Disumu ya bo lenda lolula ve ke tubila mambu yina muntu me sala mpi yandi ke monisa bikalulu yina ke kanga Nzambi nzila ya kulolula yandi. Inki mutindu muntu lenda yedisa bikalulu yango?

 Nzambi ke lolulaka bantu yina ke balulaka ntima na masumu na bo, bayina ke zitisaka bansiku na yandi na luzingu na bo, mpi ke monisaka lukwikilu na Yezu Kristu. (Bisalu 3:​19, 20) Kansi, muntu lenda kudipesa ngolo kibeni na kusala masumu na mpila nde yandi lenda soba diaka ve nkadilu to bikalulu na yandi. Biblia ke tuba nde muntu yango kele ti “ntima ya mbi” yina “kiyeka ya disumu yina ke kusaka” me kumisaka yo ngolo. (Baebreo 3:​12, 13) Bonso ntoto yina bo me yoka na furu mpi yina bo lenda yidika diaka ve, ntima ya muntu yina ke kolamaka na Nzambi kimakulu. (Yezaya 45:9) Kikuma ya kieleka ya kulonguka muntu yina kele diaka ve, yo yina yandi me sala disumu yina bo lenda lolula ve.​—Baebreo 10:26, 27.

 Bantwadisi ya nkaka ya dibundu ya Bayuda ya bilumbu ya Yezu salaka disumu ya bo lenda lolula ve. Bo zabaka nde mpeve santu ya Nzambi muntu vandaka kusadisa Yezu na kusala bimangu, kansi bo tubaka na mayele ya mbi nde Yezu bakaka ngolo na yandi na Satana Diabulu.​—Marko 3:​22, 28-​30.

Bambandu ya masumu yina bo lenda lolula

•  Kuvweza kukonda kuzaba. Ntumwa Polo vandaka ntete muntu ya ke vwezaka, kansi na nima yandi tubaka nde: “Yandi wilaka mono mawa sambu mono vandaka kusala mambu kukonda kuzaba mpi kukonda lukwikilu.”​—1 Timoteo 1:​13.

•  Bizumba. Biblia ke tubila bantu ya nkaka yina salaka ntete bizumba kansi na nima bo sobaka bikalulu na bo mpi Nzambi lolulaka bo.​—1 Bakorinto 6:​9-​11.

“Keti mu me salaka disumu yina bo lenda lolula ve?”

 Kana nge ke mengaka na masonga yonso luzingu ya masumu yina nge vandaka na yo ntete mpi nge me balulaka kibeni ntima, pana nge me salaka ve disumu yina bo lenda lolula ve. Nzambi lenda lolula nge disumu mosi yina nge ke sala mbala mingi kana ntima na nge me kuma ve ngolo kimakulu na ntwala na yandi.​—Yezaya 1:18.

 Bantu ya nkaka ke yindulaka nde bo me salaka disumu yina bo lenda lolula ve sambu mawi ya ngolo ya muntu yina me sala mbi ke yangisaka bo. Kansi, Biblia ke longaka nde beto lenda tudila ve mawi na beto ntima ntangu yonso. (Yeremia 17:9) Nzambi me pesaka beto ve nswa ya kusambisa ata muntu mosi​—ata beto mosi mpi. (Baroma 14:​4, 12) Yandi lenda lolula beto ata ntangu ntima na beto mosi ke landa kubedisa beto.​—1 Yoane 3:​19, 20.

Keti Yudasi Iskariote salaka disumu yina bo lenda lolula ve?

 Ee, yandi salaka yo. Bwimi na yandi pusaka yandi na kuyiba mbongo yina bantu pesaka sambu na mambu ya santu. Yandi kusaka nkutu nde yandi vandaka kudiyangisa sambu na bansukami kansi mpusa na yandi ya masonga vandaka ya kuzwa mbongo mingi yina yandi lenda yiba. (Yoane 12:​4-8) Ntangu ntima ya Yudasi yilamaka kimakulu na kusala mambu ya mbi, yandi tekaka Yezu na mbongo ya bibende 30. Yezu zabaka nde Yudasi lenda balula ve ntima na masonga na mambu yina yandi salaka, yo yina yandi bingaka Yudasi nde “mwana ya lufwa.” (Yoane 17:12) Yo ke tendula nde ntangu Yudasi fwaka, yandi fwaka kimakulu, kukonda kivuvu ya kufutumuka.​—Marko 14:21.

 Yudasi monisaka ve kubalula ntima ya masonga sambu na disumu na yandi. Yandi fungunaka ve na Nzambi, kansi na bantwadisi ya dibundu yina yandi salaka komplo ti bo.​—Matayo 27:​3-5; 2 Bakorinto 7:​10.