Bitumba ya Armagedoni kele bitumba ya nsuka yina Nzambi ta nwana ti baguvernema ya bantu. Nkutu baguvernema yai mpi bantu ya ke pesaka bo maboko ke teleminaka Nzambi bubu yai mutindu bo ke buyaka kulemfuka na lutwadisu na yandi. (Nkunga 2:2) Nzambi ta fwa baguvernema yonso ya bantu na bitumba ya Armagedoni.—Daniele 2:44.

 Ngogo “Armagedoni” kele mbala mosi mpamba na Biblia na Kusonga 16:16. Mukanda ya kusonga ke tubila mambu yina ta salama na bilumbu ke kwisa mpi yo ke monisa nde “bantotila ya ntoto ya mvimba” ta vukana na “kisika yina bo ke bingaka na Kiebreo nde Armagedoni” “sambu na bitumba ya kilumbu ya nene ya Nzambi Nkwa-Ngolo Yonso.”—Kusonga 16:14.

 Banani ta nwana na bitumba ya Armagedoni? Yezu Kristu ta twadisa basoda ya zulu mpi ta nunga bambeni ya Nzambi. (Kusonga 19:11-16, 19-21) Bambeni yango kele bantu yina ke buyaka kulanda lutwadisu ya Nzambi mpi bayina ke zitisaka yandi ve. —Ezekiele 39:7.

 Keti bitumba ya Armagedoni ta salama na Moyen-Orient? Ve. Yo ta salama ve na kisika mosi kansi yo ta salama na ntoto ya mvimba. —Yeremia 25:32-34; Ezekiele 39:17-20.

 Armagedoni to Har-Magedoni (Na Kiebreo Har Meghiddohnʹ) ke tendula “Ngumba ya Megido.” Megido vandaka ntete mbanza mosi ya Izraele ya ntama. Istware ke tubilaka bitumba ya ngolo yina salamaka pene-pene ya mbanza yai. Nkutu Biblia ke tubilaka mpi bitumba ya nkaka yina bo nwanaka pana. (Bazuzi 5:19, 20; 2 Bantotila 9:27; 23:29) Kansi, Armagedoni ke tendula ve kisika mosi buna pene-pene ya mbanza Megido ya ntama. Ata ngumba mosi ve ya nene ke vandaka pana mpi nkutu Muwanda (ntoto ya kukonda ngumba) ya Yizreele yina kele pembeni ti yo ta kuka ve kuvukisa bantu yonso yina ta nwanisa Nzambi. Kansi Armagedoni kele bitumba yina bamfumu ya politiki ya ntoto ya mvimba ta vukana sambu na mbala ya nsuka sambu na kunwanisa luyalu ya Nzambi.

 Inki mambu Nzambi ta sala na bitumba ya Armagedoni? Beto ke zaba ve mutindu Nzambi ta sadila ngolo na yandi kansi yandi ta vanda ti binwaninu bonso yai ya yandi sadilaka na ntangu ya ntama: mvula ya matadi, kunikana ya ntoto, mvula ya ngolo, tiya, sufre, nsemo ya banzasi mpi maladi. (Yobi 38:22, 23; Ezekiele 38:19, 22; Habakuki 3:10, 11; Zekaria 14:12) Bambeni ya nkaka ya Nzambi ta kuma kisaka-saka mpi bo ta kudifwa bo na bo. Kansi nsuka-nsuka bo ta bakisa kibeni nde Nzambi muntu ke nwanisa bo.—Ezekiele 38:21, 23; Zekaria 14:13.

 Keti nsi-ntoto ta fwa na bitumba ya Armagedoni? Ntoto na beto ta fwa ve na Armagedoni sambu yo kele kisika yina bantu ta zingaka mvula na mvula. (Nkunga 37:29; 96:10; Longi 1:4) Nzambi ta fwa ve bantu yonso na bitumba ya Armagedoni kansi yandi ta gulusa kibeni “kimvuka mosi ya nene” ya bansadi na yandi.—Kusonga 7:9, 14; Nkunga 37:34.

 Bantangu ya nkaka na Biblia, ngogo “ntoto” ke tendulaka kimvuka ya bantu ya mbi yina ke teleminaka Nzambi. (1 Yoane 2:15-17) Yo yina na kutadila mambu ya verse yai ke tuba, beto lenda tuba mpi nde Armagedoni ta vanda “nsuka ya ntoto.”—Matayo 24:3, Bible en Kituba.

 Bitumba ya Armagedoni ta salama nki ntangu? Ntangu Yezu vandaka kutubila “mpasi ya nene” yina ta suka na bitumba ya Armagedoni, yandi yikaka nde: “Na yina me tala kilumbu yina mpi ngunga yina, ata muntu mosi ve me zaba yo, yo vanda bawanzio ya zulu to Mwana, kansi Tata mpamba muntu me zaba yo.” (Matayo 24:21, 36) Ata mpidina, Biblia ke monisaka nde bitumba ya Armagedoni ta salama na nsungi ya kumonana ya Yezu yina yantikaka na 1914.—Matayo 24:37-39.