Longi 6:1-12
6 Kele ti diambu ya nkaka ya mpasi yina mono me monaka awa na ntoto,* mpi yo ke monanaka mingi na kati ya bantu:
2 Nzambi ya kieleka ke pesa muntu bimvwama, bima ya kinsuni, mpi nkembo na mpila nde yandi me konda ve ata kima mosi yina yandi ke zola;* ata mpidina Nzambi ya kieleka ke pesa yandi ve nzila ya kusepela na yo, kansi yandi ke pesa munzenza mosi nzila ya kusepela na yo. Yo kele mpamba mpi mpasi ya nene.
3 Kana muntu kukuma tata ya bana mbala nkama, yandi zinga bamvula mingi, mpi yandi kuma mununu, kansi yandi* ke mona ve kiese na bima na yandi ya mbote na ntwala nde yandi kwenda na maziamu,* mono fwete tuba nde mwana yina me butuka ya kufwa kele mbote kuluta yandi.+
4 Sambu yandi kwisaka kukonda kikuma mpi yandi kwendaka na mudidi, mpi bo ta fika zina na yandi na mudidi.
5 Ata yandi me monaka ve ntangu to me zabaka kima mosi ve, yandi kele kaka mbote* kuluta muntu yina zingaka bamvula mingi.+
6 Inki kele mambote ya kuzinga bamvula mafunda zole kansi kuvanda ve na kiese? Keti bantu yonso ke kwendaka ve kisika mosi?+
7 Kisalu yonso ya ngolo yina muntu ke salaka ke vandaka sambu na kufulusa munoko na yandi;+ ata mpidina nzala na yandi ke manaka ve.*
8 Sambu muntu ya mayele me luta zoba+ na nki, to nki mambote kele kana nsukami me zaba mutindu ya kuzinga?*
9 Kusepela na bima yina meso ke mona kele mbote kuluta kulanda banzala na nge.* Yai mpi kele mpamba, yo kele kulanda mupepe.
10 Bima yonso yina kele, bo me pesaka yo dezia zina, mpi bo me zabaka mutindu muntu kele; mpi yandi lenda kuka ve kuswana* ti muntu yina me luta yandi na ngolo.
11 Kana bangogo* kele mingi, mambu ya mpamba mpi ke vandaka mingi; mpi nki mambote yo ke natilaka muntu?
12 Nani me zaba mambu ya kuluta mbote yina muntu lenda sala na luzingu na bilumbu fioti ya luzingu na yandi ya mpamba, yina yandi ke lutisa bonso kivudi?+ Sambu nani lenda songa muntu mambu yina ta salama awa na ntoto* na nima kana yandi me kwenda?
Banoti na nsi ya lutiti
^ Na kisina, “na nsi ya ntangu.”
^ To “ke konda ve ata kima mosi sambu na moyo na yandi.”
^ To “moyo na yandi.”
^ To “mpi ata maziamu me kuma ve ya yandi.”
^ Na kisina, “ke pema mingi.”
^ To “moyo na yandi ke fulukaka ve.”
^ Na kisina, “mutindu ya kutambula na ntwala ya bantu yina kele na luzingu.”
^ To “kuluta kutambula ya moyo.”
^ To “kusamba diambu na yandi.”
^ To mbala ya nkaka, “bima.”
^ Na kisina, “na nsi ya ntangu.”
