Kivuvu ya Kieleka Sambu na Bilumbu ya Ke Kwisa

TALA NA

Keti nge ke yindulaka nde mambu ta bonga na bilumbu ya ke kwisa? Bantu mingi ke yindulaka nde mambu ta bonga na bilumbu ya ke kwisa ata bubu yai bo ke kutana ti mambu ya mpasi mingi. Kansi, keti beto lenda ndima kibeni nde mambu ta bonga na bilumbu ya ke kwisa? Ee! Biblia ke pesa beto kivuvu ya kieleka sambu na bilumbu ya ke kwisa.

Inki kivuvu Biblia ke pesa beto?

Biblia ke monisa nde bantu ke kutana ti bampasi mingi kibeni. Ata mpidina, yo ke tuba nde bampasi yango ta vandaka ve mvula na mvula. Beto tadila mwa bambandu ya siki-siki.

Diambu ya mpasi: Kukonda nzo

Mambu yina Biblia ke tubaka: “Bo ta tunga banzo mpi ta zinga muna.”—Yezaya 65:21.

Mambu yina yo ke tendula sambu na bilumbu ke kwisa: Bantu ta vanda ti banzo na bo mosi.
Diambu ya mpasi: Kukonda kisalu mpi kinsukami

Mambu yina Biblia ke tubaka: “Bantu ya mono me solaka ta wa kiese kibeni sambu na kisalu ya maboko na bo.”—Yezaya 65:22.

Mambu yina yo ke tendula sambu na bilumbu ke kwisa: Bantu yonso ta vanda ti kisalu ya mbote, ya ta pesa bo kiese mpi ya ta natila bo mambote.
Diambu ya mpasi: Kukonda lunungu

Mambu yina Biblia ke tubaka: “Bamfumu ta yala sambu na lunungu.”—Yezaya 32:1.

Mambu yina yo ke tendula sambu na bilumbu ke kwisa: Bo ta sadila diaka ve bantu mambu ya kukonda lunungu kaka sambu na mpusu na bo ya nitu to sambu bo kele bamvwama to bansukami. Bo ta sadila bantu yonso mambu na lunungu yonso.
Diambu ya mpasi: Kukonda kudia mbote mpi nzala

Mambu yina Biblia ke tubaka: “Mbuma ta vanda mingi kibeni na ntoto; yo ta fuluka na nsongi ya bangumba.”—Nkunga 72:16.

Mambu yina yo ke tendula sambu na bilumbu ke kwisa: Konso muntu ta zwa madia mingi ya mbote. Ata muntu mosi ve ta niokwama sambu na nzala to sambu na kukonda kudia mbote.
Diambu ya mpasi: Kufwa bantu mpi mubulu

Mambu yina Biblia ke tubaka: “Bo ta vanda, konso muntu na nsi ya nti na yandi ya vinu mpi na nsi ya nti na yandi ya bafige, ata muntu mosi ve ta pesa bo boma.”—Mika 4:4.

Mambu yina yo ke tendula sambu na bilumbu ke kwisa: Konso muntu ta zinga na ngemba mpi ta wa nde yandi kele na lutaninu sambu bo ta fwa bantu yonso ya mbi, mpi “bantu ya lunungu ta baka ntoto.”—Nkunga 37:10, 29.
Diambu ya mpasi: Bitumba

Mambu yina Biblia ke tubaka: “Dikanda mosi ta nangula ve mbele ya bitumba sambu na kunwanisa dikanda ya nkaka, bo ta longuka mpi diaka ve bitumba.”—Yezaya 2:4.

Mambu yina yo ke tendula sambu na bilumbu ke kwisa: Ngemba ta vanda na ntoto ya mvimba. (Nkunga 72:7) Ata muntu mosi ve ta dila sambu bo me fwa muntu yina yandi vandaka kuzola na bitumba, ata muntu mosi ve ta tina bitumba na insi ya nkaka sambu na kuditanina.
Diambu ya mpasi: Maladi mpi kifu na nitu

Mambu yina Biblia ke tubaka: “Ata muntu mosi ve ya ke zingaka na insi ta tuba nde: “Mono ke bela.”—Yezaya 33:24.

Mambu yina yo ke tendula sambu na bilumbu ke kwisa: Bantu ta vanda diaka ve ti bifu na nitu to ta bela diaka ve. (Yezaya 35:5, 6) Nkutu Biblia ke tuba nde “lufwa ta vandaka diaka ve.”—Kusonga 21:4.
Diambu ya mpasi: Kubeba ya bamasa, ya bamfinda mpi buna na buna

Mambu yina Biblia ke tubaka: “Ntoto-makanga ti ntoto ya kuyuma ta vanda na kiese, mpi ntoto ya zelo na zelo ta yangalala mpi ta basisa bintuntu bonso safrani.”—Yezaya 35:1.

Mambu yina yo ke tendula sambu na bilumbu ke kwisa: Ntoto ya mvimba ta kuma paladisu sambu bantu kuzinga kaka mutindu Nzambi kanaka yo na luyantiku.—Kuyantika 2:15; Yezaya 45:18.

