Kusonga 8:1-13
8 Ntangu yandi+ kangulaka kidimbu ya nsambwadi,+ zulu vandaka pima kiteso ya kati-kati ya ngunga mosi.
2 Ebuna mono monaka bawanzio nsambwadi+ yina ke telamaka na ntwala ya Nzambi, mpi bo pesaka bo bampungi nsambwadi.
3 Wanzio ya nkaka kwisaka mpi telamaka pene-pene ya mesa-kimenga;+ yandi me simba dilonga ya wolo ya bo ke yokilaka ndumbu; bo pesaka yandi ndumbu+ mingi sambu yandi pesa yo ti bisambu ya basantu yonso na mesa-kimenga ya wolo+ yina vandaka na ntwala ya kiti ya kimfumu.
4 Midinga ya ndumbu katukaka na diboko ya wanzio mpi yo tombukaka ti bisambu+ ya basantu na ntwala ya Nzambi.
5 Kansi na mbala mosi, wanzio bakaka dilonga ya kuyokila ndumbu, yandi fulusaka yo ti ndambu ya tiya ya mesa-kimenga mpi yandi losaka yo na ntoto. Ebuna makelele ya banzasi bulaka, bandinga wakanaka, nsemo ya nzasi+ monanaka, mpi ntoto nikanaka.
6 Bawanzio nsambwadi yina vandaka ti bampungi nsambwadi+ yilamaka sambu na kubula yo.
7 Wanzio ya ntete bulaka mpungi. Ebuna mvula ya matadi mpi tiya ya me vukana ti menga nokaka, mpi yo kwisaka kubwa na ntoto;+ ndambu mosi na kati ya bandambu tatu ya ntoto piaka tiya, ndambu mosi na kati ya bandambu tatu ya banti piaka tiya, mpi matiti yonso ya mubisu piaka tiya.+
8 Wanzio ya zole bulaka mpungi. Ebuna kima mosi bonso ngumba ya nene yina ke pela tiya bwaka na nzadi-mungwa.+ Ndambu mosi na kati ya bandambu tatu ya nzadi-mungwa kumaka menga;+
9 mpi ndambu mosi na kati ya bandambu tatu ya bigangwa ya moyo* ya nzadi-mungwa fwaka,+ mpi ndambu mosi na kati ya bandambu tatu ya bamaswa dindaka.
10 Wanzio ya tatu bulaka mpungi. Ebuna mbwetete ya nene yina ke pela bonso mwinda katukaka na zulu mpi bwaka; yo bwaka na ndambu mosi na kati ya bandambu tatu ya banzadi mpi na ba-nto ya masa.+
11 Zina ya mbwetete yina Nti ya Bululu. Ebuna ndambu mosi na kati ya bandambu tatu ya masa kumaka ndudi, mpi bantu mingi fwaka sambu na masa yina, sambu yo kumaka bululu.+
12 Wanzio ya iya bulaka mpungi. Yo bulaka+ ndambu mosi na kati ya bandambu tatu ya ntangu, ndambu mosi na kati ya bandambu tatu ya ngonda, mpi ndambu mosi na kati ya bandambu tatu ya bambwetete, sambu ndambu mosi na kati ya bandambu na yo tatu kukuma mpimpa+ mpi sambu ndambu mosi na kati ya bandambu tatu ya mwini kuvanda ve ti nsemo, mpi mutindu mosi sambu na mpimpa.
13 Ebuna mono monaka, mpi mono waka ngo-zulu mosi ke pumbuka na kati-kati ya zulu, yo ke tuba na ndinga ya ngolo nde: “Mawa, mawa, mawa+ na bantu yina ke zingaka na ntoto, sambu na bampungi ya nkaka yina bawanzio tatu ke zola kubula!”+
Banoti na nsi ya lutiti
^ To “bigangwa yina kele ti mioyo.”
