Nsangu ya mbote yina ketuba nde bantu tazinga mvula na mvula na ntoto kele ya kusonika na Biblia. (Nkunga 37:29) Biblia mesalamaka na mikanda ya fyoti 66. Nzambi sadilaka bantu ya kwikama kiteso ya 40 sambu na kusonika yo. Moize sonikaka mikanda tanu ya ntete, yo meluta bamvula kiteso ya 3 500. Ntumwa Yoane muntu sonikaka mukanda ya nsuka, yo meluta bamvula kiteso ya 1 900. Bansoniki ya Biblia sonikaka bangindu ya nani? Nzambi vandaka kuzabisa bansoniki ya Biblia mambu na nzila ya mpeve santu na yandi. (2 Samuele 23:2) Bo sonikaka mabanza ya Nzambi, kansi ya bo mosi ve. Yo yina, Yehowa muntu kele Munkwa ya Biblia.—Tanga 2 Timoteo 3:16; 2 Piere 1:20, 21.

Beto mezaba nde Biblia mekatukaka na Nzambi sambu yo ketubilaka na sikisiki mambu yina tasalama na makwisa. Ata muntu mosi ve lenda sala mpidina. (Yozue 23:14) Kaka Nzambi Nkwa-Ngolo Yonso muntu lenda mona na ntwala makwisa ya bantu na sikisiki yonso.—Tanga Yezaya 42:9; 46:10.

Mukanda yina mekatuka na Nzambi fwete vanda ya kuswaswana, mpi yo kele mpenza mutindu yina. Bo mekabulaka bamiliare ya ba-Biblia na bandinga mingi kibeni. Ata yo kele mukanda mosi ya ntama, Biblia kele na kuwakana ti siansi ya kyeleka. Dyaka, mambu yina bansoniki 40 ya Biblia sonikaka vandaka ve ya kuswaswana. * Mambu yina Biblia ketubaka sambu na zola lenda katuka kaka na Nzambi ya kyeleka—Nzambi ya zola. Yo kele mpi ti kiyeka ya kusoba luzingu ya bantu sambu yo kuma ya mbote. Banzikisa yai kendimisaka bamilio ya bantu nde Biblia kele Ndinga ya Nzambi.—Tanga 1 Batesalonika 2:13.

Biblia kezabisaka nsangu ya mbote yina ketuba nde Nzambi kevandaka ti lukanu mosi ya zola sambu na bantu. Masonuku ketendula mutindu bantu kuvidisaka dibaku yina bo vandaka ti yo ya kuzinga na paladisu ya ntoto, na luyantiku ya disolo ya luzingu ya bantu, mpi mutindu nsukansuka ntoto takituka paladisu.—Tanga Kusonga 21:4, 5.

Ndinga ya Nzambi kele mpi ti bansiku, minsiku, mpi bandongisila. Dyaka, Biblia kevandaka ti bambandu ya kemonisa mutindu Nzambi vandaka kusadila bantu mambu; bambandu yango lenda longa beto mpi kimuntu ya Nzambi. Yo yina, Biblia lenda sadisa nge na kuzaba Nzambi. Yo ketendulaka mutindu nge lenda kuma nduku na yandi.—Tanga Nkunga 19:8, 12; Yakobo 2:23; 4:8.

Kamukanda yai tasadisa nge na kubakisa Biblia sambu yo kesadila metode yina Yezu vandaka kusadila. Yandi vandaka kutubila mukapu mosi mosi ya Biblia mpi yandi vandaka kupesa bo “ntendula ya Masonuku.”—Tanga Luka 24:27, 45.

Kele ve ata ti kima mosi ya kepesaka kyese mingi kuluta nsangu ya mbote yina mekatuka na Nzambi. Ata mpidina, bantu yankaka kesepelaka ve ti yo, mpi bankaka nkutu kewilaka yo makasi. Kulemba nitu ve. Sambu na kuvanda ti kivuvu ya kubaka luzingu ya mvula na mvula, nge fwete vanda ti nzayilu ya Nzambi.—Tanga Yoane 17:3.