Keti yo kele mfunu nde beto ndima nde kivuvu yina Biblia ke pesa beto ta lungana kibeni?

Mbala ya nkaka, nge ke yindulaka nde yo ta lungana ve. Kuyindula mutindu yina kele mbi ve. Kansi, beto ke siamisa nge na kutadila mambu ya nkaka yina Biblia ke tubaka sambu na bilumbu ke kwisa. Sambu na nki? Sambu mambu yina Biblia ke tubaka nde yo ta salama kele ve bonso mambu yina bantu ke tubaka nde yo ta salama mpi mambu yina bo ke tubaka nde bo ta sala. Nzambi muntu me tubaka mambu yina Biblia ke tubaka nde yo ta salama. Tala mambu yina ke sala nde mambu ya Nzambi me tubaka nde yo ta salama kuvanda ve bonso mambu yina bantu ke tubaka:

Nzambi kele muntu ya kutudila ntima. Biblia ke tubaka nde Nzambi “lenda kusa ve.” (Tito 1:2) Katula yo, Nzambi mpamba muntu kele ti makuki ya kutuba na ntwala mambu yina ta salama na bilumbu ke kwisa. (Yezaya 46:10) Biblia kele ti bambandu mingi ya ke monisa nde mambu yina Nzambi tubaka nde yo ta salama ke salamaka ntangu yonso. Sambu na kuzaba mambu mingi, tala video Inki Lenda Ndimisa Beto nde Biblia Ke Tubaka Kieleka?
Nzambi kele ti ngolo ya kumanisa bampasi na beto. Biblia ke tuba nde Nzambi kele ti ngolo ya kusala “mambu yonso yina yandi ke zolaka kusala.” (Nkunga 135:5, 6) Na kutuba ya nkaka, ata kima mosi ve lenda kanga Nzambi nzila ya kulungisa mambu yina yandi me tubaka. Katula yo, Nzambi ke zola kusadisa beto sambu yandi ke zolaka beto.—Yoane 3:16.

Nge lenda kudiyula nde: ‘Kana Nzambi ke zola kusadisa beto mpi yandi kele ti ngolo ya kusadisa beto, sambu na nki beto ke mona kaka bampasi mingi mpidiyai?’ Sambu na kubaka mvutu na ngiufula yai, tala video Sambu na Nki Nzambi Me Pesaka Nzila na Bampasi?

Inki mutindu kivuvu yina Biblia ke pesa beto ta lungana?

Nzambi ta sadila Kimfumu na yandi, disongidila luyalu mosi ya kele na zulu, sambu na kulungisa mambu yina yandi me tubaka. Yandi me ponaka Yezu Kristu sambu na kuvanda Ntwadisi ya Kimfumu yina, mpi yandi me pesaka yandi kiyeka ya kukeba ntoto mpi bantu yina ke zinga na kati. Ntangu Yezu vandaka awa na ntoto, yandi belulaka bambefo, yandi disaka bantu yina vandaka na nzala, yandi yalaka mupepe mpi nkutu yandi vutulaka bantu yina fwaka na luzingu. (Marko 4:39; 6:41-44; Luka 4:40; Yoane 11:43, 44) Mpidina, yandi monisaka mambu yina yandi ta sala ntangu yandi ta vanda Ntotila ya Kimfumu ya Nzambi.

Tala video Kimfumu ya Nzambi Kele Nki? sambu na kuzaba mambu mingi na yina me tala mutindu Kimfumu ya Nzambi ta natila nge mambote.

Inki ntangu kivuvu yango ta lungana?

Ntama mingi ve. Inki ke ndimisa beto nde yo ta lungana? Biblia tubaka na ntwala mambu yina ta monisa nde Kimfumu ya Nzambi ke zola kuyantika kuyala na ntoto. (Luka 21:10, 11) Mambu ya ke salama bubu yai na nsi-ntoto ke wakana ti yina Biblia tubaka na ntwala.

Sambu na kuzaba mambu mingi, tanga disolo “Inki Ntangu Kimfumu ya Nzambi Ta Yala Ntoto?”

Inki mutindu kivuvu yina Biblia ke pesa beto lenda sadisa nge bubu?

Nsoniki mosi ya Biblia fwanisaka kivuvu yai ya Biblia ke pesa ti “longo sambu na moyo.” (Baebreo 6:19) Kaka mutindu longo ke sadisaka maswa sambu yo kwenda-kwenda ve kana mupepe ke bula ngolo, kivuvu ya kieleka yina Biblia ke pesa beto sambu na bilumbu ya ke kwisa lenda sadisa beto ata beto ke kutana ti bampasi bubu yai. Kivuvu na beto lenda tanina beto na kuvanda na ngemba mpi na kiese, na kuyindula mbote-mbote mpi nkutu na kuvanda ti sante ya mbote.—1 Batesalonika 5:8.