“Ebuna, mono monaka zulu ya mpa ti ntoto ya mpa; sambu zulu ya ntama ti ntoto ya ntama vilaka, mpi nzadi-mungwa vandaka diaka ve.”—Kusonga 21:1, Mbalula ya Nsi-Ntoto ya Mpa.

 “Ntangu yai, mono monaka zulu ya mpa ti ntoto ya mpa. Zulu ya ntete yo vilaka, nzadi-mungwa mpi vandaka diaka ve.”—Kusonga 21:1, Bible en Kituba.

 Verse yai ke sadila bangogo ya kifwani sambu na kutuba nde Kimfumu ya Nzambi yina ta vanda na zulu ta yinga baluyalu yonso ya bantu. Kimfumu ya Nzambi ta katula bantu ya mbi mpi yo ta yala kimvuka ya mpa ya bantu yina ta ndima kulemfukila yo.

 Mukanda ya Kusonga ke sadilaka “bidimbu,” to kutuba ya kifwani. (Kusonga 1:1) Yo yina, zulu ti ntoto ya bo ke tubila na verse yai kele ve ya kieleka kansi ya kifwani. Diaka, bo ke tubilaka mpi “zulu ya mpa” ti “ntoto ya mpa” ya kifwani na baverse ya nkaka ya Biblia. (Yezaya 65:17; 66:22; 2 Piere 3:13) Kana beto tadila baverse yai mpi masolo ya nkaka ya Biblia, yo ta sadisa beto na kubakisa ntendula na yo.

 “Zulu ya mpa.” Bantangu ya nkaka, Biblia ke sadilaka ngogo “zulu” sambu na kutubila kimfumu to baluyalu. (Yezaya 14:12-14; Daniele 4:25, 26) Yo yina, mukanda mosi ke tuba nde na bambikudulu yina kele bambona-meso to ba vision, “zulu ke tendulaka bantu yina ke yala to baluyalu.” a Na Kusonga 21:1, “zulu ya mpa” ke tubila Kimfumu ya Nzambi. Luyalu yai ya kele na zulu, yina bo ke bingaka bantangu ya nkaka nde “Kimfumu ya zulu,” bo ke tubila yo na mukanda ya Kusonga mpi na mikanda ya nkaka ya Biblia. (Matayo 4:17; Bisalu 19:8; 2 Timoteo 4:18; Kusonga 1:9; 5:10; 11:15; 12:10) Nsuka-nsuka, Kimfumu ya Nzambi, yina Yezu kele Ntotila na yo, ta yinga “zulu ya ntama,” disongidila, yo ta yinga baluyalu yonso ya kukonda kukuka yina bantu me tulaka.—Daniele 2:44; Luka1:31-33; Kusonga 19:11-18.

 “Ntoto ya mpa.” Biblia ke tuba nde Nzambi ta fwa ve ntoto ya kieleka mpi yandi ta yingisa yo ve. (Nkunga 104:5; Longi 1:4) Kana mpidina, ntoto ya kifwani kele inki? Mbala mingi, Biblia ke sadilaka ngogo “ntoto” sambu na kutubila bantu. (Kuyantika 11:1; 1 Bansangu 16:31; Nkunga 66:4; 96:1) Yo yina, “ntoto ya mpa” fwete vanda kimvuka ya mpa ya bantu yina ta ndima kulemfukila Kimfumu ya Nzambi yina kele na zulu. “Ntoto ya ntama,” to bantu yina ke telaminaka Kimfumu ya Nzambi, ta fwa.

 “Nzadi-mungwa ta vanda diaka ve.” Na kuwakana ti mambu yina kitini ya nsuka ya Kusonga 21:1 ke tubila, “nzadi-mungwa” kele mpi ya kifwani. Mbala mingi nzadi-mungwa ke nikanaka mpi ke vandaka ti bitembo. Yo yina, yo ke kifwani ya mbote ya ke monisa bantu mingi yina ke kotisaka mavwanga mpi mubulu sambu bo ke vandaka ya kukabwana ti Nzambi. (Yezaya 17:12, 13; 57:20; Kusonga 17:1, 15) Bo mpi ta fwa. Nkunga 37:10 ke tuba nde: “Kubika kaka fioti, mpi bantu ya mbi ta vanda diaka ve; nge ta tala kisika yina bo vandaka, mpi bo ta vanda ve pana.”

 Mukanda ya Kusonga ke tubila na ntwala mambu yina ke salama na “kilumbu ya Mfumu.” (Kusonga 1:10) Bambikudulu ya Biblia ke monisa nde kilumbu yango yantikaka na 1914 ntangu Yezu kumaka Ntotila ya Kimfumu ya Nzambi b mpi bandaka kuyala. Kansi yandi yantikaka ve kuyala ntoto ya mvimba na ntangu yina. Nkutu, bambikudulu ya nkaka ke tuba nde mambu ya nsi-ntoto ta beba mingi na kitini ya nsuka ya “kilumbu ya Mfumu.” Biblia ke bignaka kitini ya ntete ya nsungi yina nde “bilumbu ya nsuka.” (2 Timoteo 3:1-5, 13; Matayo 24:3, 7; Kusonga 6:1-8; 12:12) Ntangu bilumbu yina ya mpasi mpi ya me fuluka ti mavwanga ta suka, Kimfumu ya Nzambi ta katula zulu ti ntoto ya kifwani ya ntama mpi ta tula ngemba mpi bumosi. Bantu ya Kimfumu yina, disongidila “ntoto ya mpa,” ta vanda ti luzingu ya kitoko kibeni mpi sante ya kukuka.—Kusonga 21:3, 4.

 Tala video yai ya nkufi sambu na kumona na bunkufi mambu yina kele na mukanda ya Kusonga.