wa Nzambi boma mpi beno pesa yandi nkembo, sambu ngunga yina yandi ta sambisa bantu me lunga,+ beno sambila Muntu yina salaka zulu, ntoto, nzadi-mungwa,+ mpi ba-nto ya masa.”
8 Wanzio ya nkaka, ya zole, landaka, mpi tubaka nde: “Yandi me bwa! Babilone ya Nene+ me bwa,+ yandi muntu nwisaka makanda yonso vinu ya nzala ya ngolo ya pite*+ na yandi!”
9 Wanzio ya nkaka, ya tatu, landaka bo, mpi tubaka na ndinga ya ngolo nde: “Kana muntu kusambila mbisi ya mfinda+ mpi kifwani na yo, ebuna yandi baka kidimbu na mbunzu na yandi to na diboko na yandi,+
10 yandi ta nwa mpi vinu ya makasi ya Nzambi yina bo ke tula na dikopa ya makasi na yandi kukonda kuvukisa ti kima ya nkaka,+ mpi bo ta monisa yandi mpasi ti tiya mpi sufre+ na meso ya bawanzio ya santu mpi na meso ya Mwana-Dimeme.
11 Midinga ya bampasi na bo ke tombukaka mvula na mvula;+ mpi bantu yina ke sambilaka mbisi ya mfinda mpi kifwani na yo, mpi konso muntu yina ke baka kidimbu ya zina na yo, ke pemaka ve mpimpa ti mwini.+
12 Yo ke lomba nde basantu,+ bantu yina ke zitisaka bansiku ya Nzambi mpi ke landaka lukwikilu+ ya Yezu, kukanga ntima.”
13 Mono waka ndinga mosi ke katuka na zulu, ke tuba nde, “Sonika: Kiese na bafwa yina ke fwa na bumosi ti Mfumu+ yantika na ntangu yai. Ee, mpeve ke tuba nde, bo pema na bisalu na bo ya ngolo, sambu mambu yina bo salaka ke landa bo.”
14 Mono talaka mpi mono monaka dituti mosi ya mpembe, mpi muntu mosi bonso mwana ya muntu me vanda na zulu ya dituti yina;+ yandi vandaka ti mpu ya kimfumu ya wolo na ntu na yandi mpi mbele ya makasi na diboko na yandi.
15 Wanzio ya nkaka basikaka na kisika ya santu ya tempelo, yandi tubaka na ndinga ya ngolo na muntu yina me vanda na zulu ya dituti nde: “Lutisa mbele na nge mpi katula bambuma, sambu ngunga ya kukatula bambuma me lunga, sambu bambuma ya ntoto me yela kibeni.”+
16 Muntu yina me vanda na zulu ya dituti lutisaka mbele na yandi na ntoto, ebuna yandi katulaka bambuma ya ntoto.
17 Wanzio ya nkaka diaka basikaka na kisika ya santu ya tempelo yina kele na zulu; yandi mpi vandaka ti mbele ya makasi.
18 Kansi wanzio ya nkaka diaka basikaka na mesa-kimenga mpi yandi vandaka ti kiyeka na zulu ya tiya. Yandi tubaka na ndinga ya ngolo na muntu yina vandaka ti mbele ya makasi nde: “Lutisa mbele na nge ya makasi mpi vukisa bisuka ya bambuma ya nti ya vinu ya ntoto, sambu bambuma na yo me yela.”+
19 Wanzio yina lutisaka mbele na yandi na ntoto mpi yandi vukisaka bambuma ya nti ya vinu ya ntoto, mpi yandi losaka yo na kikamuninu ya vinu ya nene ya makasi ya Nzambi.+
20 Bo kamunaka bambuma yina na kikamuninu ya vinu na nganda ya mbanza, mpi menga basikaka na kikamuninu ya vinu mpi yo kumaka tii na mikaba ya bo ke lwatisaka bampunda na munoko, na kitamina ya ba stade 1 600.*
Banoti na nsi ya lutiti
^ To “na mupepe; na zulu.”
^ Na Kigreki, por·neiʹa. Tala Bantendula ya Bangogo.
^ Kiteso ya bakilometre 296. Stade mosi kele bametre 185. Tala Bangindu ya Ngika B14.
