Topẽ Vĩ Rá vỹ ẽg mỹ vãmén tĩ, vẽnh kuprĩg kórég ũn tóg Topẽ kato vãsãn mũ. Ti jyjy tỹ tỹ Satanás nĩ, Nén-Kórég ti. Ti tỹ ẽprã ke ag mỹ ke ja nĩ, ag tỹ Topẽ krẽm ke sór tũ nỹtĩ ra, ag tỹ mỹ sigsér kãfór nỹtĩnh ke mũ vã. Tag vỹ vẽnh ó nĩ vã. Hã ra ũn ve fag, Adão kar Eva fi tóg Nén-Kórég vĩ kri fi mũ. Kỹ fag tóg Topẽ kato vãsãn mũ gé. — Gênesis 3:1-6; Nén venh ke 12:9.

Adão kar Eva fi pi Topẽ krẽm ke nỹtĩ sór mũ. Gen kỹ fag pi ga sĩnvĩ ẽmãnmãn hã ki nỹtĩ mũ, kar fag tỹ kófãnfãn rã mũ. (Gênesis 3:17-19) Tag tugnĩn fag krẽ ag tỹ vẽsỹrinhrénh tĩ gé. Topẽ Vĩ Rá vỹ ẽg mỹ ke tĩ, Adão tỹ Topẽ vĩ mranh ja. Tag tugnĩn, “Topẽ vĩ mranh vỹ kã nĩ nĩ sir ti vĩ mranh tugrĩn tóg ter ja nĩ gé.” (Roma 5:12) Tag tugnĩn nén ũ jagy ũ tỹ hẽn ri ke tĩ gé “kejẽn ũn ag tóg tigtar nỹtĩ ja nĩgtĩ. Jãvo ũnꞌũ ag tóg jagãgtar nĩgtĩ ag jakrẽ nỹtĩn kỹ.” (Eclesiastes 8:9) Ẽprã ke ũn tỹ tỹ pãꞌi nĩn kỹ, nén ũ jagy ag tỹ hãn ri ke tĩ.

Topẽ Vĩ Rá vỹ ẽg mỹ ke tĩ, Ninrode vỹ tỹ ẽprã ke pãꞌi vén ja nĩ. Ti tóg Topẽ Pãꞌi kato vãsãn mũ. Prỹg e kãmĩ ẽprã ke pãꞌi ag vỹ kórég nỹtĩ, ũnꞌũ ag mỹ. Prỹg tỹ 3.000 kãfór tỹ nỹ pãꞌi tỹ Salomão rán ja: “ũn tỹ hẽn ri ke ag tóg, nén jagy vég tĩ, kỹ ag tóg fỹ tĩ, ag mré fag. Fỹ ag tóg tĩ hã ra ũn tóg ag mỹ nén ũ há han tũ nĩgtĩ, ũn tỹ ag vóg kónãn kỹ.” — Eclesiastes 4:1.

Ũri nén kar vỹ kórég hã ki tĩg tĩ. Prỹg tỹ 2009 kã, ONU tỹ rán ja: ‘Ũri ẽmã kar vỹ nén ũ jagy ag kato tẽgtẽ nỹtĩ, pãꞌi kórég ag tugnĩn.’

Vẽnh kar tỹ pãꞌi há ag to kenh ke nỹtĩ, ag tỹ ũn ag tỹ rĩr há han jé. Tag hã vỹ ẽg Hyn Han Fã jykre nĩ!

Topẽ tỹ tỹ Pãꞌi nĩ ven ke mũ ha, pãꞌi mág ẽn vỹ pãꞌi kar kókén ke mũ, “kỹ ti tỹ tỹ pãꞌi nĩ vỹ tũgꞌ henh ke tũ nĩ ha.” (Daniel 2:44) Pãꞌi tag hã vỹ ũn ag tỹ Topẽ mỹ to vĩ mũ, Pai-Nosso tỹ. (Mateus 6:9, 10) Topẽ hã tóg kuprẽg mũ, ũn tóg ga kri tĩg mũ ha, ti tỹ tỹ pãꞌi nĩ jé. Topẽ tỹ ũ nẽ kuprẽg ja?