NTENDULA YA BAVERSE YA BIBLIA

Yoane 3:16—“Sambu Nzambi Zolaka Nsi-Ntoto Mingi Kibeni”

TALA NA

“Sambu Nzambi zolaka nsi-ntoto mingi kibeni yo yina yandi pesaka Mwana na yandi mosi kaka ya kubutuka, sambu konso muntu yina ke monisa lukwikilu na Mwana kufwa ve kansi kubaka luzingu ya mvula na mvula.”—Yoane 3:16, Mbalula ya Nsi-Ntoto ya Mpa.

“Nzambi me lutaka kuzola bantu yonso; yo yina yandi pesaka bo mwana mosi yina kele na yandi, sambu konso muntu yina me ndima yandi na ntima na yandi, yandi kufwa ve, kansi yandi kuvanda na moyo ya mvula na mvula.”—Yoane 3:16, Bible en Kituba.

Ntendula ya Yoane 3:16

Nzambi ke zolaka beto mpi yandi ke zolaka nde beto zinga mvula na mvula. Yo yina, yandi tindaka Mwana na yandi, Yezu Kristu, awa na ntoto. Ntangu Yezu vandaka na ntoto, yandi salaka bisalu mingi ya mfunu. Mu mbandu, yandi longaka balongoki na yandi mambu ya me tala Nzambi mpi Tata na yandi. (1 Piere 1:3) Diaka, yandi fwaka sambu na bantu yonso. Sambu na kubaka luzingu ya mvula na mvula, beto fwete kwikila na Yezu.

Bangogo “yandi pesaka Mwana na yandi mosi kaka ya kubutuka” a ke monisa zola ya mingi yina Nzambi kele na yo. Yezu ke Mwana ya Nzambi ya mfunu mingi. Sambu na nki? Yezu mpamba ke kigangwa yina Nzambi yandi mosi gangaka. (Bakolosai 1:17) Yandi kele “mwana ya ntete ya lugangu yonso.” (Bakolosai 1:15) Nzambi gangaka bima yonso ya nkaka, ata mpi bawanzio, na nzila ya Yezu. Ata mpidina, Yehowa b Nzambi ndimaka na kutinda Mwana na yandi ya yandi ke zolaka mingi “sambu na kusadila mpi kupesa luzingu na yandi bonso nkudulu sambu na bantu mingi.” (Matayo 20:28) Yezu monaka mpasi mpi fwaka sambu na kugulusa beto na masumu mpi lufwa yina beto bakaka na muntu ya ntete, Adami.—Baroma 5:8, 12.

Kumonisa lukwikilu na Yezu ke suka ve kaka na kukwikila na yandi to kundima mambu yina yandi salaka sambu na beto. Sambu na kumonisa nde beto ke kwikila na Mwana ya Nzambi, beto fwete zitisa yandi mpi kulanda mbandu na yandi. (Matayo 7:24-27; 1 Piere 2:21) Biblia ke tuba nde: “Muntu yina ke monisa lukwikilu na Mwana kele na luzingu ya mvula na mvula; muntu yina ke lemfuka ve na Mwana ta mona ve luzingu.”—Yoane 3:36.

Mambu Yina Bo Ke tubila na Baverse ya Kele na Ntwala mpi na Nima ya Yoane 3:16

Yezu tubaka mambu yina ntangu yandi vandaka kusolula ti Nikodemo, mfumu mosi ya dibundu ya Bayuda. (Yoane 3:1, 2) Na masolo na bo, Yezu tubilaka mambu ya me tala Kimfumu ya Nzambi c mpi ‘kubutuka mbala zole.’ (Yoane 3:3) Yezu tubaka na ntwala mutindu yandi ta fwa. Yandi tubaka nde: “Bo fwete tedimisa Mwana ya muntu [na zulu ya nti], sambu konso muntu yina ke kwikila na yandi kubaka luzingu ya mvula na mvula.” (Yoane 3:14, 15) Na nima, yandi tubaka nde kima ya ke sadisa bantu na kubaka dibaku yai ya nene kele zola ya nene yina Nzambi kele na yo sambu na bantu. Sambu na kusukisa, Yezu tendulaka nde sambu na kubaka luzingu, beto fwete monisa lukwikilu mpi kusala mambu yina ke pesa Nzambi kiese.—Yoane 3:17-21.

a Kimfumu ya Nzambi, yina bo ke bingaka mpi “Kimfumu ya zulu,” kele luyalu mosi yina ke yala katuka na zulu. (Matayo 10:7; Kusonga 11:15) Nzambi me tulaka Kristu Ntotila ya Kimfumu yina. Kimfumu ya Nzambi ta lungisa lukanu ya Nzambi sambu na ntoto. (Daniele 2:44; Matayo 6:10) Sambu na kuzaba mambu mingi, tala disolo “Kimfumu ya Nzambi Kele Inki?”

b Yehowa kele zina ya Nzambi.—Nkunga 83:18.

c Ngogo ya Kigreki ya bo me balulaka nde “mosi kaka ya kubutuka” kele monogenes; mukanda mosi ke tuba nde yo ke tendula “mosi mpi mosi mpamba, . . . kima yina me fwanana ve ti ya nkaka to yina bo lenda fwanisa ve.”—A Greek-English Lexicon of the New Testament and Other Early Christian Literature, lut. 658.